រញ្ជួយដី ៖ ហេតុអ្វីសហគមន៍អន្តរជាតិពិបាកផ្តល់ជំនួយដល់ស៊ីរី ?
បើតាមអង្គការសុខភាពពិភពលោក រញ្ជួយដីដ៏កំណាចនៅតួកគីនេះនឹងធ្វើឱ្យប៉ះពាល់ដល់ប្រជាពលរដ្ឋប្រមាណ២៣លាននាក់ ក្នុងនោះ៥លាននាក់ជាជនងាយរងគ្រោះធ្ងន់ធ្ងរខ្លាំង។ អង្គការបានសន្យាផ្តល់ការគាំទ្រសម្រាប់រយៈពេលវែង។ សម្រាប់ពេលនេះ ជំនួយអន្តរជាតិ ចាប់ផ្តើមទៅដល់កន្លែងកើតហេតុណ៍នៅតួកគីនិងស៊ីរីជាបណ្តើរៗហើយ មានជាអាទិ៍ក្រុមសង្គ្រោះ បារាំង កាតា ... ប្រធានាធិបតីអាមេរិកបានសន្យាជាមួយសមភាគីតួកគីផ្តល់ជំនួយចាំបាច់គ្រប់យ៉ាង។ បើតាមលោកប្រធានាធិបតីតួកគី ៤៥ប្រទេសបានឆ្លើយតបនឹងសេចក្តីអំពាវនាវសុំជំនួយពីអន្តរជាតិរបស់តួកគី។ ចុះស៊ីរីវិញ មិនត្រូវការជំនួយពីសហគមន៍អន្តរជាតិទេឬ ? រដ្ឋាភិបាលស៊ីរី បានចេញសេចក្តីអំពាវនាវភ្លាមដែរ ប៉ុន្តែការបញ្ជូនជំនួយទៅស៊ីរី កំពុងតែប្រឈមនឹងបញ្ហាឈឺក្បាលមួយ គឺបញ្ហាការទូត និងភូមិសាស្រ្តនយោបាយ។
ចុះផ្សាយនៅថ្ងៃ៖
ស្តាប់ - ០២:៣៦
ប៉ុន្មានក្រោយមហន្តរាយរញ្ជួយដីសហគមន៍អន្តរជាតិបានប្រមូលផ្តុំជំនួយបន្ទាន់សម្រាប់តួកគីភ្លាម។ អន្តរជាតិសន្យាជួយជនរងគ្រោះស៊ីរីដែរ តែមិនមែនជាយន្តការបន្ទាន់ទេ។ ភាពខុសគ្នានេះបណ្តាលមកពីបញ្ហាភូមិសាស្ត្រនយោបាយនិងការទូត។
តាំងពីឆ្នាំ២០១១មក រដ្ឋាភិបាលស៊ីរី ដឹកនាំដោយលោក បាស្ហាអាល់អាសាដ បានជាប់ទណ្ឌកម្មអន្តរជាតិ និងដាក់ឱ្យនៅឯកាបំផុត។ ក្រុមលោកខាងលិច មិនទទួលស្គាល់រដ្ឋាភិបាលរបស់លោកបាស្ហាអាល់អាសាដទេ។ ដូច្នេះបារាំងក៏ដូចជាងអាល្លឺម៉ង់និងសម្ព័ន្ធមិត្ត ពិតជាពិបាកបង្ហាញវត្តមានចូលជួយប្រទេសដែលខ្លួនចាត់ទុកថាមិនស្របច្បាប់ណាស់។ នេះជាបញ្ហាមួយ។ បញ្ហាមួយទៀត គឺគ្រោះរញ្ជួយដី បានវាយប្រហារលើភាគខាងជើងប្រទេសស៊ីរី ដែល មួយផ្នែកស្ថិតក្នុងការគ្រប់គ្រងពួកឧទ្ទាម (ខ្លះគាំទ្រដោយមហាអំណាចបរទេស ខ្លះដោយពួកជីហាត និងកងកម្លាំងគួកឌីស្ថាន) ឯម្ខាងទៀតនៅក្រោមកណ្តាប់ដៃរដ្ឋាភិបាលដែលគាំទ្រអ៊ីរ៉ង់និងរុស្ស៊ី។
តាំងពីផ្ទុះសង្គ្រាមស៊ីវិល១២ឆ្នាំមក ពលរដ្ឋស៊ីរី ៤,៨លាននាក់ ក្នុងតំបន់ឧទ្ទាម ត្រដររស់បានដោយសារជំនួយមនុស្សធម៌អន្តរជាតិដែលបញ្ជូនមកពីតួកគី តាមច្រក Bab Al-Hawa តែមួយគត់ ស្របតាមសេចក្តីសម្រេចរបស់អង្គការសហប្រជាជាតិ។ ចាត់ទុកជារំលោភបូរណភាពដែនដីស៊ីរី ពីសំណាក់ក្រុងដាម៉ាសនិងរុស្ស៊ី ច្រកនេះរួមតូចជារៀងរាល់ថ្ងៃ ហើយអាចចាល់ភ្លាមបើមានលំហូរជំនួយច្រើន។
ជាមួយនឹងសេចក្តីអំពាវនាវសុំការគាំទ្រពីសហគមន៍អន្តរជាតិ ឯកអគ្គរដ្ឋទូតស៊ីរីប្រចាំអង្គការសហប្រជាជាតិ បានធានានឹងចែកចាយជំនួយអន្តរជាតិដល់គ្រប់ពលរដ្ឋទូទាំងប្រទេសស៊ីរី ប៉ុន្តែបើបញ្ជូនជំនួយតាមដែនដីគ្រប់គ្រងដោយក្រុងដាម៉ាស នោះបញ្ហាការទូតនឹងចោទឡើង ដោយខាងរដ្ឋាភិបាលត្រូវជាអ្នកចែកចាយជំនួយដល់ពលរដ្ឋនៅតំបន់ឧទ្ទាម ឱ្យបានត្រឹមត្រូវ ហើយមេដឹកនាំឧទ្ទាមត្រូវផ្តល់ការព្រមព្រៀងទទួលអំណោយ។
ជាសរុប ពលរដ្ឋស៊ីរីក្រោមដែនអំណាចរដ្ឋាភិបាល អាចនឹងទទួលបានជំនួយអន្តរជាតិ ដូចអ្វីដែលមានតាំងពី១០ឆ្នាំមក ប៉ុន្តែប្រជាពលរដ្ឋដែលជាជនភៀសខ្លួន នៅតំបន់អាឡិប ឬតំបន់ឧទ្ទាម អាចនឹងត្រូវចាំស្ងួតក្រពះហើយ ព្រោះអាជ្ញាធរតួកគីកំពុងរវល់ប្រឹងជួយពលរដ្ឋរងគ្រោះរបស់ខ្លួនយ៉ាងសន្ធឹកសន្ធាប់ដែរ។ ជំនួយបន្ទាន់សម្រាប់ស៊ីរីពេលនេះ មានមកតែពីខាងអេមីរ៉ាតអារ៉ាប់រួម ចំនួន១៣,៦លានដុល្លារ។ ទោះធ្លាប់ដាក់ស៊ីរីឱ្យឯកាមែន តែក្រុមប្រទេសសម្ព័ន្ធអារ៉ាប់ ពិតជាមិនអាចបោះបង់ស៊ីរីទៀតទេ នៅចំពោះមុខមហន្តរាយរញ្ជួយដីក៏កំណាចពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ