មានការរៀបចំបាតុកម្មច្រើនកន្លែងក្នុងលោកដើម្បីគាំទ្រ និងសម្តែងសាមគ្គីភាពជាមួយបាតុករអ៊ីរ៉ង់
នៅក្នុងប្រទេសអ៊ីរ៉ង់ ក្បួនបាតុកម្មបានឈានចូលដល់សប្តាហ៍ទី៣ នាថ្ងៃសៅរ៍ ទី១ តុលា។ បាតុកម្មបានផ្ទុះឡើងក្នុងថ្ងៃទី១៦ កញ្ញា ពោលក្រោយមរណភាពនារីវ័យក្មេងម្នាក់ឈ្មោះម៉ាសា អាមីនី។ មានអាយុ ២២ឆ្នាំ នារីម៉ាសា អាមីនីត្រូវបានប៉ូលិសសីលធម៌ចាប់ខ្លួនក្នុងថ្ងៃទី ១៣ កញ្ញាពីបទស្លៀកពាក់មិនសមរម្យតាមច្បាប់សាសនាអ៊ីស្លាម និងបានទទួលមរណភាពក្នុងមន្ទីរពេទ្យនៅ ៣ថ្ងៃក្រោយមក។ រដ្ឋអំណាចបានបដិសេធមិនទទួលខុសត្រូវលើការស្លាប់នារីម៉ាសា អាមីនី។ ក្រៅពីបាតុកម្មនៅអ៊ីរ៉ង់ គេសង្កេតឃើញមានបាតុកម្មជួបជុំនៅក្នុងទីក្រុងជាច្រើនលើលោកក្នុងថ្ងៃសៅរ៍ ទី១ តុលាដើម្បីគាំទ្រ និងរួមសាមគ្គីជាមួយក្រុមបាតុករអ៊ីរ៉ង់។
ចុះផ្សាយនៅថ្ងៃ៖
ស្តាប់ - ០២:១៤
ក្បួនបាតុកម្មនៅបរទេសដើម្បីចូលរួមគាំទ្រ និងសម្តែងសាមគ្គីភាពជាមួយក្រុមបាតុករអ៊ីរ៉ង់បានរៀបចំធ្វើនៅតាមខេត្ត ក្រុងជាង ១៥០ នៅទូទាំងពិភពលោកតាំងពីក្នុងក្រុងតូក្យូដល់ក្រុង San Francisco ដោយឆ្លងកាត់ក្រុងឡុងដ៏។ ក្រៅពីជនបរទេស បាតុកម្ម និងការជួបជុំក៏មានការចូលរួមពីពលរដ្ឋអ៊ីរ៉ង់នៅបរទេសដែរ។ ក្នុងទីក្រុងរ៉ូម ប្រទេសអ៊ីតាលី មានបាតុករប្រមាណជា ១ ០០០នាក់បានដើរដង្ហែរក្បួនដោយមានការវាយស្គរ។ « យើងទាមទារយុត្តិធម៌ឲ្យនារីម៉ាសា អាមីនី និងជនរងគ្រោះទាំងអស់ពីអំពើហិង្សាយ៉ាងព្រៃផ្សៃរបស់រដ្ឋអំណាច » នេះជាការថ្លែងរបស់បាតុករស្រ្តីម្នាក់ឈ្មោះស៊ីម៉ូណា វីយ៉ូឡា។
នៅក្នុងទីក្រុងតូក្យូ ប្រទេសជប៉ុន ក្រុមបាតុករបានកាន់រូបថតស្រ្តីដុតកន្សែងបិទមុខ ឬកំពុងកាត់សក់ រួមទាំងកាន់បដាសរសេរថា « យើងនឹងមិនឈប់ទេ »។ នៅក្នុងប្រទេសអ៊ីរ៉ង់ឯណោះ ក្រុមសិស្ស និស្សិតបានដង្ហែរក្បួនបាតុកម្មនៅក្នុងខេត្ត ក្រុងជាច្រើននាថ្ងៃសៅរ៍ ទី០១ តុលា។ គួរបញ្ជាក់ថាតាំងពីថ្ងៃផ្ទុះបាតុកម្មដំបូង កម្លាំងប៉ូលិសមិនញញើតប្រើកម្លាំងបង្រ្កាបក្រុមបាតុករយ៉ាងហិង្សា។ តាមទីភ្នាក់ងារអ៊ីរ៉ង់ Fars មានមនុស្សស្លាប់ប្រមាណ ៦០នាក់តាំងពីថ្ងៃផ្ទុះបាតុកម្មដំបូង។ តែតាមអង្គការក្រៅរដ្ឋាភិបាល Iran Human Rights មានស្លាប់យ៉ាងតិច ៨៣នាក់។ ចំណែក Amnesty International បានបរិហារលើការប្រើអំពើហិង្សាគ្មានមេត្តារបស់កម្លាំងប៉ូលិសលើបាតុករ។
ដោយឡែក រដ្ឋអំណាចអ៊ីរ៉ង់បានចោទក្រុមបាតុករពីបទសាបព្រោះភាពវឹកវរ និងបានប្រកាសពីការឃាត់ខ្លួនបានជនបរទេសចំនួន ៩នាក់ ក្នុងនោះមានជនជាតិអាល្លឺម៉ង់ ប៉ូឡូញ អ៊ីតាលី បារាំង ហូឡង់ និងស៊ុយអែត។ តាមរដ្ឋាភិបាលក្រុងតេហេរ៉ង់ ជនបរទេសទាំងនេះត្រូវបានចាប់ខ្លួននៅកន្លែងធ្វើបាតុកម្ម ឬមួយក៏បានចូលរួមជួយឈឺឆ្អាលនឹងបាតុកម្ម។ តែគេមិនអាចផ្ទៀងផ្ទាត់លើព័ត៌មានមួយនេះបានទេ។ ចំណែកក្រសួងការបរទេសហូឡង់បានបញ្ជាក់ក្នុងថ្ងៃសៅរ៍ ទី១ តុលាថា ខ្លួនបានសុំរដ្ឋអំណាចអ៊ីរ៉ង់ដើម្បីជួបពលរដ្ឋហូឡង់ដែលបានចាប់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ