អ៊ីរ៉ង់ប្រកាសមានសមត្ថភាពផលិតអាវុធនុយក្លេអ៊ែរ
នៅថ្ងៃចន្ទទី ១៨កក្កដា២០២២នេះ អ្នកទទួលខុសត្រូវជាន់ខ្ពស់អ៊ីរ៉ង់ជាច្រើនរូបបានប្រកាសថា “អ៊ីរ៉ង់សម្រេចសមត្ថភាពបច្ចេកទេសផលិតគ្រាប់បែកនុយក្លេអ៊ែរហើយ”។ សេចក្តីប្រកាសនេះធ្វើឡើងតែមួយក្រោយពីលោកប្រធានាធិបតីអាមេរិកចូបៃដិន បានចាកចេញពីតំបន់ដើមបូព៌ា បន្ទាប់ពីបានបំពេញទស្សនកិច្ចអស់បីថ្ងៃនិងបានចុះហត្ថលេខាលើកិច្ចព្រមព្រៀងសន្តិសុខមួយជាមួយអ៊ីស្រាអែល សន្យាដាច់ខាតមិនឱ្យអ៊ីរ៉ង់មានអាវុធនុយក្លេអ៊ែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
គឺអតីតរដ្ឋមន្ត្រីក្រសួងការបរទេសអ៊ីរ៉ង់ លោក កាម៉ាល់ ខារ៉ាហ្ស៊ី Kamal Kharazi ដែលជាទីប្រឹក្សារបស់អគ្គមគ្គុទេសក៍អ៊ីរ៉ង់ និងជាប្រធានក្រុមប្រឹក្សាយុទ្ធសាស្ត្រនៃទំនាក់ទំនងបរទេស ជាអ្នកប្រកាសដំណឹង ទៅក្នុងទូរទស្សន៍ Al Jazira ថា “អ៊ីរ៉ង់មានសមត្ថភាពបច្ចេកទេសផលិតអាវុធអាតូមិកហើយ ប៉ុន្តែមិនទាន់សម្រេចចិត្តធ្វើទេ”។ មិនតែប៉ុណ្ណោះ អ្នកទទួលខុសត្រូវអ៊ីរ៉ង់ បានអះអាងបន្ថែមទៀតថា ដើម្បីឆ្លើយតបទៅនឹងការគំរាមកំហែងរបស់អ៊ីស្រាអែល កងកម្លាំងយោធាអ៊ីរ៉ង់ បានធ្វើសមយុទ្ធ ទ្រង់ទ្រាយធំ ជាច្រើនលើកច្រើនសា ដើម្បីអាចវាយប្រហារអ៊ីស្រាអែល ជាពិសេសវាយប្រហារលើចំណុចរសើបៗរបស់ប្រទេស មានជាអាទិ៍មជ្ឈមណ្ឌលនុយក្លេអ៊ែរតែម្តង។
អន្តរាគមន៍របស់លោក ខារ៉ាហ្ស៊ី ធ្វើឡើងក្នុងខណៈដែលការចរចារបស់អ៊ីរ៉ង់ជាមួយក្រុមមហាអំណាចនិងសហរដ្ឋអាមេរិកស្តីពីការវិលត្រលប់ទៅរកកិច្ចព្រមព្រៀងនុយក្លេអ៊ែរឆ្នាំ២០១៥ ត្រូវជាប់គាំងស្តូកតាំងពីខែមីនា២០២២មក និងតែមួយថ្ងៃប៉ុណ្ណោះ ក្រោយការបិទបញ្ចប់ទស្សនកិច្ចនៅដើមបូព៌ារបស់លោកចូបៃដិន។
ក្នុងឱកាសបំពេញទស្សនកិច្ចនៅអារ៉ាប៊ីសាអូឌីត និងអ៊ីស្រាអែល ប្រធានាធិបតីអាមេរិកបានធានាហើយធានាទៀតថាវ៉ាស៊ីនតោននឹងធ្វើប្រើគ្រប់មធ្យោបាយទប់ស្កាត់អ៊ីរ៉ង់មិនឱ្យមានអាវុធនុយក្លេអ៊ែរជាដាច់ខាត ដោយបានទាំងចុះហត្ថលេខាជាមួយលោកនាយករដ្ឋមន្ត្រីអ៊ីស្រាអែលលើសេចក្តីថ្លែងការណ៍ហ្សេរុយសាឡិមផង។
ជាការកាតិការសញ្ញាបំភាន់ភ្នែក និងប្រកបដោយពុតត្បុតរបស់សហរដ្ឋអាមេរិកដែលបិទភ្នែកបណ្តោយឱ្យអ៊ីស្រាអែលមានអាវុធនុយក្លេអ៊ែរតែម្នាក់ឯងនៅក្នុងតំបន់។ នេះជាប្រតិកម្មរបស់អ្នកនាំពាក្យក្រសួងការបរទេសអ៊ីរ៉ង់ កាលពីថ្ងៃអាទិត្យ។
អ៊ីរ៉ង់សត្រូវលេខមួយរបស់អ៊ីស្រាអែល កំពុងបោះជំហានទៅមុខយ៉ាងលឿន ក្នុងកម្មវិធីនុយក្លេអ៊ែរនិងការចម្រើនធាតុអ៊ុយរ៉ានីញ៉ូម នៅតែបដិសេធជានិច្ចថាមិនចង់មានគ្រាប់បែកបរមាណូទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ