អារ៉ាប៊ីសាអូឌីត ប្រកាសបើកប្រតិបត្តិការយោធាទ្រង់ទ្រាយធំ នៅយេម៉ែន
អារ៉ាប៊ីសាអូឌីត ដែលជាមេដឹកនាំសម្ព័ន្ធអន្តរជាតិ បានប្រកាសបើកប្រតិបត្តិការទ្រង់ទ្រាយធំប្រឆាំងនឹងពួកឧទ្ទាមហ៊ូទី នៅយេម៉ែន។ ជាប្រតិបត្តិការសងសឹកនឹងពួកឧទ្ទាម ដែលបានបាញ់មីស៊ីលបាលីស្ទិក មកលើទឹកដីអារ៉ាប៊ីសាអូឌីត និងបណ្តាលស្លាប់មនុស្សពីរនាក់ និងរបួស៧នាក់។
ចុះផ្សាយនៅថ្ងៃ៖
ស្តាប់ - ០២:០៥
អារ៉ាប៊ីសាអូឌីតបានដឹកនាំកងកម្លាំងសម្ព័ន្ធអន្តរជាតិ ជួយរដ្ឋាភិបាលយេម៉ែនធ្វើសង្គ្រាមទល់នឹងពួកឧទ្ទាមហ៊ូទី តាំងពីឆ្នាំ២០១៥មក។ ហើយពួកឧទ្ទាមហ៊ូទី ដែលស្និទ្ធនឹងអ៊ីរ៉ង់ តែងវាយប្រហារដោយមីស៊ីល និងដ្រូនពីយេម៉ែនមកលើទឹកដីអារ៉ាប៊ីសាអូឌីតវិញជារឿយៗ សំដៅលើហេដ្ឋារចនាសម្ព័ន្ធបូមប្រេង ឬអាកាសយានដ្ឋាន។ ប៉ុន្តែថ្ងៃនេះជាលើកទីមួយ គិតចាប់តាំងពី(២០១៨) បីឆ្នាំចុងក្រោយមក ដែលការវាយប្រហាររបស់ពួកហ៊ូទី បានបង្កឱ្យមានការបាត់បង់ជីវិត មនុស្សពីរនាក់ ម្នាក់ជាជនជាតិអារ៉ាប៊ីសាអូឌីត និងម្នាក់ជាជនជាតិយេម៉ែន ព្រមទាំងមានអ្នករបួស៧នាក់ ក្នុងនោះ៥នាក់ជាជនជាតិអារ៉ាប៊ីសាអូឌីត។
នៅក្នុងសេចក្តីថ្លែងការណ៍ ពួកឧទ្ទាមហ៊ូទីបានបញ្ជាក់អំពីការវាយប្រហារដោយបាញ់មីស៊ីលបាលីស្ទីកចំនួន បីគ្រាប់ ដើម្បីឆ្លើយតបទៅនឹងការវាយប្រហារផ្លូវអាកាសរបស់កងកម្លាំងសម្ព័ន្ធមិត្តមកលើតំបន់របស់ពួកឧទ្ទាមហ៊ូទី រហូតមានស្លាប់ជនស៊ីវិលបីនាក់ និងរបួស៦នាក់។ អ្នកនាំពាក្យរបស់ពួកឧទ្ទាមហ៊ូទី ថែមទាំងបានព្រមាន នៅក្នុងសេចក្តីថ្លែងការណ៍ដដែលថា អារ៉ាប៊ីសាអូឌីតនឹងទទួលការឈឺចាប់ខ្លាំង ប្រសិនបើនៅតែបន្តសកម្មភាពឈ្លានពាននិងឧក្រិដ្ឋមកលើយេម៉ែនទៀត។
សម្រាប់រីយ៉ាដ ការវាយប្រហារផ្លូវអាកាសនេះគឺបណ្តាលមកពីពួកឧទ្ទាមបង្កហេតុបញ្ជាដ្រូនឱ្យធ្វើសកម្មភាពមុនទេ។ ហើយឥលូវមានការវាយប្រហារដោយមីស៊ីលដល់ស្លាប់ទៀត ដូច្នេះ សម្ព័ន្ធអន្តរជាតិដឹកនាំដោយអារ៉ាប៊ីសាអូឌីត នឹងបើកប្រតិបត្តិការយោធាទ្រង់ទ្រាយធំ ប្រឆាំងនឹងឧទ្ទាមហ៊ូទីនៅយេម៉ែនតែម្តង។ សម្ព័ន្ធអន្តរជាតិនឹងធ្វើសន្និសីទកាសែតមួយ នៅថ្ងៃអាទិត្យទី ២៦ធ្នូ។
សូមបញ្ជាក់ថា នារយៈពេលប៉ុន្មានថ្ងៃមកនេះ មានការប្រយុទ្ធតតាំងគ្នាយ៉ាងសន្ធាប់នៅតំបន់អាកាសយានដ្ឋានក្រុងសាណា ដែលជាហេតុធ្វើឱ្យប្រតិបត្តិការផ្តល់ជំនួយមនុស្សធម៌ត្រូវរអាក់រអួលយ៉ាងខ្លាំង។ បើតាមអង្គការសហប្រជាជាតិ សង្គ្រាមយេម៉ែនបានសម្លាប់ជីវិតមនុស្សអស់ជាង៣៧៧០០០នាក់ ក្នុងនោះជាងពាក់កណ្តាលបានស្លាប់ដោយខ្វះ ទឹក ខ្វះអាហារ និងមានជំងឺ។ សង្គ្រាមនៅយេមែននិងស៊ីរី ជាសោកនាដកម្មដ៏ធំធេងនិងដែលគេភ្លេចចោល។ នេះជាសង្ឃដីការរបស់សម្តេចប៉ាបហ្វ្រង់ស័រ ក្នុងពេលជូនពរបុណ្យណូអែលឆ្នាំ២០២១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ