ក្រោយវេតូរុស្ស៊ី ស៊ីរីប្រឈមនឹងគ្រោះហន្តរាយមនុស្សធម៌
ប្រជាពលរដ្ឋស៊ីរី ដែលជាប់កុននៅភាគពាយ័ព្យប្រទេស បានស្រែកអាសន្ន នៅថ្ងៃសៅរ៍ទី ០៩កក្កដានេះ ក្រោយពីបានឃើញរុស្ស៊ីប្រើសិទ្ធិវេតូនៅក្រុមប្រឹក្សាសន្តិសុខអង្គការសហប្រជាជាតិប្រឆាំងគម្រោងសេចក្តីសម្រេចចិត្តបន្តជំនួយមួយឆ្នាំទៀតនៅស៊ីរី។ គ្មានជំនួយពីអង្គការសហប្រជាជាតិ ស៊ីរីនឹងធ្លាក់ក្នុងគ្រោះមហន្តរាយមនុស្សធម៌។
ចុះផ្សាយនៅថ្ងៃ៖
ស្តាប់ - ០២:១៥
គម្រោងសេចក្តីសម្រេចចិត្តអង្គការសហប្រជាជាតិ អនុញ្ញាតឱ្យបន្តជំនួយមនុស្សធម៌មួយឆ្នាំបន្ថែមទៀតដល់ពលរដ្ឋស៊ីរី ដោយមិនឆ្លងកាត់ការព្រមព្រៀងពីរដ្ឋាភិបាលក្រុងដាម៉ាស បានទទួលការគាំទ្រពីសមាជិកក្រុមប្រឹក្សាអចិន្ត្រៃយ៍និងមិនអចិន្ត្រៃយ៍ចំនួន១៣ប្រទេស ប៉ុន្តែរុស្ស៊ីបោះឆ្នោតប្រឆាំង។ ចិនអនុប្បវាទ។
ដោយគ្មានការភ្ញាក់ផ្អើល រុស្ស៊ីបានពន្យល់មូលហេតុនៃការប្រើសិទ្ធិវេតូជាលើកទី១៧ក្នុងសំណុំរឿងស៊ីរី ថាដើម្បីគោរពអធិបតេយ្យភាពក្រុងដាម៉ាស។ ប៉ុន្តែជាមួយនឹងវេតូប្រឆាំងរបស់រុស្ស៊ី ពលរដ្ឋស៊ីរីរស់នៅតំបន់ប៉ែកពាយ័ព្យប្រទេសអាចនឹងធ្លាក់ក្នុងគ្រោះទុរ្ភិក្ស ដ៏ធ្ងន់ធ្ងរដែលពុំអាចគ្រប់គ្រងបាន និងគំរាមកំហែងដោយផ្ទាល់សុវត្ថិភាពស្បៀងអាហាររបស់ប្រជាពលរដ្ឋស៊ីរីនៅភាគខាងជើងជាងបួនលាននាក់។ នេះបើតាមអ្នកទទួលខុសត្រូវច្រកព្រំដែនស៊ីរី-តួកគី Bab Al-Hawa។
សូមបញ្ជាក់ថា កម្មវិធីផ្តល់ជំនួយមនុស្សធម៌ឆ្លងព្រំដែនរបស់អង្គការសហប្រជាជាតិបានចូលជាធរមានតាំងពីឆ្នាំ២០១៤មក សម្រាប់ជួយសង្គ្រោះប្រជាពលរដ្ឋស៊ីរី ជាង២,៤លាននាក់រស់នៅក្នុងតំបន់Idleb ដែលស្ថិតនៅក្រោមការត្រួតត្រារបស់ពួកជីហាតនិងឧទ្ទាម។ កម្មវិធីនេះ ត្រូវអស់សុពលភាពនៅយប់ថ្ងៃអាទិត្យទី ១០កក្កដានេះ ហេតុដូច្នេះហើយបានជាពលរដ្ឋរស់នៅខេត្តIdleb ដែលភាគច្រើនជាជនធ្វើបំលាស់ទី ដ៏ក្រីក្រ រស់រំពឹងលើជំនួយមនុស្សធម៌ ព្រួយបារម្ភខ្លាំង។ បើតាមការិយាល័យសម្របសម្រួលកិច្ចការមនុស្សធម៌ (Ocha) នៅឆ្នាំ២០២២នេះ ជំនួយជាស្បៀងអាហារចំនួន៤៦០០ឡានកាមីញ៉ុង បានទៅដល់ស៊ីរី តាមច្រក Bab al-Hawa។ ច្រកតែមួយគត់ដែលក្បួនអង្គការសហប្រជាជាតិអាចចេញចូលបាន ដោយមិនឆ្លងកាត់តំបន់ដោយរដ្ឋាភិបាលស៊ីរី។ កាលពីឆ្នាំទៅ មានពលរដ្ឋស៊ីរីចំនួន១៣,៤លាននាក់ត្រូវការជំនួយមនុស្សធម៌ ទល់នឹងនឹង១១,១លាននាក់កាលពីឆ្នាំ២០២០។ នេះបើតាមOchaដដែល។
គិតចាប់តាំងពីស៊ីរីបានធ្លាក់ខ្លួនក្នុងជម្លោះនៅឆ្នាំ២០១១មក មានមនុស្សជិតកន្លះលាននាក់បានស្លាប់និងពលរដ្ឋពាក់កណ្តាលប្រទេសធ្វើបំលាស់ទី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ