អ៊ីស្រាអែលទុកពេល២៤ម៉ោងឲ្យប្រជាជនប៉ាឡេស្ទីនជាង១លាននាក់ភៀសខ្លួនចេញពីភាគខាងជើងហ្កាហ្សា
ជាសញ្ញាវាយលុកចូលទឹកដីហ្កាហ្សា តាមផ្លូវគោក ដើម្បីវាយកម្ទេចក្រុមហាម៉ាសប៉ាឡេស្ទីន កងទ័ពអ៊ីស្រាអែលនៅថ្ងៃសុក្រទី ១៣តុលា បានប្រកាសទុកពេល ២៤ម៉ោងឲ្យប្រជាជនប៉ាឡេស្ទីនត្រូវតែផ្លាស់ទីចេញពីភាគខាងជើងហ្សាហ្កា។ អ៊ីស្រាអែលអះអាងថា ខ្លួនបានជូនដំណឹងទុកជាមុន ដើម្បីឲ្យប្រជាជនប៉ាឡេស្ទីនក្នុងតំបន់ហ្កាហ្សា ស្វែងរកកន្លែងជ្រកមានសុវត្ថិភាព សន្តិសុខ ប៉ុន្តែ អ្នកនាំពាក្យអង្គការសហប្រជាជាតិបានអំពាវនាវឲ្យអ៊ីស្រាអែលប្តូរជំហរ ព្រោះថា ការជម្លៀសប្រជាជនប៉ាឡេស្ទីនជាង១លាននាក់ កាលៈទេសៈនេះរឹតតែបណ្តាលឲ្យមានគ្រោះមហន្តរាយជីវិតមនុស្សដ៏ធ្ងន់ធ្ងរ។
ចុះផ្សាយនៅថ្ងៃ៖
ស្តាប់ - ០៣:៣៨
អ៊ីស្រាអែលបន្តបញ្ជូនកងទ័ព និងរថក្រោះជាច្រើនគ្រឿង ទៅពង្រាយនៅតាមបណ្តោយព្រំដែនដើម្បីត្រៀមលក្ខណៈវាយលុកផ្លូវគោកចូលទឹកដីហ្កាហ្សា។ នៅព្រឹកព្រលឹមថ្ងៃសុក្រ កងទ័ពអ៊ីស្រាអែលបានអំពាវនាវប្រាប់ប្រជាជនប៉ាឡេស្ទីនឲ្យចាកចេញពីតំបន់ភាគខាងជើងហ្កាហ្សា ដើម្បីសន្តិសុខ និងសុវត្ថិភាពផ្ទាល់ខ្លួន។ តាមកងទ័ពអ៊ីស្រាអែល ប្រជាជននៅភាគខាងជើងហ្កាហ្សាត្រូវផ្លាស់ទីមកនៅភាគខាងត្បូងហ្កាហ្សា និងមិនអាចត្រលប់ទៅផ្ទះសម្បែងរបស់ខ្លួន នៅភាគខាងជើង បើសិនគ្មានភ្លើងខៀវពីអ៊ីស្រាអែល។
ទីភ្នាក់ងាររបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីន នៅថ្ងៃសុក្រ បានអះអាងថា ខ្លួនបានទទួលដំណឹងពីកងទ័ពអ៊ីស្រាអែលឲ្យជម្លៀសមនុស្ស តំបន់ភាគខាងជើងហ្កាហ្សា។ តាមអង្គការសហប្រជាជាតិ បទបញ្ជារបស់អ៊ីស្រាអែលនឹងធ្វើឲ្យមនុស្សជាង ១លាននាក់ ដែលមានតាំងពីបុគ្គលិក របស់អង្គការសហប្រជាជាតិ ហើយនិងប្រជាជនស៊ីវិល ប៉ាឡេស្ទីនត្រូវចាកចេញពីផ្ទះសម្បែង សាលារៀន មន្ទីរពេទ្យ និងជំរំភៀសខ្លួននៅភាគខាងជើងហ្កាហ្សា។
នៅទីក្រុងញូវយ៉ក អ្នកនាំពាក្យរបស់អគ្គលេខាធិការអង្គការសហប្រជាជាតិ លោក Stéphane Dujarricបានអំពាវនាវទៅភាគីអ៊ីស្រាអែលឲ្យប្តូរជំហរឡើងវិញ ព្រោះថា បទបញ្ជារបស់អ៊ីស្រាអែលនឹងបង្កឲ្យមានវិបត្តិមនុស្សធម៌ដ៏ធ្ងន់ធ្ងរ នៅបន្ទាប់ពីការវាយប្រហារផ្លូវអាកាសរបស់អ៊ីស្រាអែលទៅទឹកដីហ្កាហ្សា នៅប៉ុន្មានថ្ងៃនេះ បានសម្លាប់ជីវិតមនុស្សជាង ១៣០០នាក់ និងធ្វើឲ្យប្រជាជនប៉ាឡេស្ទីនជាង ៤សែននាក់រត់ផ្លាស់ទី ទៅជ្រកកោននៅក្នុងជំរំរបស់អង្គការសហប្រជាជាតិ នៅភាគខាងជើងហ្កាហ្សា។ នៅថ្ងៃព្រហស្បតិ៍ អង្គការសហប្រជាជាតិបានអំពាវនាវសាជាថ្មី ទឹកប្រាក់ជំនួយ ២៩៤លានដុល្លារ សម្រាប់ជួយប្រជាជនប៉ាឡេស្ទីន នៅតំបន់ហ្កាហ្សា និងស៊ីហ្សកដានី។
ប្រតិកម្មទៅនឹងបទបញ្ជារបស់អ៊ីស្រាអែលឲ្យជម្លៀសមនុស្សចេញពីភាគខាងជើងតំបន់ហ្កាហ្សា អេហ្ស៊ីបដែលមានព្រំដែនជាប់ទឹកដីហ្កាហ្សាភាគខាងត្បូងបានអំពាវនាវឲ្យប្រជាជនប៉ាឡេស្ទីនស្ថិតនៅហ្កាហ្សា ដោយមិនត្រូវឆ្លងចូលទឹកដីអេហ្ស៊ីបឡើយ។ ន័រវែសថ្កោលទោស ការឡោមព័ទ្ធទឹកដីហ្កាហ្សា ចំណែកហ្សកដានី រួមទាំងប្រធានាធិបតីរុស្ស៊ី លោកពូទីនបានព្រមានពីផលវិបាកសម្លាប់ជីវិត ដោយសារប្រតិបត្តិការវាយលុកជើងគោករបស់អ៊ីស្រាអែលទៅក្នុងទឹកដីហ្កាហ្សា។
នៅថ្ងៃសុក្រ ក្រុមហាម៉ាសប៉ាឡេស្ទីនដែលបើកការវាយឆ្មក់ទ្រង់ទ្រាយធំលើអ៊ីស្រាអែល កាលពី៧ថ្ងៃមុន បានទាត់ចោលការជូនដំណឹងរបស់អ៊ីស្រាអែល និងអំពាវនាវឲ្យប្រជាជនប៉ាឡេស្ទីននៅក្នុងតំបន់ហ្កាហ្សាងើបឡើង តស៊ូប្រយុទ្ធនឹងការវាយលុករបស់កងទ័ពអ៊ីស្រាអែល។ មួយវិញទៀត បើតាមកងកម្លាំងប្រដាប់អាវុធរបស់ចលនាហាម៉ាសប៉ាឡេស្ទីន ការវាយប្រហារផ្លូវអាកាសរបស់អ៊ីស្រាអែលទៅលើតំបន់ហ្កាហ្សា នៅ២៤ម៉ោងចុងក្រោយនេះបានសម្លាប់ចំណាប់ខ្មាំង១៣នាក់ ជនជាតិអ៊ីស្រាអែល និងបរទេស ដែលត្រូវពួកហាម៉ាស ចាប់ជាចំណាប់ខ្មាំង លាក់ក្នុងទឹកដីហ្កាហ្សា។
តាមអ៊ីស្រាអែល ក្រៅពីសម្លាប់រង្គាលមនុស្ស យ៉ាងតិច ១២០០នាក់ ក្នុងការវាយប្រហារដ៏គួរឲ្យភ្ញាក់ផ្អើល កាលពីចុងសប្តាហ៍មុន ក្រុមហាម៉ាសបានចាប់មនុស្ស១៥០នាក់ ទៅធ្វើជាចំណាប់ខ្មាំង ក្នុងតំបន់ហ្កាហ្សា។ ជាការសងសឹកវិញ អ៊ីស្រាអែលប្រកាសសង្រ្គាម បើកការវាយប្រហារតាមផ្លូវអាកាស សំដៅបំផ្លាញ ទីតាំងយោធា និងរដ្ឋបាលរបស់ចលនាហាម៉ាសនៅក្នុងតំបន់ហ្កាហ្សា។ តាមកងទ័ពអ៊ីស្រាអែល គិតចាប់តាំងពី បើកប្រតិបត្តិការយោធាវាយបកក្រុមហាម៉ាស នៅហ្កាហ្សា កងទ័ពទម្លាក់គ្រាប់ជាង ៦ពាន់គ្រាប់ ស្មើនឹងគ្រឿងផ្ទុះ ៤ពាន់តោនទៅទឹកដីហ្កាហ្សា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ