រាជទាយាទអារ៉ាប៊ីសាអូឌីត មកបារាំង ដើម្បីចូលរួមជំនួបកំពូលពិភពលោក និងជជែកពីសំណុំរឿងអ៊ុយក្រែន
ថ្ងៃពុធ ព្រះចៅព្រះបាទ Mohammed ben Salmane ស្តេចយាងមកដល់រដ្ឋធានីប៉ារីស។ ប៉ារីសជាទីដែលទ្រង់នឹងជួបប្រាស្រ័យជាមួយប្រធានាធិបធីបតីបារាំង លោក អេម៉ានុយអែល ម៉ាក្រុង។ ប្រភពពីវិមានប្រធានាធិបតីបារាំង គឺបញ្ជាក់ថា ថ្នាក់ដឹកនាំកំពូលទាំងពីរនឹងជួបគ្នានៅក្នុងឱកាសសោយលៀងភោជនាហារ នៅថ្ងៃសុក្រ។ ជាការកត់សម្គាល់ ដំណើរទស្សនកិច្ចផ្លូវរដ្ឋរបស់រាជទាយាទអារ៉ាប៊ីសាអូឌីត មកបារាំងគ្រានេះ គឺនាំឲ្យគេរំលឹកជាថ្មី ទៅដល់ ព្រឹត្តិការណ៍ឃាតកម្មសម្លាប់អ្នកកាសែត នៅស្ថានទូត អារ៉ាប៊ីសាអូឌីត ក្នុងប្រទេសតួកគី។
ចុះផ្សាយនៅថ្ងៃ៖
ស្តាប់ - ០២:១៤
តាមប្រភពពីវិមានអេលីហ្សេ ព្រះបាទ Mohammed ben Salmane នឹងយាងគង់ នៅវិមាន Château Louis XIV នៅក្បែរអតីតរាជវាំងស្តេចបារាំង Versailles។ គម្រោងផ្លូវការ គឺស្តេចយាងជួបប្រមុខរដ្ឋបារាំង លោក អេម៉ានុយអែល ម៉ាក្រុង ដែលបុរសរដ្ឋទាំងពីរ នឹងពិភាក្សាពីសំណុំរឿងសង្គ្រាមអ៊ុយក្រែនហើយនិងផលវិបាកប៉ះពាល់នៃសង្គ្រាមនេះ ដែលជះឥទ្ធិពលដល់ប្រទេសផ្សេងទៀត។ ក្នុងពេលជាមួយគ្នានេះ គេមើលឃើញថា បារាំង ចង់ឲ្យ អារ៉ាប៊ីសាអូឌីត ប្រើឥទ្ធិពល និយាយនឹង រុស្ស៊ី។
លើសពីនេះ តាមប្រភពផ្លូវការពីវិមានប្រធានាធិបតីបារាំង គឺ ថ្នាក់ដឹកនាំទាំងពីរ នឹងលើកវិបត្តិរាំរ៉ៃនៅតំបន់ដើមបូព៌ា ជាក់ស្តែង នៅយេម៉ែន ហើយនិងបញ្ហានៅប្រទេសលីបង់។ លីបង់ ដែលរាជាណាចក្រអារ៉ាប៊ីសាអូឌីត មានទម្ងន់ឥទ្ធិពលខ្លាំង ហើយបារាំងក៏យកចិត្តទុកដាក់ខ្លាំងចូលរួមដោះស្រាយបញ្ហានៅទីនោះដែរ ដោយតែងតាំង អតីតរដ្ឋមន្ត្រីការបរទេស Jean-Yves Le Drian ជាបេសកជនពិសេសក្នុងសំណុំរឿង លីបង់ ។
ព្រះរាជវត្តមាន របស់រាជទាយាទអារ៉ាប៊ីសាអូឌីត នៅទីក្រុងប៉ារីស ក៏ដើម្បីរៀបចំនិងចូលរួមកិច្ចប្រជុំកំពូលពិភពលោក នៅថ្ងៃទី២២-២៣ មិថុនា ខាងមុខ ដើម្បីនឹងពិគ្រោះគ្នាពីកញ្ចប់មូលនិធិថវិកាអន្តរជាតិថ្មីមួយ។ មូលធិនិនេះ គឺដើម្បីជួយជ្រោមជ្រែងផ្នែកឯកជននិងរដ្ឋនៃប្រទេសក្រីក្រ ក្នុងការស្តារជីវភាពប្រជាជន ហើយនិងទប់ទល់ការប្រែប្រួលអាកាសធាតុ ព្រមទាំងការពារជីវចម្រុះ។ បើតាមដំណឹងពីរដ្ឋាភិបាលបារាំង។
ទោះបីជាយ៉ាងនេះក្តី ព្រះរាជវត្តមាន របស់ ព្រះបាទ Mohammed ben Salmane គឺចៀសមិនផុតដែលត្រូវតែរំលឹកពីមរណភាពរបស់ អ្នកកាសែត Jamal Khashoggi ។ លោកអ្នកកាសែតរូបនេះ ត្រូវគេសម្លាប់ និងកាត់សាកសពកង់ៗ នៅក្នុងស្ថានទូត អារ៉ាប៊ីសាអូឌីត ក្នុងប្រទេសតួកគី។ នេះបើតាមក្រុមអ្នកស៊ើបការណ៍សម្ងាត់អាមេរិក។ ឃាតកម្មលើអ្នកកាសែតប្រឆាំង គឺធ្វើឲ្យប្រទេសបច្ចិមលោក រិះគន់យ៉ាងចាស់ដៃចំពោះ អារ៉ាប៊ីសាអូឌីត ហើយក្រុមសង្គមស៊ីវិលខាងសិទ្ធិមនុស្ស ក៏រិះគន់ថ្នាក់ដឹកនាំបារាំងដែរ ដែលនៅតែបន្តចាប់ដៃជាមួយ ថ្នាក់ដឹកនាំអារ៉ាប៊ីសាអូឌីត ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ