អ៊ីស្រាអែលបានអំពាវនាវឲ្យប្រជាជនប៉ាឡេស្ទីនក្នុងតំបន់ហ្កាហ្សាពន្លឿនការចាកចេញឲ្យបានឆាប់
សង្រ្គាមរវាងពួកហាម៉ាសប៉ាឡេស្ទីននៅតំបន់ហ្កាហ្សា និងអ៊ីស្រាអែលបានឈានចូលដល់ថ្ងៃទី៨ នាថ្ងៃសៅរ៍ ទី១៤ តុលា។ ក្នុងពេលដែលការវាយប្រហារតាមផ្លូវអាកាសលើតំបន់ហ្កាហ្សាកំពុងបន្តមាន កងទ័ពអ៊ីស្រាអែលក៏បានអំពាវនាវឲ្យពលរដ្ឋប៉ាឡេស្ទីនក្នុងតំបន់ហ្កាហ្សានៅប៉ែកខាងជើងពន្លឿនការចាកចេញទៅកាន់ប៉ែកខាងត្បូងឲ្យបានឆាប់។ ការអំពាវនាវនេះបានធ្វើឡើង ខណៈដែលកងទ័ពអ៊ីស្រាអែលកំពុងត្រៀមបើកប្រតិបត្តិការសឹកតាមផ្លូវគោកចូលតំបន់ហ្កាហ្សា។
ចុះផ្សាយនៅថ្ងៃ៖
ស្តាប់ - ០៣:០៣
ការអំពាវនាវនេះត្រូវបានអ្នកនាំពាក្យកងទ័ពអ៊ីស្រាអែលលោក Richard Hecht ប្រាប់ក្រុមអ្នកកាសែតក្នុងថ្ងៃសៅរ៍ ទី១៤ តុលា។ លោក Richard Hecht បានប្រាប់ពេលម៉ោងដែលត្រូវចាកចេញក្នុងចន្លោះពីម៉ោង ១០ព្រឹកដល់ម៉ោង ៤រសៀល តែមិនបានបញ្ជាក់ពីថ្ងៃផុតកំណត់ទេ។ គួរបញ្ជាក់ថា កងទ័ពអ៊ីស្រាអែលបានអំពាវនាវក្នុងថ្ងៃសុក្រ ទី១៣ តុលាឲ្យពលរដ្ឋប៉ាឡេស្ទីនក្នុងតំបន់ហ្កាហ្សារស់នៅប៉ែកខាងជើងប្រមាណជា ១លាន ១សែននាក់ចាកចេញទៅកាន់ប៉ែកខាងត្បូង។ ចំណែកចលនាប៉ាឡេស្ទីនហាម៉ាសបានអំពាវនាវឲ្យពលរដ្ឋប៉ាឡេស្ទីនកុំស្តាប់តាមការអំពាវនាវរបស់កងទ័ពអ៊ីស្រាអែល។
ទោះជាយ៉ាងនេះក្តី គេបានឃើញពលរដ្ឋប៉ាឡេស្ទីនជាច្រើនរយពាន់នាក់បានចាកចេញតាមការអំពាវនាវរបស់កងទ័ពអ៊ីស្រាអែលដោយប្រើមធ្យោបាយគ្រប់បែបយ៉ាង។ អ្នកខ្លះបានចាកចេញដោយដើរជាមួយនឹងការស្ពាយឥវ៉ាន់តាមខ្លួន ហើយអ្នកខ្លះទៀតបានចាកចេញដោយជិះរថយន្ត ម៉ូតូ ឬរទេះសេះ។ កងទ័ពអ៊ីស្រាអែលបានសាទរពីចំនួនចាកចេញគួរឲ្យកត់សម្គាល់ និងបានមើលឃើញថា ការចាកចេញនេះនៅមានភាពយឺតយ៉ាវខ្លាំង។ អ្វីដែលកងទ័ពអ៊ីស្រាអែលចង់បានបន្ថែម គឺចង់ឲ្យពលរដ្ឋប៉ាឡេស្ទីនពន្លឿនការចាកចេញឲ្យបានឆាប់ជាងនេះ។
គេមិនដឹងថា ហេតុអ្វីបានជាកងទ័ពអ៊ីស្រាអែលជម្លៀសពលរដ្ឋប៉ាឡេស្ទីននៅតំបន់ហ្កាហ្សាពីប៉ែកខាងជើងទៅប៉ែកខាងត្បូងទេ។ អ្វីដែលគេដឹង កងទ័ពអ៊ីស្រាអែលបានដាក់ពង្រាយរថក្រោះច្រើនរយគ្រឿងព័ទ្ធជុំវិញតំបន់ហ្កាហ្សាក្នុងន័យត្រៀមបើកការវាយប្រហារផ្លូវគោក។ គួរបញ្ជាក់ថា តាំងពីក្រោយការវាយប្រហាររបស់ពួកហាម៉ាសក្នុងថ្ងៃទី៧ តុលាមក អ៊ីស្រាអែលបានវាយបកវិញតែតាមផ្លូវអាកាសដោយប្រើមីស៊ីលកម្ទេចទីតាំងរបស់ពួកហាម៉ាស។ គិតត្រឹមថ្ងៃសៅរ៍ ទី១៤ តុលា មានស្លាប់ប្រជាជនអ៊ីស្រាអែលយ៉ាងតិច ១ ៣០០នាក់ដែលភាគច្រើនជាជនស៊ីវិល និងមានស្លាប់ប្រជាជនប៉ាឡេស្ទីនជាង ២ ២០០នាក់ដែលភាគច្រើនក៏ជាជនស៊ីវិល ក្នុងនោះមានក្មេងចំនួន ៧២៤នាក់។
អ្វីដែលសហគមន៍អន្តរជាតិកំពុងបារម្ភខ្លាំងពេលនេះ គឺគ្រោះមហន្តរាយមនុស្សធម៌ចំពោះពលរដ្ឋប៉ាឡេស្ទីននៅតំបន់ហ្កាហ្សាដែលត្រូវបានអ៊ីស្រាអែលបិទខ្ទប់ទាំងស្រុងដោយគ្មានអាហារទទួលទាន និងទឹកស្អាត រួមភ្លើងអគ្គិសនីប្រើប្រាស់ទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ