អាមេរិកប្រកាសដកចោលទណ្ឌកម្មខ្លះ ដើម្បីឲ្យបាតុករអ៊ីរ៉ង់អាចប្រើប្រាស់អ៊ីនធ័រនែត
អាមេរិកប្រកាសជួយប្រជាជនអ៊ីរ៉ង់ ដើម្បីឲ្យពួកគេទទួលប្រើប្រាស់សេវាអ៊ីនធ័រនែត។ តាមការប្រកាសរបស់ក្រសួងហិរញ្ញវត្ថុអាមេរិក កាលពីថ្ងៃសុក្រទី ២៣កញ្ញា រដ្ឋបាលលោកចូ បៃដិននឹងបន្ធូរបន្ថយទណ្ឌកម្មមួយចំនួន ដែលដាក់ទៅលើអ៊ីរ៉ង់ ដើម្បីបើកផ្លូវឲ្យក្រុមហ៊ុនបច្ចេកវិទ្យាអាមេរិកអាចផ្តល់សេវាអ៊ីនធ័រនែត សម្រាប់ប្រជាជនអ៊ីរ៉ង់។ សកម្មជនសិទ្ធិមនុស្សបានរិះគន់អាជ្ញាធរអ៊ីរ៉ង់ដែលបានកាត់ផ្តាច់បណ្តាញអ៊ីនធ័រនែត នៅប៉ុន្មានថ្ងៃមកនេះ ដើម្បីបិទខ្ទប់ បន្ទុចបង្អាក់ចលនាបាតុកម្មប្រឆាំង ដែលកំពុងផ្ទុះរីករាលដាលពេញប្រទេស នៅក្រោយ ស្រ្តីអ៊ីរ៉ង់ម្នាក់ស្លាប់ក្នុងអំឡុងពេលឃាត់ខ្លួនរបស់ប៉ូលិសសីលធម៌។
ចុះផ្សាយនៅថ្ងៃ៖
ស្តាប់ - ០២:២២
ដើម្បីជំរុញការផ្សព្វផ្សាយ និងការទទួលបានព័ត៌មានដោយសេរី របស់ប្រជាជនអ៊ីរ៉ង់ រដ្ឋាភិបាលអាមេរិកប្រកាសសម្រាលទណ្ឌកម្មពាណិជ្ជកម្ម លើអ៊ីរ៉ង់។ តាមសេចក្តីប្រកាសព័ត៌មានរបស់ក្រសួងហិរញ្ញវត្ថុអាមេរិក គេនឹងលុបចោលបម្រាមមួយចំនួន ស្តីពីការនាំចេញបច្ចេកវិទ្យាទៅអ៊ីរ៉ង់។ គោលបំណង គឺជួយសម្រួល បើកផ្លូវឲ្យក្រុមហ៊ុនអាមេរិក អាចផ្តល់ជម្រើស និងសេវាប្រើប្រាស់អ៊ីនធ័រនែតយ៉ាងទូលំទូលាយដល់ប្រជាជនអ៊ីរ៉ង់។
នៅថ្ងៃចន្ទ ដើមសប្តាហ៍នេះ មហាសេដ្ឋីអាមេរិក លោកElon Musk បានលើកឡើងថា ក្រុមហ៊ុនSpace Xរបស់លោកបានដាក់ពាក្យទៅរដ្ឋាភិបាល ស្នើសុំករណីលើកលែង នៅក្នុងទណ្ឌកម្មលើអ៊ីរ៉ង់ ដើម្បី ពង្រីកការចែកចាយសេវាអ៊ីនធ័រនែតនៅអ៊ីរ៉ង់ តាមរយៈផ្កាយរណបStarlink របស់ក្រុមហ៊ុនរបស់លោក។ មន្រ្តីសេតវិមានម្នាក់បាននិយាយប្រាប់ទីភ្នាក់ងារព័ត៌មានបារាំង AFP ថា យ៉ាងណាក៏ដោយ សេវាអ៊ីនធ័រនែតរបស់ក្រុមហ៊ុនSpaceXមិនស្ថិតនៅក្នុងបញ្ជីសម្រាលទណ្ឌកម្មលើអ៊ីរ៉ង់ដែលរដ្ឋបាលលោកចូ បៃដិនបានប្រកាសកាលពីថ្ងៃសុក្រ។ ដូច្នេះ ក្រុមហ៊ុនត្រូវដាក់ពាក្យសុំ ពិសេសមួយដាច់ដោយឡែក។
ការប្រកាសរបស់ក្រសួងហិរញ្ញវត្ថុអាមេរិក ដើម្បីជំរុញ ការចែកចាយអ៊ីនធ័រនែតនៅអ៊ីរ៉ង់ ធ្វើឡើង នៅបន្ទាប់ពី អាជ្ញាធរអ៊ីរ៉ង់កំពុងរឹតបន្តឹងខ្លាំងការប្រើប្រាស់អ៊ីនធ័រនែត នៅក្នុងប្រទេស នៅក្នុងគោលដៅ ទប់ស្កាត់ចលនាបាតុកម្ម និងការផ្សព្វផ្សាយរូបភាពបង្រ្កាបហិង្សាទៅលើបាតុករ។
តាមអង្គការតាមដានការប្រើប្រាស់អ៊ីនធ័រនែតនៅអ៊ីរ៉ង់ ឈ្មោះ Netblocks សេវាទូរស័ព្ទដៃត្រូវបានកាត់ផ្តាច់សឹងទាំងស្រុងនៅថ្ងៃសុក្រ ចំណែក បណ្តាញសង្គម ដូចជាInstagram WhatsApp ត្រូវរអាក់រអួលខ្លាំង នៅតាមតំបន់ដែលកំពុងមានការបង្រ្កាបខ្លាំង។ តាមកាសែតក្នុងស្រុក យ៉ាងហោចមនុស្ស៣៥នាក់ស្លាប់នៅក្នុងការប៉ះទង្គិចគ្នារវាងប៉ូលិស និងបាតុករ។ ជាង១សប្តាហ៍មកនេះ បាតុកម្មប្រឆាំងរដ្ឋាភិបាលរីករាលដាលពេញប្រទេស នៅបន្ទាប់ ស្រ្តីអ៊ីរ៉ង់ម្នាក់ដែលប៉ូលិសសីលធម៌ចោទប្រកាន់ពីរឿងពាក់ក្រណាត់ទទូរក្បាលមិនត្រឹមត្រូវ បានស្លាប់នៅក្នុងអំឡុងពេលឃាត់ខ្លួន។
តាមសកម្មជនសិទ្ធិមនុស្ស អាជ្ញាធរបិទខ្ទប់បណ្តាញអ៊ីនធ័រនែត ដើម្បីទប់ស្កាត់ការចែកចាយរូបភាព វីដេអូស្តីពីបាតុកម្ម ដូចជា ការដុតក្រណាត់ទទូរក្បាលរបស់ស្រ្តី ការហែករូបភាពមេដឹកនាំសាសនាអ៊ីរ៉ង់ ឬវីដេអូ ស្តីពីការបាញ់បង្រ្កាបរបស់ប៉ូលិសអ៊ីរ៉ង់ជាដើម។ អាជ្ញាធរអ៊ីរ៉ង់ បិទខ្ទប់អ៊ីនធ័រនែត បិទបណ្តាញសង្គម ដើម្បីទប់ស្កាត់កុំឲ្យប្រជាជនពុះកញ្ជ្រោលធ្វើបាតុកម្ម និងម្យ៉ាងដើម្បី អាចបិទបាំង កុំឲ្យលេចធ្លាយ ព័ត៌មាន រូបភាពបង្រ្កាបហិង្សារបស់អាជ្ញាធរអ៊ីរ៉ង់ ទៅកាន់ពិភពលោកខាងក្រៅ។ សកម្មជនការពារសិទ្ធិមនុស្សបារម្ភថា ដោយបិទខ្ទប់ការផ្សព្វផ្សាយនៅតាមអ៊ីនធ័រនែត អាជ្ញាធរអ៊ីរ៉ង់នឹងអាចលាក់បាំង ការបង្ក្រាបថ្លុកឈាម ទៅលើបាតុករ។
តាមអ្នកស្រាវជ្រាវរបស់ក្រុមដើម្បី សេរីភាពបញ្ចេញមតិនៅអ៊ីរ៉ង់ Article 19 នេះជាលើកទី២ ដែលអាជ្ញាធរអ៊ីរ៉ង់បិទខ្ទប់ បណ្តាញអ៊ីនធ័រនែត បន្ទាប់ពីបានចាត់វិធានការស្រដៀងនេះ ក្នុងអំឡុងបាតុកម្មប្រឆាំងទំនិញឡើងថ្លៃ កាលពីឆ្នាំ ២០១៩។
នៅថ្ងៃសៅរ៍ ប៉ូលិសថ្នាក់តំបន់អ៊ីរ៉ង់និយាយថា មានមនុស្ស៧៣៩នាក់ត្រូវបានចាប់ខ្លួន ដែលនៅក្នុងនោះមានស្រ្តី៦០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ