បារាំងចោទថារុស្ស៊ីបានវាយប្រហារតាមប្រព័ន្ធបច្ចេកវិទ្យា ដោយបង្កើតគេហទំព័រសារព័ត៌មានក្លែងក្លាយ
ថ្ងៃអង្គារទី១៣មិថុនា ក្រសួងការបរទេសបារាំង បានប្រកាសចោទប្រកាន់ចំៗ ថារុស្ស៊ីជាអ្នកនៅពីក្រោយការវាយប្រហារទ្រង់ទ្រាយធំ មកលើបណ្តាញសារព័ត៌មានបារាំង។ ជាប្រតិបត្តិការ ដែលចោរព័ត៌មានវិទ្យារុស្ស៊ី បានធ្វើ ដោយបង្កើតគេហទំព័រក្លែងក្លាយ ដូចនឹងគេហទំព័រព័ត៌មានពិតប្រាកដរបស់បារាំង ដើម្បីផ្សព្វផ្សាយអត្ថបទព័ត៌មានប្រឌិត ឬចែកចាយដំណឹងក្លែងក្លាយនានាដែលរិះគន់អ៊ុយក្រែន និងក្រុមសម្ព័ន្ធមិត្តលោកខាងលិច។
ចុះផ្សាយនៅថ្ងៃ៖
ស្តាប់ - ០២:៤២
ជាទម្លាប់ បារាំង តែងតែប្រុងប្រយ័ត្ន មិនចោទទម្លាក់កំហុសដោយងាយឡើយ ក្នុងករណីមានការវាយប្រហារ ដោយប្រើបច្ចេកវិទ្យាព័ត៌មានវិទ្យា។ តែលើកនេះ គឺលោកស្រី Catherine Colonna រដ្ឋមន្ត្រីក្រសួងការបរទេសបារាំងដោយផ្ទាល់ ដែលបានចេញលិខិតប្រកាសចោទរុស្ស៊ីចំៗតែម្តង ថាជាអ្នកនៅពីក្រោយប្រតិបត្តិការវាយលុក លើបណ្តាញអ៊ីនធ័រនិត។
ក្រៅពីគេហទំព័ររបស់ក្រសួងការបរទេសបារាំង យ៉ាងហោចណាស់ មានគេហទំព័រសារព័ត៌មានធំៗរបស់បារាំងចំនួន៤ ដែលបានរងគ្រោះ គឺមានដូចជា កាសែត Le Monde កាសែត Le Figaro កាសែត Le Parisien និងកាសែត 20 Minutes។ ការវាយប្រហារនេះ មិនមែនមាននៅតែបារាំងទេ។ គេហទំព័របណ្តាញព័ត៌មានធំៗ របស់អាល្លឺម៉ង់ ដែលមានដូចជា FAZ Der Spiegel Bild និង Die Welt ជាដើម ក៏បានរងគ្រោះដែរ។
យោងតាមអ្នកជំនាញសន្តិសុខព័ត៌មានវិទ្យាបារាំង ការវាយប្រហារនេះ មានឈ្មោះថា Doppelganger ដោយចោរស៊ីឈ្នួលរបស់រុស្ស៊ី បានបង្កើតគេហទំព័រសារព័ត៌មានប្រឌិតជាច្រើន មានលក្ខណៈដូចគ្នាទៅនឹងគេហទំព័រពិតប្រាកដ តែដោយប្រើឈ្មោះដូមែនផ្សេង។ គេហទំព័រក្លែងក្លាយទាំងនេះ ចុះផ្សាយនូវព័ត៌មានប្រឌិត ហើយបន្ទាប់មកទៀត មានអ្នកចាំយកទៅចែកចាយបន្ត នៅតាមបណ្តាញសង្គម បង្កើតឲ្យមានរឿងផ្អើលឈូរឆ។ អត្ថបទព័ត៌មានក្លែងក្លាយទាំងនោះ មានខ្លឹមសារជាទូទៅ រិះគន់អ៊ុយក្រែន រិះគន់ក្រុមសម្ព័ន្ធលោកខាងលិច ឬសរសើរចំពោះរុស្ស៊ី រួមទាំងមានរូបភាពគំនូរជីវចល បន្តុះបង្អាប់ លើរូបប្រធានាធិបតីហ្សេឡេនស្គីជាដើម។
ក្រសួងការបរទេសបារាំង បានបរិហារថា សកម្មភាពវាយប្រហារពីសំណាក់រុស្ស៊ីនេះ គឺវាថោកទាបណាស់ មិនសមជាប្រទេសសមាជិកអចិន្ត្រៃយ៍ នៃក្រុមប្រឹក្សាសន្តិសុខនោះទេ។ យោងតាមការស្រាវជ្រាវ ស្ថានទូតរុស្ស៊ី ព្រមទាំងមជ្ឈមណ្ឌលវប្បធម៌រុស្ស៊ី បានចូលរួមយ៉ាងសកម្មភាព នៅក្នុងប្រតិបត្តិការនេះ តាមរយៈការជួយចែករំលែក ផ្សព្វផ្សាយ បន្ទរតាមបណ្តាញសង្គមនានា។ ក្រសួងការបរទេសបារាំងអះអាងថា គ្រោងឆ្អឹងមូលដ្ឋាននៃការប្រតិបត្តិការវាយប្រហារនេះ គឺជាគេហទំព័ររុស្ស៊ីមួយឈ្មោះថា RRN.world ដែលត្រូវបានបង្កើតឡើងក្រោយពេលរុស្ស៊ីលើកទ័ពចូលឈ្លានពានអ៊ុយក្រែន ហើយដែលមានការងារ ជាអ្នកផ្សព្វផ្សាយព័ត៌មានប្រឌិតបោកប្រាស់នានា ដើម្បីប្រឆាំងអ៊ុយក្រែន។
សូមរំលឹកថា ប្រតិបត្តិការវាយប្រហារ Doppelganger របស់រុស្ស៊ី ធ្លាប់ត្រូវបានអង្គភាព EU DisinfoLab និងក្រុមហ៊ុន META ស្រាវជ្រាវប្រមូលទិន្នន័យដឹងម្តងហើយ កាលពីឆ្នាំ២០២២។ កាលពីខែកញ្ញា ក្រុមហ៊ុន Meta បានបំបែកបាន នូវទំព័រក្លែងក្លាយជាច្រើន ដែលមានប្រភពនៅរុស្ស៊ី ហើយដែលមានតួនាទីចាំផ្សព្វផ្សាយបន្ត នូវព័ត៌មានប្រឌិតក្លែងក្លាយ ដើម្បីបំពុលបណ្តាញសង្គម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ