កងទ័ពអ៊ីស្រាអែល បាញ់ស្ទាក់ដ្រូនរបស់ក្រុមហេសបូឡា ដែលសំដៅចូលមកស្ថានីយបូមហ្កាស
កងទ័ពអ៊ីស្រាអែល បានអះអាងថា គេបានបាញ់ស្ទាក់កំទេចយានដ្រូនចំនួន៣គ្រឿង របស់ក្រុមហេសបូឡាលីបង់ នៅថ្ងៃអាទិត្យទី៣កក្កដា។ យោងតាមកងទ័ពអ៊ីស្រាអែល យានដ្រូនទាំងនេះ ត្រូវបានបញ្ជាដោយក្រុមហេសបូឡាលីបង់ ហោះសំដៅទៅធ្វើប្រតិបត្តិការ នៅស្ថានីយ័បូមហ្កាសដ៏ធំមួយ ឈ្មោះ Karish ក្នុងសមុទ្រម៉េឌីទែរ៉ាណេ។
ចុះផ្សាយនៅថ្ងៃ៖
ស្តាប់ - ០២:០៦
យោងតាមលិខិតប្រកាស របស់ក្រុមហេសបូឡាលីបង់ គឺគេបានបញ្ជាយានដ្រូនគ្មានមនុស្សបើក ចំនួន៣គ្រឿង ឆ្ពោះទៅកាន់ស្ថានីយ៍បូមហ្កាស Karish ដែលស្ថិតក្នុងតំបន់ជម្លោះរវាងអ៊ីស្រាអែល និងលីបង់ ក្នុងសមុទ្រម៉េឌីទែរ៉ាណេ។ ដោយមិនបញ្ជាក់ថា ដ្រូនត្រូវបានគេស្ទាក់បាន ក្រុមហេសបូឡា អះអាងថាបេសកម្មរបស់យានដ្រូនទាំងនេោះ គឺដើម្បីប្រមូលទិន្នន័យព័ត៌មាន។
ដោយឡែក ផ្អែកតាមក្រសួងការពារជាតិអ៊ីស្រាអែល យានដ្រូនទាំងនោះ ត្រូវបានគេស្ទាក់បាញ់កំទេចបាន មុននឹងហោះចូលទៅជិតតំបន់ Karish។ ប្រភពដដែលអះអាងថា ដ្រូន១ក្នុងចំណោម៣គ្រឿង ត្រូវបានយន្តហោះចម្បាំងអ៊ីស្រាអែល ចាប់រលកសញ្ញាបាន ចំណែក២គ្រឿងទៀត ត្រូវបានស្ទាក់ចាប់បាន ដោយនាវាចម្បាំងអ៊ីស្រាអែល។
គួរបញ្ជាក់ថា ស្ថិតក្នុងបរិបទវិបត្តិថាមពល ប្រេងនិងហ្កាសកាន់តែឡើងថ្លៃ ស្ថានីយ៍បូមហ្កាសKarish របស់អ៊ីស្រាអែល កំពុងបង្កឲ្យមានការច្រណែនយ៉ាងខ្លាំងពីលីបង់ ដែលអះអាងថាស្ថានីយនេះស្ថិតនៅក្នុងតំបន់មានជម្លោះ។ តែយ៉ាងណា អ៊ីស្រាអែលអះអាងថា ស្ថានីយ៍នេះស្ថិតនៅក្នុងតំបន់សេដ្ឋកិច្ចផ្តាច់មុខរបស់ខ្លួន ពោលគឺនៅឆ្ងាយច្រើនគីឡូម៉ែត្រ ពីតំបន់ដែលអ៊ីស្រាអែល និងលីបង់កំពុងចរចាគ្នា។ យ៉ាងណាមិញ យោងតាមរូបភាពផ្កាយរណប ចុះផ្សាយដោយកាសែតអ៊ីស្រាអែល Haaretz គឺស្ថានីយ៍បូមឧស្ម័ន Karish ទំនងជាស្ថិតនៅក្នុងដែនទឹកអ៊ីស្រាអែលមែន។
គួររំលឹកដែរថា ក្រុមហេសបូឡាលីបង់ តែងតែត្រូវបានអ៊ីស្រាអែលចោទប្រកាន់ថា គឺជាក្រុមភេរកម្មអាយ៉ងរបស់អ៊ីរ៉ង់ ដែលជាសត្រូវស្លាប់រស់នឹងអ៊ីស្រាអែល។ ហេតុការណ៍បាញ់ស្ទាក់ដ្រូនរបស់ហេសបូឡានេះ បានកើតឡើងមួយថ្ងៃ ក្រោយការចូលកាន់តំណែង របស់លោកនាយករដ្ឋមន្ត្រីថ្មីអ៊ីស្រាអែល Yaïr Lapid ។ នៅក្នុងសុន្ទរកថាស្បថចូលកាន់តំណែង លោក Yaïr Lapid បានប្រកាសថា លោកសូមផ្តាំប្រាប់ទៅដល់ ពពួកមនុស្ស ដែលចង់បំផ្លាញ ចង់កំទេចអ៊ីស្រាអែល មិនថានៅហ្កាហ្សា នៅតេអេរ៉ង់ នៅលីបង់ និងទាំងនៅស៊ីរី កុំមកចង់ល្បងកម្លាំងជាមួយអ៊ីស្រាអែលឲ្យសោះ ព្រោះអ៊ីស្រាអែល មានវិធីប្រើប្រាស់កម្លាំងតបវិញ ដើម្បីទប់ទល់នឹងការគំរាមទាំងឡាយរបស់សត្រូវ យ៉ាងមានប្រសិទ្ធភាពបំផុត។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ