អ៊ីរ៉ង់បានបញ្ជាក់ពីការរួចផុតពីការវាយប្រហារដោយដ្រូនលើទីតាំងយោធាមួយ
នៅក្នុងប្រទេសអ៊ីរ៉ង់ ក្រសួងការពារជាតិបានបញ្ជាក់ក្នុងយប់ថ្ងៃសៅរ៍ឆ្លងចូលថ្ងៃអាទិត្យ ទី២៩ មករាពីការធ្វើអន្តរាគមន៍ទាន់ពេលលើការវាយប្រហារដោយដ្រូនសំដៅទីតាំងយោធាមួយ។ តែរដ្ឋអំណាចមិនបានលំអិតអ្វីបន្ថែមឲ្យបានច្រើនជាងនេះទេ ពិសេសពីសកម្មភាពនៅទីតាំងយោធានោះ។ អ្វីដែលគេអាចនិយាយបាន ដំណឹងនេះបានធ្លាក់មកចំពេលដែលបាតុកម្មរបស់មហាជនប្រឆាំងរដ្ឋាភិបាលកំពុងបន្តមានតាំងពីពាក់កណ្តាលខែកញ្ញា ឆ្នាំ ២០២២។
ចុះផ្សាយនៅថ្ងៃ៖
ស្តាប់ - ០២:២២
តាមទីភ្នាក់ងារសារព័ត៌មានអ៊ីរ៉ង់ឈ្មោះអៀណាដែលបានដកស្រង់ព័ត៌មានពីក្រសួងការពារជាតិ ការវាយប្រហារដោយប្រើដ្រូនលើទីតាំងយោធាមួយក្នុងខេត្ត Ispahan នៅយប់ជ្រៅក្នុងថ្ងៃសៅរ៍ ទី២៨ មករាបានទទួលបរាជ័យ។ ការទទួលបរាជ័យនេះត្រូវបានក្រសួងការពារជាតិលំអិតថា មានដ្រូនមួយគ្រឿងត្រូវបានបាញ់កម្ទេចដោយប្រព័ន្ធការពារដែនអាកាស និងដ្រូនចំនួនពីរគ្រឿងទៀតបានផ្ទុះឆេះអស់។ តាមក្រសួងការពារជាតិដដែល អន្តរាគមន៍បាញ់ទម្លាក់ដ្រូននេះបានបង្កឲ្យមានការខូចខាតតិចតួចលើដំបូលទីតាំងយោធាដោយមិនប៉ះពាល់ដល់ជីវិតមនុស្សទេ។
ព័ត៌មានដូចគ្នានេះក៏ត្រូវបានបញ្ជាក់ដោយរដ្ឋអំណាចខេត្ត Ispahan លោក Mohammad Reza Jan-Nesari ដែលជាចៅហ្វាយខេត្តរង។ តាមលោក Jan-Nesari ការស៊ើបអង្កេតមួយបានបើកធ្វើឡើងដើម្បីស្វែងរកការពិតជុំវិញការវាយប្រហារដោយប្រើដ្រូនលើទីតាំងយោធានោះ។ តែចៅហ្វាយខេត្តរងរូបនេះដដែលមិនបានលំអិតថា តើទីតាំងយោធានោះជាកន្លែងដែលមានសកម្មភាពអ្វីទេ។ អ្វីដែលគេដឹង Ispahan ជាខេត្តដែលសម្បូរដោយមជ្ឈមណ្ឌលស្រាវជ្រាវនុយក្លេអ៊ែរ។ ទោះជាយ៉ាងនេះក្តី មានការកត់សម្គាល់ចំនួនពីរនៅក្នុងព្រឹត្តិការណ៍វាយប្រហារមិនបានសម្រេចដោយដ្រូនលើទីតាំងយោធាពេលនេះ។
ទី១ វាបានកើតមានឡើងក្នុងពេលដែលបាតុកម្មមហាជនប្រឆាំងរដ្ឋាភិបាលកំពុងបន្តមានតាំងពីពាក់កណ្តាលខែកញ្ញា ឆ្នាំ ២០២២ ពោលបន្ទាប់ពីការស្លាប់កញ្ញាម៉ាសា អាមីនីនៅក្រោយការចាប់ខ្លួនរបស់ប៉ូលិសសីលធម៌ និងទី២ វាបានកើតមានឡើងចំពេលដែលការចរចាជុំវិញកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥ ជាមួយសហគមន៍អន្តរជាតិកំពុងបន្តជាប់គាំង។ ការជាប់គាំងនេះបានកើតឡើងនៅក្រោយអាមេរិកក្នុងជំនាន់ប្រធានាធិបតីលោកត្រាំបានដកខ្លួនចេញក្នុងឆ្នាំ ២០១៨។ កន្លងមក អ៊ីរ៉ង់តែងចោទអ៊ីស្រាអែលដែលជាសត្រូវស៊ូពូជរបស់ខ្លួនពីបទវាយប្រហារដោយសម្ងាត់លើទឹកដីអ៊ីរ៉ង់។
តែទោះជាយ៉ាងនេះក្តី អ៊ីរ៉ង់នៅមិនទាន់ចង្អុលមុខអ្នកណាម្នាក់លើការវាយប្រហារដោយដ្រូនមិនបានជោគជ័យលើទីតាំងយោធារបស់ខ្លួនពេលនេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ