អ៊ីរ៉ង់ប្រកាសផលិត ជាលើកទីមួយ មីស៊ីលអ៊ីពែរសូនិក
នៅថ្ងៃព្រហស្បតិ៍ទី ១០វិច្ឆិកានេះ អ៊ីរ៉ង់បានអះអាងថា ផលិតបានសម្រេចមីស៊ីលអ៊ីពែរសូនិក ដែលអាចយកឈ្នះលើប្រព័ន្ធខែលមីស៊ីលគ្រប់ប្រភេទទាំងអស់។ សេចក្តីប្រកាសរបស់អ៊ីរ៉ង់ បានជំរុញឱ្យទីភ្នាក់ងារថាមពលបរមាណូអន្តរជាតិ (AIEA) ព្រួយបារម្ភយ៉ាងខ្លាំង ព្រោះពេលនេះកិច្ចចរចាស្តីអំពីកម្មវិធីនុយក្លេអ៊ែរអ៊ីរ៉ង់ កំពុងជាប់គាំងស្តូក។
ចុះផ្សាយនៅថ្ងៃ៖
ស្តាប់ - ០២:១៥
អាចហោះហើរក្នុងរយៈកម្ពស់ទាប លើផ្ទៃបរិយាកាស អាចបត់បែនប្តូរទិស ដែលជាហេតុធ្វើឱ្យគេពិបាកចាប់សញ្ញានិងកម្ចាត់ ព្រមទាំងអាចបង្កើនល្បឿនឡើងរហូតដល់លើស ៦ពាន់គីឡូម៉ែត្រក្នុងម៉ោង (លឿនជាងសំឡេងដល់ទៅ ៥ដង) មីស៊ីលបាលីស្ទិកអ៊ីពែរសូនិកអ៊ីរ៉ង់ អាចជំនះលើគ្រប់ប្រព័ន្ធខែលមីស៊ីលប្រឆាំងមីស៊ីលទាំងអស់។ នេះបើតាមការអះអាងរបស់ឧត្តមសេនីយ៍ Amirali Hajizadesh មេបញ្ជាការកងកម្លាំងទ័ពអវកាស នៃកងឆ្មាំបដិវត្តអ៊ីរ៉ង់។ ឧត្តមសេនីយ៍ដដែលនេះ បានអួតអាងទៀតថា គេទំនងត្រូវការពេលវេលាជាច្រើនទសវត្សរ៍ទៀត ទើបអាចរកបច្ចេកវិទ្យា មកទប់ទល់នឹងមីស៊ីលអ៊ីពែរសូនិកអ៊ីរ៉ង់បាន។
សេចក្តីប្រកាសនេះ ជាការពង្រឹងក្តីព្រួយបារម្ភជុំវិញបញ្ហានុយក្លេអ៊ែរអ៊ីរ៉ង់ ប៉ុន្តែ សម្រាប់នាយកទីភ្នាក់ងារថាមពលបរមាណូអន្តរជាតិ AIEA លោករ៉ាហ្វាអែល ហ្កូស៊ី វាគ្មានឥទ្ធិពលលើការចរចាជុំវិញកម្មវិធីនុយក្លេអ៊ែរអ៊ីរ៉ង់ទេ។ ជាប់គាំងស្តូក ក្រោយការដកខ្លួនជាឯកតោភាគីរបស់អាមេរិកក្រោមអាណត្តិលោកដូណាល់ ត្រាំ កាលពីឆ្នាំ២០១៨ ក្រុមបស្ចិមលោកបានព្យាយាមតាំងពីជាងមួយឆ្នាំមកហើយ ល្បួងឱ្យអ៊ីរ៉ង់ត្រលប់មកគោរពកិច្ចព្រមព្រៀងអន្តរជាតិឆ្នាំ២០១៥ ដែលរារាំងមិនអ៊ីរ៉ង់មានអាវុធនុយក្លេអ៊ែរជាថ្នូរនឹងការលើទណ្ឌកម្មសេដ្ឋកិច្ច។
ការចរចាគ្មានសញ្ញាវិជ្ជមានហើយ អ៊ីរ៉ង់បានប្រកាស កាលពីថ្ងៃទី ៥ វិច្ឆិកា សាកល្បងដោយជោគជ័យការបាញ់កាំជ្រួចពាំផ្កាយរណបទៅក្នុងអវកាស ដែលរដ្ឋាភិបាលប្រទេសលោកខាងលិចសង្ស័យថាមានបញ្ចូលបច្ចេកវិទ្យាដែលអាចប្តូរទៅជាការពាំក្បាលនុយក្លេអ៊ែរបាន។ ហើយនៅថ្ងៃនេះ អ៊ីរ៉ង់ប្រកាសផលិតមីស៊ីលអ៊ីពែរសូនិកបានទៀត។
ក្រៅអំពីអ៊ីរ៉ង់ រុស្ស៊ី កូរ៉េខាងជើង និងសហរដ្ឋអាមេរិក ធ្លាប់បានប្រកាសសាកល្បងមីស៊ីលអ៊ីពែរសូនិក កាលពីឆ្នាំ២០២១។ រុស្ស៊ីដែលនាំមុខគេខ្លាំងតាំងពីយូរនោះ បានប្រកាសប្រើមីស៊ីលអ៊ីពែរសូនិក Kinjal ក្នុងអំឡុងពេលពីរបីសប្តាហ៍ដំបូងនៃប្រតិបត្តិការយោធារុស្ស៊ីនៅអ៊ុយក្រែន។ ចិនក៏មានគម្រោងមីស៊ីលអ៊ីពែរសូនិកដែរ ដែលទំនងជាយកគំរូតាមកម្មវិធីរបស់រុស្ស៊ី។ នេះបើការសិក្សារបស់មជ្ឈមណ្ឌលស្រាវជ្រាវសភាអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ