NGO៖មានមនុស្សស្លាប់យ៉ាងតិច ៧៦នាក់នៅក្នុងព្រឹត្តិការណ៍បង្រ្កាបបាតុករអ៊ីរ៉ង់
នៅក្នុងប្រទេសអ៊ីរ៉ង់ ក្បួនបាតុកម្មបាន និងកំពុងបន្តមានយ៉ាងផុសផុល ក្រោយការស្លាប់នារីវ័យក្មេងម្នាក់ឈ្មោះម៉ាសា អាមីនីកាលពី ១០ថ្ងៃមុន។ កំហឹងរបស់បាតុករប្រឆាំងនឹងមរណភាពនារីម៉ាសា អាមីនីកំពុងបន្តរងការវាយបង្រ្កាបយ៉ាងហិង្សាពីកម្លាំងប៉ូលិស។ តាមអង្គការក្រៅរដ្ឋាភិបាលឈ្មោះ Iran Human Rights ដែលមានមូលដ្ឋានក្នុងទីក្រុងអូស្លូ ប្រទេសន័រវែស មានមនុស្សស្លាប់យ៉ាងតិច ៧៦នាក់ ក្នុងនោះមានស្រ្តី ៦នាក់ និងកូនក្មេង ៤នាក់នៅក្នុងព្រឹត្តិការណ៍បង្រ្កាបបាតុករនៅក្នុង ១៤ខេត្ត ក្រុងនៅទូទាំងប្រទេស។ អាមេរិក និងសហភាពអឺរ៉ុបបានថ្កោលទោសលើការប្រើកម្លាំងបង្រ្កាបលើក្រុមបាតុករ។
ចុះផ្សាយនៅថ្ងៃ៖
ស្តាប់ - ០២:៣០
ព្រឹត្តិការណ៍បះបោរប្រឆាំងរដ្ឋាភិបាលនៅអ៊ីរ៉ង់បានចាប់ផ្តើមក្នុងថ្ងៃទី១៦ កញ្ញា ពោលក្រោយមរណភាពរបស់នារីម៉ាសា អាមីនីនៅក្នុងមន្ទីរពេទ្យ។ គួររម្លឹកថាមានអាយុ ២២ឆ្នាំ នារីម៉ាសា អាមីនីត្រូវបានប៉ូលិសសីលធម៌ចាប់ខ្លួននាថ្ងៃទី ១៣ កញ្ញានៅសួនច្បារមួយក្នុងទីក្រុងតេហេរ៉ង់ក្រោមបទចោទប្រកាន់ពីការស្លៀកពាក់មិនសមរម្យតាមច្បាប់សាសនាអ៊ីស្លាម។ ប្រឈមនឹងភាពខឹងសម្បាររបស់ពលរដ្ឋ ប្រធានាធិបតីលោកអេប្រាហ៊ីម រ៉ៃស៊ីបានសន្យាបើកការស៊ើបអង្កេតដើម្បីស្វែងរកការពិត។ តែលោកអេប្រាហ៊ីម រ៉ៃស៊ីក៏បានលើកឡើងថា របាយការណ៍របស់គ្រូពេទ្យមិនបានរកឃើញពីការធ្វើទារុណកម្មរបស់ប៉ូលិសលើនារីម៉ាសា អាមីនីរហូតដល់ស្លាប់ឡើយ។
តាំងពីថ្ងៃទី១៦ កញ្ញា ពលរដ្ឋបន្តចុះផ្លូវធ្វើបាតុកម្មនៅរៀងរាល់យប់ក្នុងក្រុងតេហេរ៉ង់ និងនៅកន្លែងផ្សេងទៀតនៅទូទាំងប្រទេស។ « ស្លាប់ទៅមេដឹកនាំផ្តាច់ការ » នេះជាសម្រែករបស់ក្រុមបាតុករដោយមានការហែករូបថតមេដឹកនាំសាសនាអ៊ីស្លាមលោកអាលី ខាមេណី។ តែក្រុមបាតុករត្រូវបានកម្លាំងប៉ូលិសវាយបង្រ្កាបយ៉ាងហិង្សាដោយវាយនឹងដំបង ប្រើឧស្ម័នបាញ់បង្ហូរទឹកភ្នែក និងមានការបាញ់គ្រាប់សំណ រួមទាំងបាញ់គ្រាប់ពិតទៅលើហ្វូងបាតុករដែលចោលដុំថ្ម ដុតឡានប៉ូលិស និងដុតអាគារសាធារណៈជាដើម។ តាមតួលេខរបស់រដ្ឋាភិបាល មានមនុស្សស្លាប់ ៤១នាក់ និងចាប់ខ្លួនជាង ១ ២០០នាក់។
តែអង្គការក្រៅរដ្ឋាភិបាលឈ្មោះ Iran Human Rights បានលើកឡើងពីចំនួនអ្នកស្លាប់យ៉ាងតិច ៧៦នាក់។ ចំណែកគណៈកម្មាធិការការពារអ្នកកាសែតបានបញ្ជាក់ក្នុងថ្ងៃចន្ទ ទី២៦ កញ្ញាថា មានអ្នកកាសែតអ៊ីរ៉ង់ចំនួន ២០នាក់ត្រូវបានចាប់ខ្លួនគិតតាំងពីថ្ងៃទី១៦ កញ្ញា។ សហភាពអឺរ៉ុបបានបរិហារពីការប្រើកម្លាំងហួសហេតុ និងគ្មានសមាមាត្ររបស់ប៉ូលិសលើបាតុករ។ ការបរិហារដូចគ្នានេះក៏មានពីប្រធានាធិបតីអាមេរិកលោកបៃដិន និងបានបញ្ជាក់ពីសាមគ្គីភាពជាមួយស្រ្តីក្លាហានអ៊ីរ៉ង់។ ចំណែកបារាំងបានប្រាប់ក្នុងយប់ថ្ងៃចន្ទ ទី២៦ កញ្ញាថា ខ្លួននឹងពិនិត្យជាមួយដៃគូអឺរ៉ុបលើវិធានការដើម្បីឆ្លើយតបនឹងការរំលោភសិទ្ធិស្រ្តី និងសិទ្ធិមនុស្សនៅអ៊ីរ៉ង់។ នៅអាល្លឺម៉ង់ ក្រុងប៊ែរឡាំងបានអំពាវនាវឲ្យអ៊ីរ៉ង់កុំប្រើអំពើហិង្សាលើក្រុមបាតុករ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ