អារ៉ាប៊ីសាអូឌីតមិនភ្ជាប់ទំនាក់ទំនងប្រក្រតីជាមួយអ៊ីស្រាអែលដោយគ្មានរដ្ឋប៉ាឡេស្ទីន
អារ៉ាប៊ីសាអូឌីតមិនចងមេត្រីភាពជាប្រក្រតីជាមួយនឹងអ៊ីស្រាអែល ដោយគ្មានលក្ខខណ្ឌបង្កើតរដ្ឋប៉ាឡេស្ទីនទេ។ នេះជាសេចក្តីប្រកាសរបស់រដ្ឋមន្ត្រីក្រសួងការបរទេសអារ៉ាប៊ីសាអូឌីត នៅថ្ងៃសុក្រទី ២០មករា ក្រោយពីបានឮអ៊ីស្រាអែលអំពាវនាវចង់ពង្រីកកិច្ចព្រមព្រៀងភ្ជាប់ទំនាក់ទំនងជាធម្មតា ជាមួយក្រុមប្រទេសអារ៉ាប់ នៅពេលជួបពិភាក្សាជាមួយទីប្រឹក្សាសន្តិសុខអាមេរិក។
ចុះផ្សាយនៅថ្ងៃ៖
ស្តាប់ - ០២:១២
នៅក្នុងសារវីដេអូ ប្រមុខការទូតអារ៉ាប៊ីសាអូឌីត បានប្រកាសថា “ទំនាក់ទំនងប្រក្រតីពិត និងស្ថិរភាពពិត អាចកើតឡើងបានដរាបណាតែប៉ាឡេស្ទីនមាន សង្ឃឹមនិងភាពថ្លៃថ្នូរ ពោលគឺមានរដ្ឋប៉ាឡេស្ទីនមួយនឹងគេ”។
ជាប្រទេសនាំចេញប្រេងឆៅលំដាប់ទីមួយពិភពលោក និងជាប្រទេសមានសេដ្ឋកិច្ចខ្លាំងជាងគេបំផុតក្នុងតំបន់ អារ៉ាប៊ីសាអូឌីត ជាដៃគូដ៏ស្និទ្ធនឹងអាមេរិកមែន តែបដិសេធមិនចងស្ពានមេត្រីភាពជាធម្មតាជាមួយអ៊ីស្រាអែល ព្រោះតែអ៊ីស្រាអែលបានចូលឈ្លានពាន នៅឆ្នាំ១៩៦៧ និងបន្តធ្វើអាណានិគមកិច្ចលើដែនដីប៉ាឡេស្ទីនតាំងពីពេលនោះមក។ នេះជាជំហរជាប្រវត្តិសាស្ត្ររបស់អារ៉ាប៊ីសាអូឌីត -របស់ព្រះចៅសាល់ម៉ានដ៏ចាស់ជរា ដែលគេតែងចោទសួរថានឹងអាចមានការប្រែប្រួលដែរឬទេនៅពេលរាជបុត្រម៉ូហាមេតបេនសាល់ម៉ានឡើងស្នងរាជ ? នៅថ្ងៃនេះ ចម្លើយរបស់រីយ៉ាដ ជាការបញ្ជាក់ជំហររបស់ខ្លួនជាថ្មី។
រីយ៉ាដមិនប្រឆាំងនឹងកិច្ចព្រមព្រៀងAbraham ផ្តួចផ្តើមដោយសហរដ្ឋអាមេរិក ដែលបានចុះហត្ថលេខាកាលពីចុងឆ្នាំ២០២០ ភ្ជាប់ទំនាក់ទំនងប្រក្រតីរវាងអ៊ីស្រាអែលនិងបណ្តាប្រទេសអារ៉ាប់ជាច្រើន ខ្លះនៅតំបន់ឈូងសមុទ្ទពែក្ស ស្និទ្ធនឹងអារ៉ាប៊ីសាអូឌីត មានជាអាទិ៍បារ៉ែន និងអេមីរ៉ាតអារ៉ាប់រួមផង។ ប៉ុន្តែអារ៉ាប៊ីសាអូឌីត បានលើកឡើងដដែលៗជាច្រើនលើកច្រើនសាថា ការគោរពសិទ្ធិពលរដ្ឋប៉ាឡេស្ទីន ជាលក្ខខណ្ឌដ៏ចាំបាច់ សម្រាប់អារ៉ាប៊ីសាអូឌីតចុះហត្ថលេខាចងមេត្រីភាពជាមួយអ៊ីស្រាអែល។
កាលពីពីរទសវត្សរ៍មុន អារ៉ាប៊ីសាអូឌីតបានលើកសំណើភ្ជាប់ទំនាក់ទំនងប្រក្រតីរវាងអ៊ីស្រាអែលជាមួយប្រទេសក្នុងសម្ព័ន្ធអារ៉ាប់តែម្តង ជាថ្នូរនឹងការបង្កើតរដ្ឋប៉ាឡេស្ទីនមានព្រំដែនដូចឆ្នាំ១៩៦៧ និងហ្សេរុយសាឡិមជារដ្ឋធានី។ សំណើអារ៉ាប៊ីសាអូឌីតបានបាំងបិទទៅវិញដោយកិច្ចព្រមព្រៀងAbraham។
ចំណែកលោកនាយករដ្ឋមន្ត្រីអ៊ីស្រាអែល នេតាន់យ៉ាហ៊ូ យល់ផ្ទុយទៅវិញថា ទំនាក់ទំនងប្រក្រតីជាមួយអារ៉ាប៊ីសាអូឌីតនឹងសម្រួលឱ្យមានកិច្ចព្រមព្រៀងសន្តិភាពអ៊ីស្រាអែល-ប៉ាឡេស្ទីន។ កាលពីថ្ងៃព្រហស្បតិ៍ ក្នុងឱកាសជួបជជែកជាមួយទីប្រឹក្សាសន្តិសុខជាតិអាមេរិក លោក ចេក ស៊ូលីវ៉ាន់ លោកនេតាន់យ៉ាហ៊ូបានលើកអំពីលទ្ធភាពនៃការពង្រីកកិច្ចព្រមព្រៀងAbraham ដែលសំដៅលើកៀងគអារ៉ាប៊ីសាអូឌីត។ ឯលោកស៊ូលីវ៉ាន់ បានរំលឹកពី ការជំទាស់របស់វ៉ាស៊ីនតោននូវចំណុចណាដែលរារាំងដល់ការបង្កើតរដ្ឋប៉ាឡេស្ទីន។ នេះបើតាមសេតវិមាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ