ប្រទេសអ៊ីរ៉ង់សង្ឃឹមចង់មានទំនាក់ទំនងប្រក្រតីជាមួយប្រទេសអារ៉ាប៊ីសាអូឌីតឡើងវិញ
រដ្ឋមន្រ្តីក្រសួងការបរទេសអ៊ីរ៉ង់លោកហូសេន អាមៀរ អាប់ដូឡាហៀនបានបំពេញទស្សនកិច្ចនៅក្នុងប្រទេសលីបង់នាថ្ងៃសុក្រ ទី១៣ មករា។ ថ្លែងនៅក្នុងសន្និសីទកាសែតរួមជាមួយសមភាគីលីបង់លោកអាប់ដាឡា ប៊ូហាប៊ីប លោកអាប់ដូឡាហៀនបានសម្តែងក្តីសង្ឃឹមចង់មានទំនាក់ទំនងប្រក្រតីជាមួយប្រទេសអារ៉ាប៊ីសាអូឌីតឡើងវិញ។ ទំនាក់ទំនងប្រក្រតីដែលអ៊ីរ៉ង់ចង់បាន គឺបើកទ្វារស្ថានទូតប្រចាំប្រទេសរៀងៗខ្លួនជាថ្មី ក្រោយពីបានបិទទ្វារអស់រយៈពេល ៧ឆ្នាំ។
ចុះផ្សាយនៅថ្ងៃ៖
ស្តាប់ - ០២:១៥
តាំងពី ៧ឆ្នាំដែលអ៊ីរ៉ង់និកាយឈីអ៊ីត និងអារ៉ាប៊ីសាអូឌីតនិកាយស៊ុយនីតបានផ្តាច់ទំនាក់ទំនងផ្លូវទូតរវាងគ្នា។ មូលហេតុកាលណោះ ក្រុមបាតុករអ៊ីរ៉ង់បានវាយប្រហារលើស្ថានទូតអារ៉ាប៊ីសាអូឌីតប្រចាំអ៊ីរ៉ង់ដើម្បីប្រឆាំងនឹងអារ៉ាប៊ីសាអូឌីតដែលបានប្រហារជីវិតមន្រ្តីសាសនាអ៊ីស្លាមនិកាយឈីអីតម្នាក់។ គឺទើបតែនៅពាក់កណ្តាលឆ្នាំ ២០២២ កន្លងទៅថ្មីៗនេះដែលប្រទេសទាំងពីរបានចាប់ផ្តើមនិយាយគ្នាចុងមាត់ចុងកឡើងវិញ។ ជំនួបចុងក្រោយ គឺជំនួបយ៉ាងខ្លីថ្នាក់ប្រមុខការទូតរវាងប្រទេសពីរក្នុងខែធ្នូ ឆ្នាំ ២០២២ នាឱកាសកិច្ចប្រជុំតំបន់រៀបចំក្នុងប្រទេសហ្សកដានី។
ឥឡូវនេះនាឱកាសបំពេញទស្សនកិច្ចក្នុងប្រទេសលីបង់ ប្រមុខការទូតអ៊ីរ៉ង់លោកហូសេន អាមៀរ អាប់ដូឡាហៀនបានថ្លែងថា អ៊ីរ៉ង់សង្ឃឹម និងស្វាគមន៍ពីការភ្ជាប់ទំនាក់ទំងការទូតតាមរយៈការបើកទ្វារស្ថាទូតជាមួយអារ៉ាប៊ីសាអូឌីតឡើងវិញ។ ការថ្លែងរបស់លោកអាប់ដូឡាហៀនបានធ្វើឡើង ចំពេលដែលអ៊ីរ៉ង់កំពុងពុះកញ្ជ្រោលដោយរលកបាតុកម្មមហាជនប្រឆាំងរដ្ឋាភិបាលតាំងពីពាក់កណ្តាលខែកញ្ញាឆ្នាំទៅមិញ។ ក្រុងតេរ៉ង់បានចោទសត្រូវបរទេសដឹកនាំដោយអាមេរិកពីបទអុជអាល គាំទ្របាតុករអ៊ីរ៉ង់ និងលើកឡើងពីតួនាទីរបស់អារ៉ាប៊ីសាអូឌីតក្នុងការផ្តល់លុយឲ្យបណ្តាញសារព័ត៌មាននៅបរទេសដែលប្រឆាំងអ៊ីរ៉ង់។
ក្នុងខែវិច្ឆិកាកន្លងទៅ អ៊ីរ៉ង់បានស្នើឲ្យអារ៉ាប៊ីសាអូឌីតប្តូរឥរិយាបទអមិត្ត និងព្រមានសងសឹកនឹងក្រុមប្រទេសជិតខាងដែលប៉ុនប៉ងបង្កអស្ថិរភាពនៅអ៊ីរ៉ង់។ គេនៅមិនទាន់ដឹងថា តើអារ៉ាប៊ីសាអូឌីតមានចម្លើយយ៉ាងម៉េចចំពោះអ៊ីរ៉ង់ដែលសង្ឃឹមចង់មានទំនាក់ទំនងប្រក្រតីឡើងវិញពេលនេះទេ។ តែគេមិនត្រូវភ្លេចនិយាយថា ប្រទេសទាំងពីរអ៊ីរ៉ង់និកាយឈីអីត និងអារ៉ាប៊ីសាអូឌីតនិកាយស៊ុយនីតមានទម្ងន់ធ្ងន់ជាងគេ និងបានគាំទ្រភាគីជម្លោះមិនដូចគ្នានៅក្នុងជម្លោះជាច្រើននៅក្នុងតំបន់ ពិសេសនៅយេមែន។ ខណៈដែលអារ៉ាប៊ីសាអូឌីតបានគាំទ្ររដ្ឋាភិបាលយេមែន អ៊ីរ៉ង់បានគាំទ្រក្រុមឧទ្ទាមហ៊ូទីដែលជាក្រុមប្រឆាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ