ជនប៉ាឡេស្ទីន និងប៉ូលិសអ៊ីស្រាអែល ប៉ះទង្គិចគ្នាយ៉ាងហិង្សានៅទីសក្ការៈសាសនា ក្រុងហ្សេរុយសាឡិម
កងសមត្ថកិច្ចអ៊ីស្រាអែល បានចូលធ្វើអន្តរាគមន៍យ៉ាងហិង្សានៅទីលានវិហារអ៊ីស្លាម ដែលជាកន្លែងសក្ការៈបូជាទីបីនៃសាសនាអ៊ីស្លាម ដើម្បីជាផ្លូវការ រក្សាសណ្តាប់ធ្នាប់។ ប៉ុន្តែយុទ្ធនាការបានរាលដាលក្លាយជាការប៉ះទង្គិចយ៉ាងហិង្សា ដោយមានការចាប់ខ្លួនជាង៣៥០នាក់។ ប៉ូលិសអ៊ីស្រាអែលបានគប់គ្រាប់បែកលាន់រន្ទឺពេញ ដើម្បីបំបែកជនប៉ាឡេស្ទីនដែលសំងំក្នុងវិហារ និងដែលបានតដៃវិញ ដោយការគប់កាំជ្រួច។ ចលនាហាម៉ាសប៉ាឡេស្ទីនដែលគ្រប់គ្រងតំបន់ហ្កាហ្សា បានបរិហារថាជាអំពើឧក្រិដ្ឋមិនធ្លាប់មាន និងបានបាញ់រ៉ុកកែតជាច្រើនសំដៅអ៊ីស្រាអែល។
ចុះផ្សាយនៅថ្ងៃ៖
ស្តាប់ - ០២:១៦
នៅព្រហាមថ្ងៃពុធ កងកម្លាំងអ៊ីស្រាអែល ស្រាប់តែសម្រេចចិត្តប្រើកម្លាំង គាស់បណ្តេញ គ្រប់ជនប៉ាឡេស្ទីន អ្នកកាសែត ... ពីវិហារAg-l-Aqsa ដែលស្ថិតនៅលើទីលានសក្ការៈ មានប្រជុំវិហារនៃសាសនាបី អ៊ីស្លាម ជ្វីហ្វ និងគ្រិស្ត។ ប្រតិបត្តិការបានក្លាយជាការប៉ះទង្គិចយ៉ាងហិង្សា រវាងប្រជាជនប៉ាឡេស្ទីននិងកងកម្លាំងអ៊ីស្រាអែល។ បើតាមរូបភាពវីដេអូរបស់ប៉ូលិសអ៊ីស្រាអែល សំឡេងផ្ទុះបានលាន់ឡើង ចេញពីក្នុងវិហារអ៊ីស្លាម ទំនងជាគ្រាប់កាំជ្រួច និងស្រមោលមនុស្សកំពុងគប់ដុំថ្ម... វគ្គខ្លះទៀត កងបង្ក្រាបអ៊ីស្រាអែលបានរុលចូលទៅក្នុងវិហារអ៊ីស្លាម ក្រៀកមនុស្សចេញដោយមានដាក់ខ្នោះផង។
ដើមហេតុ គឺមកពីអ៊ីស្រាអែល មិនអនុញ្ញាតឱ្យអ្នកកាន់សាសនាអ៊ីស្លាម មកគោរពនិងស្នាក់នៅក្នុងវិហារ al-Aqsa ជាប់រហូតទាំងថ្ងៃទាំងយប់ ក្នុងអំឡុងពេលបុណ្យតបអាហារមួយខែ ដែលក៏ត្រូវចំពេលជនជាតិជ្វីហ្វប្រារព្វពិធីបុណ្យសាសនាដែរ នាថ្ងៃអាទិត្យខាងមុខនេះ។
អ៊ីស្រាអែលបានអះអាងគោរពសេរីភាពសាសនា ប៉ុន្តែហាមមិនឱ្យជនប៉ាឡេស្ទីនរក្សាវត្តមានជាប់រហូតក្នុងវិហារឡើយ និងបានផ្ញើសារព្រមានឱ្យចាកចេញពីទីលានសក្តិសិទ្ធនេះ កាលពី៤៨ម៉ោងមុន។ នេះបើតាមការរៀបរាប់របស់សាក្សីជាតិប៉ាឡេស្ទីនម្នាក់ ដោយបញ្ជាក់ថាជនប៉ាឡេស្ទីនត្រូវប្រឈមតស៊ូជារាល់ឆ្នាំពេលប្រារព្វពិធីតមអាហារ។
ប៉ុន្តែក្នុងបរិបទនៃភាពតានតឹងខ្លាំងចម្លែកតាំងពីចូលឆ្នាំ២០២៣មក ចលនាហាម៉ាសប៉ាឡេស្ទីន ដែលគ្រប់គ្រងតំបន់ហ្កាហ្សា បានបរិហារការលុកចូលវិហារអ៊ីស្លាមរបស់ប៉ូលិសអ៊ីស្រាអែល ថាជាទង្វើឧក្រិដ្ឋ គ្មានប្រៀប និងបានអំពាវនាវឱ្យជនប៉ាឡេស្ទីននៅស៊ីហ្សកដានី នាំគ្នាធ្វើដំណើរទាំងហ្វូង ទៅកាន់វិហារអ៊ីស្លាម al-Aqsa ដើម្បីការពារសាសនា។ ពលរដ្ឋនៅហ្កាហ្សាជាច្រើនសិបនាក់ប្រមូលផ្តុំគ្នាធ្វើបាតុកម្មប្រឆាំងអ៊ីស្រាអែលរួចជាស្រេចទៅហើយ។ ចលនាហាម៉ាសបានថែមទាំងបាញ់រ៉ុកកែតជាច្រើនសំដៅទឹកដីអ៊ីស្រាអែល ដែលមួយភាគធំត្រូវទាហានអ៊ីស្រាអែលកម្ចាត់បាន និងខ្លះទៀតធ្លាក់ក្នុងកន្លែងមានមនុស្សរស់នៅ។
ក្រសួងការបរទេសអេហ្ស៊ីប ក៏បានចេញសេចក្តីថ្លែងការណ៍ថ្កោលទោសអ៊ីស្រាអែលដែរ និងបានបន្ទោសមេអាណានិគម អ៊ីស្រាអែល ថាជាដើមហេតុនាំគ្រោះថ្នាក់ បំផ្លិចបំផ្លាញកិច្ចខិតខំប្រឹងប្រែងផ្អាកបាញ់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ