ស្តេចស៊ុលតង់នៃប្រទេសអូម៉ង់ផ្តើមទស្សនកិច្ចរយៈពេល ២ថ្ងៃនៅក្នុងប្រទេសអ៊ីរ៉ង់
ស្តេចស៊ុលតង់នៃប្រទេសអូម៉ង់ព្រះអង្គម្ចាស់ហៃថាមបានយាងដល់ប្រទេសអ៊ីរ៉ង់នាថ្ងៃអាទិត្យ ទី២៨ ឧសភាដើម្បីបំពេញទស្សនកិច្ចរយៈពេល ២ថ្ងៃ។ វត្តមានរបស់ព្រះអង្គម្ចាស់ហៃថាមក្នុងទឹកដីអ៊ីរ៉ង់ពេលនេះបានធ្វើឡើងនៅក្រោយទស្សនកិច្ចរបស់ប្រធានាធិបតីអ៊ីរ៉ង់លោកអេប្រាហ៊ីម រ៉ៃស៊ីនៅអូម៉ង់កាលពីមួយឆ្នាំមុន។ គួរបញ្ជាក់ថា ក្រៅពីជាប្រទេសដែលមានទំនាក់ទំនងល្អយូរអង្វែងរវាងគ្នា អូម៉ង់ក៏ជាអន្តរការីនៃជម្លោះរវាងអ៊ីរ៉ង់ និងបស្ចិមលោកនៅក្នុងសំណុំរឿងគន្លឹះជាច្រើន ពិសេសបញ្ហានុយក្លេអ៊ែរអ៊ីរ៉ង់។
ចុះផ្សាយនៅថ្ងៃ៖
ស្តាប់ - ០២:១៣
គេនៅមិនទាន់ដឹងពីកម្មវត្ថុនៃដំណើរទស្សនកិច្ចរបស់ស្តេចស៊ុលតង់អូម៉ង់ព្រះអង្គម្ចាស់ហៃថាមនៅក្នុងប្រទេសអ៊ីរ៉ង់ទេ។ តែប្រមុខការទូតអូម៉ង់បានបញ្ជាក់នៅមុនការទៅដល់ទឹកដីអ៊ីរ៉ង់របស់ព្រះអង្គម្ចាស់ហៃថាមថា ទស្សនកិច្ចជាប្រវត្តិសាស្រ្តនេះនឹងមានឥទ្ធិពលវិជ្ជមានដល់សន្តិសុខ និងស្ថិរភាពនៅក្នុងតំបន់។ គួររម្លឹកថា ដំណើរទស្សនកិច្ចរបស់ប្រធានាធិបតីអ៊ីរ៉ង់លោកអេប្រាហ៊ីម រ៉ៃស៊ីក្នុងប្រទេសអូម៉ង់កាលពី ១ឆ្នាំមុន មានកិច្ចព្រមព្រៀងពាណិជ្ជកម្មជាច្រើនត្រូវបានចុះហត្ថលេខារវាងប្រទេសទាំងពីរ។ ដូច្នេះគេសង្ឃឹមថា ទស្សនកិច្ចរបស់ព្រះអង្គម្ចាស់ហៃថាមនៅអ៊ីរ៉ង់ពេលនេះក៏អាចឈានទៅចុះហត្ថលេខាលើកិច្ចព្រមព្រៀងមួយចំនួនដែរ។
គួរបញ្ជាក់ថា ខុសពីបណ្តាប្រទេសជិតខាងមួយចំនួន អូម៉ង់បាន និងកំពុងរក្សាទំនាក់ទំនងល្អប្រសើរជាមួយអ៊ីរ៉ង់តាំងពីយូរមកហើយ។ លើសពីនេះ អូម៉ង់ថែមទាំងបានដើរតួនាទីជាអាជ្ញាកណ្តាលក្នុងការដោះស្រាយជម្លោះរវាងអ៊ីរ៉ង់ និងបណ្តាប្រទេសនៅមជ្ឈិមបូព៌ា ហើយជម្លោះរវាងអ៊ីរ៉ង់ និងបស្ចិមលោក។ ជាក់ស្តែង អូម៉ង់បានជួយសម្រួលឲ្យមានកិច្ចចរចារវាងអ៊ីរ៉ង់ និងសហរដ្ឋអាមេរិកដែលជាសត្រូវស៊ូពូជរបស់អ៊ីរ៉ង់ រួមទាំងបញ្ហានុយក្លេអ៊ែរ។ បន្ទាប់មក អូម៉ង់បានជួយសម្រួលឲ្យអ៊ីរ៉ង់ និងអារ៉ាប៊ីសាអូឌីតដែលជាមហាអំណាចពីរនៅក្នុងតំបន់ភ្ជាប់ទំនាក់ទំនងការទូតរវាងគ្នាឡើងវិញកាលពីខែមីនា។
ថ្មីៗចុងក្រោយ អូម៉ង់បានជួយសម្រួលឲ្យមានការដោះដូរអ្នកទោសរវាងអ៊ីរ៉ង់ និងបែលហ្សិកកាលពីថ្ងៃសុក្រ ទី២៦ ឧសភា។ អ៊ីរ៉ង់បានដោះលែងអ្នកទោសបែលហ្ស៊ិកលោក Olivier Vandecasteele ហើយបែលហ្ស៊ិកបានដោះលែងអ្នកទោសអ៊ីរ៉ង់លោក Assadollah Assadi។ នៅពេលខាងមុខ អ៊ីរ៉ង់អាចនឹងភ្ជាប់ទំនាក់ទំនងប្រក្រតីឡើងវិញជាមួយអេហ្ស៊ីប ព្រោះមុនយាងដល់អ៊ីរ៉ង់ ស្តេចស៊ុលតង់អូម៉ង់ព្រះអង្គម្ចាស់ហៃថាមបានបំពេញទស្សនកិច្ចក្នុងប្រទេសអេហ្ស៊ីបដោយបានជួបជជែកជាមួយប្រធានាធិបតីអេហ្ស៊ីបលោកអាល់ស៊ីស៊ី។ ម្យ៉ាងទៀត ក្រុងតេហេរ៉ង់ធ្លាប់ប្រាប់ឲ្យដឹងពីកិច្ចចរចាក្នុងខែធ្នូ ឆ្នាំ ២០២២ រវាងប្រមុខការទូតអ៊ីរ៉ង់ និងថ្នាក់ដឹកនាំអេហ្ស៊ីបនៅក្រៅកិច្ចប្រជុំក្នុងប្រទេសអូម៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ