ប្រជាជនលីបង់បោះឆ្នោតរើសសមាជិកសភា ជាង២ឆ្នាំក្រោយចលនាបាតុកម្មទូទាំងប្រទេស
ថ្ងៃអាទិត្យទី១៥ឧសភា ប្រជាជនលីបង់ប្រមាណជិត៤លាននាក់ ត្រូវចូលរួមបោះឆ្នោត ដើម្បីជ្រើសរើសសមាជិកសភា និងឈានទៅបង្កើតរដ្ឋាភិបាលថ្មី។ នេះគឺជាការបោះឆ្នោតលើកទី១ បន្ទាប់ពីមានចលនាបាតុកម្មបះបោរ របស់ប្រជាជន កាលពីខែតុលាឆ្នាំ២០១៩ ដើម្បីប្រឆាំងនឹងថ្នាក់ដឹកនាំនយោបាយពុករលួយ បក្សពួកនិយម។ ការបោះឆ្នោតនៅលើកនេះ ក៏ជាការធ្វើតេស្តសម្រាប់បេក្ខជនឯករាជ្យ និងក្រុមបក្សប្រឆាំងដែរ ថាអាចបានទទួលការគាំទ្រពីប្រជាជន ដែរឬយ៉ាងណា!
ចុះផ្សាយនៅថ្ងៃ៖
ស្តាប់ - ០២:១៦
តើសមាសភាពសមាជិកសភាថ្មី របស់លីបង់ ដែលមាន១២៨អសនៈ និងមានទ្រង់ទ្រាយយ៉ាងណា? តើក្រុមគណបក្សនយោបាយចាស់ឆ្នាំ ដែលត្រូវបានប្រជាជនលីបង់ ចោទថាតែងតែបានស៊ំគ្រលំគ្នា ដើម្បីបែកចែកអំណាច ប្រមូលប្រាក់ចែកគ្នានោះ អាចនឹងឈ្នះឆ្នោតនៅលើកនេះទេ?
គួររំលឹកថា កាលពីខែតុលា ឆ្នាំ២០១៩ ប្រជាជនលីបង់ បានបះបោរធ្វើបាតុកម្មទូទាំងប្រទេស ដើម្បីប្រឆាំងនឹងក្រុមបក្សពួកនយោបាយ ដែលកាន់អំណាចរាប់សិបឆ្នាំ តែប្រទេសកាន់តែក្រីក្រ ជីវភាពប្រជាជនកាន់តែលំបាក។ សេវាសាធារណៈ ទឹក ភ្លើង មន្ទីរពេទ្យ រដ្ឋគ្មានលទ្ធភាពធានា។ លីបង់បាន និងកំពុងតែឆ្លងកាត់វិបត្តិសេដ្ឋកិច្ចដ៏ធ្ងន់ធ្ងរបំផុត។ ក្នុងរយៈពេលប្រមាណ២ឆ្នាំមកនេះ រូបិយបណ្ណលីបង់ បានបាត់បង់តម្លៃចំនួនជាង៩០% អត្រាអ្នកអត់ការងារធ្វើ កើនឡើងមួយជា៣។ យោងតាមអង្គការសហប្រជាជាតិ ៨០%នៃប្រជាជនលីបង់ កំពុងរស់នៅក្រោមបន្ទាត់នៃភាពក្រីក្រ។
តែយ៉ាងណាក៏ដោយ យោងតាមការវិភាគរបស់អ្នកជំនាញ ការបោះឆ្នោតនៅលើកនេះ ប្រហែលជាគ្មានអ្វីប្រែប្រួលច្រើននោះទេ។ លោក Sam Heller អ្នកជំនាញលីបង់ម្នាក់ បានសរសេរនៅក្នុងអត្ថបទវិភាគមួយ លើគេហទំព័រ The Century Foundation ដោយលោកបានលើកឡើងថា សមាសភាពសភាលីបង់ នឹងមិនត្រូវបានផ្លាស់ប្តូរធំដុំនោះឡើយ នៅក្រោយលទ្ធផលឆ្នោតថ្ងៃទី១៥ឧសភានេះ។ ការដឹកនាំនយោបាយលីបង់ ក៏នឹងគ្មានអ្វីប្រែប្រួលដែរ ព្រោះពួកបក្សនយោបាយធំៗ នឹងនៅតែបន្តស្រុះស្រួលគ្នាបែងចែកអំណាច ចែកលាភសក្ការៈគ្នាដដែល។
ទន្ទឹមគ្នានេះដែរ អ្នកជំនាញខ្លះទៀត បានលើកឡើងថា គណបក្សធំៗ បានប្រើប្រាស់លុយ ដើម្បីសូកប៉ាន់ទិញទឹកចិត្តអ្នកបោះឆ្នោត ក្នុងបរិបទដែលជីវភាពប្រជាជនលីបង់ ធ្លាក់ចុះដុនដាបខ្លាំង។ រីឯបេក្ខជនឈរឈ្មោះ ជាក្រុមឯករាជ្យ និងក្រុមគណបក្សប្រឆាំងវិញ គ្មានទាំងបទពិសោធន៍ គ្មានទាំងថវិកា ហើយក៏គ្មានការរួមកម្លាំងសាមគ្គីគ្នាទៀត។ យោងតាមការស្ទាបស្ទង់មតិមួយ ធ្វើឡើងដោយអង្គការ Oxfam កាលពីខែមេសា ប្រជាជនប្រមាណជាង៤៣% បានឆ្លើយថា មិនទៅបោះឆ្នោតទេ ហើយក្នុងចំណោមនោះ ជាងពាក់កណ្តាលអះអាងថា ព្រោះគ្មានបេក្ខជនដែលគួរជាទីរំពឹងទុកចិត្តសោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ