អ៊ីរ៉ង់ ប្រហារជីវិតជាសាធារណៈមនុស្សម្នាក់មានពាក់ព័ន្ធនឹងបាតុកម្ម
ទោះបីជាមានសម្រែកប្រឆាំងនឹងទោសប្រហារជីវិតមនុស្សពាក់ព័ន្ធនឹងបាតុកម្មដែលអង្រួនប្រទេសតាំងពីបីខែមកយ៉ាងណាក៏ដោយ ក៏អាជ្ញាធរអ៊ីរ៉ង់ធ្វើមិនឮ ហើយថែមទាំងបានសម្រេចចិត្តប្រហារជីវិតជាសាធារណៈជាលើកទីមួយតែម្តង។ នៅថ្ងៃចន្ទទី ១២ ធ្នូ នេះ អ៊ីរ៉ង់បានព្យួរ-ក មនុស្សម្នាក់ដែលមានពាក់ព័ន្ធនឹងចលនាបាតុកម្មប្រឆាំង នៅកណ្តាលវាល។
ចុះផ្សាយនៅថ្ងៃ៖
ស្តាប់ - ០១:៥៦
នេះជាករណីប្រហារជីវិតទីពីរ លើអ្នកទោសមានពាក់ព័ន្ធនឹងចលនាបាតុកម្មប្រឆាំងដែលផ្ទុះឡើងក្រោយការស្លាប់របស់និស្សិតស្រីវ័យ២២ឆ្នាំ ក្នុងដៃប៉ូលិសសីលធម៌ ពីបទមិនបានពាក់ស្បៃរុំក្លាយត្រឹមត្រូវមក។ កាលពីថ្ងៃព្រហស្បតិ៍ តុលាការអ៊ីរ៉ង់បានព្យួរក បុរសវ័យ២៣ឆ្នាំម្នាក់ ពីបទបានវាយប្រហារលើកងស្វ័យត្រានឱ្យរងរបួសម្នាក់ រួចមកហើយ ដែលធ្វើឱ្យសហគមន៍អន្តរជាតិផ្ទុះកំហឹងយ៉ាងខ្លាំង។
ប៉ុន្តែការប្រហារជីវិតនៅថ្ងៃចន្ទនេះ ប្រព្រឹត្តទៅជាលើកដំបូង ជាសាធារណៈ។ ម៉ាជីដ្រេហ្សា រ៉ាណាវាដ Majidreza Rahnavard ត្រូវបានតុលាការក្រុងម៉ាឆាដ ដែលស្ថិតនៅភាគឦសានប្រទេសអ៊ីរ៉ង់ កាត់ទោសប្រហារជីវិត ពីបទបានសម្លាប់កងរក្សាសន្តិសុខពីរនាក់ ដោយព្យួរក ជាសាធារណៈ មិនមែនព្យួរក នៅក្នុងពន្ធនាគារទេ។ មានអាយុប្រហែល២៣ឆ្នាំ រ៉ាណាវាដ ត្រូវចាប់ខ្លួនបាន កាលពីថ្ងៃទី ១៩វិច្ឆិកា នៅពេលប៉ុនប៉ងរត់គេចពីប្រទេស។ នេះបើតាមប្រភពរបស់ស្ថាប័នយុត្តិធម៌អ៊ីរ៉ង់ដដែល។
អាជ្ញាធរយុត្តិធម៌អ៊ីរ៉ង់ បានអះអាងថា បានកាត់ទោសប្រហារជីវិតអ្នកពាក់ព័ន្ធនឹងចលនាបាតុកម្ម ដែលអាជ្ញាធរចាត់ទុកជាទង្វើកុបកម្មប្រឆាំងរដ្ឋាភិបាល មានចំនួនសរុប១១នាក់ គិតត្រឹមពេលនេះ។ ហើយមានសកម្មជនជាង១០នាក់ផ្សេងទៀតកំពុងស្ថិតក្នុងបទចោទប្រកាន់ដែលក៏នឹងអាចទទួលទោសប្រហារជីវិតដែរ ក្នុងចំណោមនោះអាចមានពីរនាក់អ្នកចម្រៀងរ៉ាប់ ប្រសូតចេញពីសហគមន៍ជនភាគតិចគួដឌីស្ថានផង។
កាលពីចុងសប្តាហ៍កន្លងទៅ ក្រុមអង្គការការពារសិទ្ធិមនុស្សជាច្រើនបានព្រមានឱ្យដឹងថា អ្នករងការចាប់ខ្លួនបានពេលកំពុងធ្វើបាតុកម្មច្រើននាក់កំពុងរង់ចាំការប្រហារជីវិត។ មហាន សាដ្រាត អាយុ២២ឆ្នាំ កាត់ទោសរួចកាលពីថ្ងៃ៣វិច្ឆិកា បានបញ្ជូនចេញទៅពន្ធនាគារជិតក្រុងតេហេរ៉ង់ កាលពីថ្ងៃសៅរ៍ទំនងដើម្បីត្រៀមប្រហារជីវិតហើយ។ នេះបើតាមអង្គការAmnesty International ដែលបន្ថែមថា យុវជនម្នាក់ទៀត ក៏កំពុងស្ថិតក្នុងគ្រោះថ្នាក់ស្លាប់ដែរ ព្រោះតុលាការបានសម្រេចដាក់ទោសប្រហារជីវិត កាលពីថ្ងៃ ទី ៦វិច្ឆិកា។
ដោយមិនរាប់ចិន និងសម្រាប់Amnesty International អ៊ីរ៉ង់ជាប្រទេសប្រហារជីវិតអ្នកទោសច្រើនជាងគេ។ ជាង៥០០នាក់ នៅឆ្នាំ២០២២ នេះបើតាមក្រុមការពារសិទ្ធិមនុស្ស Humain Rightsអ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ