អ៊ីរ៉ង់៖ប្រឈមនឹងបាតុកម្ម កងទ័ពប្រកាសត្រៀមខ្លួនត ទល់នឹងសត្រូវដើម្បីធានាសន្តិសុខ និងសន្តិភាពរបស់ប្រទេស
នៅក្នុងប្រទេសអ៊ីរ៉ង់ ក្បួនបាតុកម្មបាន និងកំពុងបន្តមានយ៉ាងផុសផុលនៅក្រោយការស្លាប់នារីវ័យក្មេងម្នាក់ឈ្មោះ Mahsa Amini។ កំហឹងរបស់បាតុករប្រឆាំងនឹងមរណភាពរបស់នារី Mahsa Amini បានរងការវាយបង្រ្កាបយ៉ាងហិង្សាពីកម្លាំងប៉ូលិស។ តាមកាសែតរដ្ឋ អំពើហិង្សាបានបណ្តាលឲ្យមានមនុស្សស្លាប់ចំនួន ១៧នាក់។ តែតាមអង្គការក្រៅរដ្ឋាភិបាល មានស្លាប់យ៉ាងតិច ៣៦នាក់។ ប្រធានាធិបតីអ៊ីរ៉ង់លោកអេប្រាហ៊ីម រ៉ៃស៊ីបានប្រកាសសន្យាបើកការស៊ើបអង្កេត ហើយកងទ័ពប្រកាសត្រៀមខ្លួនធានាសន្តិសុខ និងសន្តិភាពរបស់ប្រទេស។
ចុះផ្សាយនៅថ្ងៃ៖
ស្តាប់ - ០២:១១
គឺឆ្លើយនឹងសំណួររបស់ក្រុមអ្នកកាសែតនាឱកាសចូលរួមនៅក្នុងមហាសន្និបាតអង្គការសហប្រជាជាតិក្នុងក្រុងញូយ៉កដែលប្រធានាធិបតីអ៊ីរ៉ង់លោកអេប្រាហ៊ីម រ៉ៃស៊ីបានប្រកាសថា រដ្ឋាភិបាលនឹងបើកការស៊ើបអង្កេតមួយជុំវិញមរណភាពនារី Mahsa Amini។ តែលោកបានឆ្លៀតបញ្ជាក់ថា របាយការណ៍របស់គ្រូពេទ្យមិនបានរកឃើញពីការធ្វើទារុណកម្មរបស់ប៉ូលិសលើនារី Mahsa Amini រហូតដល់ស្លាប់ឡើយ។ យ៉ាងណាក៏ដោយ លោកអេប្រាហ៊ីម រ៉ៃស៊ីបានអះអាងពីការមិនចង់ទាញសេចក្តីសន្និដ្នានលឿនពេក និងថា លោកបានសន្យាជាមួយក្រុមគ្រួសារនារី Mahsa Amini ដើម្បីបើកការស៊ើបអង្កេតមួយដើម្បីស្វែងរកការពិត។
គួររម្លឹកថា នារី Mahsa Amini ត្រូវបានប៉ូលិសសីលធម៌ចាប់ខ្លួននាថ្ងៃទី ១៣ កញ្ញានៅសួនច្បារមួយក្នុងទីក្រុងតេហេរ៉ង់ក្រោមបទចោទប្រកាន់ពីការស្លៀកពាក់មិនសមរម្យតាមច្បាប់សាសនាអ៊ីស្លាម និងបានបាត់បង់ជីវិតនៅ ៣ថ្ងៃក្រោយការចាប់ខ្លួន។ នេះហើយជាចំណុចចាប់ផ្តើមនៃការផ្ទុះបាតុកម្មឆ្លងរាលដាលសឹងពេញប្រទេសមកដល់សព្វថ្ងៃ។ ទន្ទឹមគ្នានេះ មរណភាពរបស់នារី Mahsa Amini ក៏បានបំផុសឲ្យមានការផ្តន្ទាទោសពីសហគមន៍អន្តរជាតិដែរ។ ក្នុងថ្ងៃព្រហស្បតិ៍ ទី២២ កញ្ញា អាមេរិកបានប្រកាសដាក់ទណ្ឌកម្មសេដ្ឋកិច្ចលើស្ថាប័នប៉ូលិសសីលធម៌ និងថ្នាក់ដឹកនាំសន្តិសុខអ៊ីរ៉ង់ជាច្រើនរូបនៅក្នុងការស្លាប់បាតុករ។
កាយវិការរបស់អាមេរិកនេះបានធ្វើឲ្យប្រធានាធិបតីអ៊ីរ៉ង់លោកអេប្រាហ៊ីម រ៉ៃស៊ីក្តៅក្រហាយដោយស្រែកថា ហេតុអ្វីបានជាអាមេរិកមិនធ្វើដូចគ្នានេះទៅលើអ្នកដែលបានបាត់បង់ជីវិតនៅក្រោមកណ្តាប់ដៃកម្លាំងសន្តិសុខ និងប៉ូលិសនៅក្នុងបណ្តាប្រទេសបស្ចិមលោកផង។ បន្ទាប់មក លោកអេប្រាហ៊ីម រ៉ៃស៊ីបានចោទបស្ចិមលោកពីបទមានស្តង់ដារពីរទាក់ទងនឹងសិទ្ធិស្រ្តី។ ដោយឡែក កងទ័ពអ៊ីរ៉ង់បានបញ្ចេញប្រតិកម្មក្នុងរឿងបាតុកម្មដោយបញ្ជាក់ពីការត្រៀមខ្លួនត ទល់នឹងសត្រូវដើម្បីធានាសន្តិសុខ និងសន្តិភាពរបស់ប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ