ហេតុអ្វីអ៊ីស្រាអែលមិនសូវខ្វល់ពីអាយុជីវិតរបស់ចំណាប់ខ្មាំង ដែលជាប់ក្នុងដៃរបស់ក្រុមហាម៉ាស?
នៅក្នុងប្រតិបត្តិការវាយឆ្មក់ទ្រង់ទ្រាយធំក្នុងទឹកដីអ៊ីស្រាអែល កាលពីថ្ងៃទី ៧តុលា ២០២៣ ក្រុមប្រដាប់អាវុធ របស់ចលនាហាម៉ាសប៉ាឡេស្ទីនសម្លាប់មនុស្សយ៉ាងតិច ១៣០០នាក់ និងចាប់មនុស្សជាង ១២០នាក់ជាចំណាប់ខ្មាំង អូសនាំយកទៅក្នុងទឹកដីហ្កាហ្សា។ នៅមួយសប្តាហ៍មកនេះ ក្រុមគ្រួសាររបស់ចំណាប់ខ្មាំង និងអ្នកដែលបាត់ខ្លួន ដែលជាជនជាតិអ៊ីស្រាអែល និងបរទេស នាំគ្នាដាក់សម្ពាធលើរដ្ឋាភិបាលអ៊ីស្រាអែល និងសហគមន៍អន្តរជាតិ ឲ្យបើកការចរចា ដើម្បីទាមទារឲ្យក្រុមហាម៉ាសដោះលែង ចំណាប់ខ្មាំង ដែលអាចជាស្រ្តី កុមារ មនុស្ស ចាស់ និងទារក។
ចុះផ្សាយនៅថ្ងៃ៖
ស្តាប់ - ០៣:២៦
មួយសប្តាហ៍ក្រោយការវាយឆ្មក់ដ៏ធំមិនធ្លាប់មានរបស់ក្រុមហាម៉ាសប៉ាឡេស្ទីន ក្នុងទីក្រុងអ៊ីស្រាអែលជាប់ព្រំដែនហ្កាហ្សា រដ្ឋាភិបាលអ៊ីស្រាអែលស្រង់រកឃើញមានមនុស្ស១២០នាក់ ដែលជាទាហាន ប្រជាជនស៊ីវិល អ៊ីស្រាអែល និងជនបរទេស ត្រូវក្រុមប្រដាប់អាវុធហាម៉ាសប៉ាឡេស្ទីន ចាប់នាំយកទៅធ្វើជាចំណាប់ខ្មាំង ក្នុងទឹកដីហ្កាហ្សា។
ចំនួនចំណាប់ខ្មាំងសរុបដែលក្រុមហាម៉ាសប៉ាឡេស្ទីននាំយកទៅលាក់ទុកក្នុងទឹកហ្កាហ្សាអាចមានច្រើនដល់១៥០នាក់ ដែលគ្រួសារ បាត់ គ្មានដំណឹង ថា តើនៅរស់ ឬក៏ស្លាប់។
នៅអ៊ីស្រាអែល ករណីចាប់ជំរិតជនជាតិអ៊ីស្រាអែល មិនមែនជារឿងថ្មីនោះទេ។ ប្រជាជនអ៊ីស្រាអែលឧស្សាហ៍ធ្លាប់ជួប ធ្លាប់ស្គាល់រឿងចាប់ជំរិត ដែលមេក្រុមចាប់ជំនិត គ្មានអ្នកណាក្រៅពី ចលនាប្រដាប់អាវុធប៉ាឡេស្ទីន។ នៅរាល់ការចាប់ជំរិតជនជាតិអ៊ីស្រាអែលម្តងៗ ភាគីប៉ាឡេស្ទីនតែងទាមទារឲ្យអ៊ីស្រាអែលដោះលែងអ្នកទោសប៉ាឡេស្ទីន ដែលអ៊ីស្រាអែលចាប់ដាក់ពន្ធនាគារក្នុងហេតុផលបង្កអសន្តិសុខ ឬធ្វើភេរវកម្មក្នុងទឹកដីអ៊ីស្រាអែល។
នៅក្នុងរយៈពេល ៣០ឆ្នាំចុងក្រោយនេះ អ៊ីស្រាអែលបានដោះលែងអ្នកទោសប៉ាឡេស្ទីនយ៉ាងតិច ៧០០០នាក់ ជាថ្នូរនឹងការដោះលែង ជនជាតិអ៊ីស្រាអែល ១៩នាក់ ដែលនៅក្នុងនោះភាគច្រើន ជាទាហានអ៊ីស្រាអែល។
ប្រជាជនអ៊ីស្រាអែល នៅចាំមិនភ្លេចករណី នាយទាហានGilad Shalit សញ្ជាតិពីរ បារាំង និងអ៊ីស្រាអែល ដែលត្រូវក្រុមហាម៉ាសប៉ាឡេស្ទីន ចាប់ជាចំណាប់ខ្មាំង និងលាក់ទុកក្នុងទឹកដីហ្កាហ្សាអស់រយៈពេល ៥ឆ្នាំ។
ជាផ្លូវការ រដ្ឋាភិបាលអ៊ីស្រាអែលបានបដិសេធមិនចរចា ជាមួយក្រុមហាម៉ាស ដែលអ៊ីស្រាអែលចាត់ទុកជាក្រុមភេរវនិយម។ ប៉ុន្តែ ការដាក់សម្ពាធរបស់ក្រុមគ្រួសារ របស់យុវជន Gilad Shalit និងមុខមាត់របស់កងទ័ពអ៊ីស្រាអែល ដែលត្រូវចេញមុខធានាសុវត្ថិភាពឲ្យសមាជិកទ័ពអ៊ីស្រាអែល បានធ្វើឲ្យរដ្ឋាភិបាលអ៊ីស្រាអែល ដោយមានការអន្តរាគមន៍ ជាអាជ្ញាកណ្តាលរបស់អេហ្ស៊ីប ជាមួយក្រុមអេស្បូឡា លីបង់ សុខចិត្តចរចា ដោះលែង អ្នកទោស ប៉ាឡេស្ទីនប្រមាណ ១០០០ពាន់ ជាថ្នូរនឹងសេរីភាពរបស់នាយទាហានអ៊ីស្រាអែល ១នាក់ គឺ Gilad Shalit នៅឆ្នាំ ២០១១។
លើកនេះ ក្រុមគ្រួសាររបស់អ្នកបាត់ខ្លួន និងចំណាប់ខ្មាំង ដែលត្រូវក្រុមហាម៉ាសចាប់នាំយកទៅលាក់ទុកនៅក្នុងទឹកដីហ្កាហ្សារំពឹងថា រដ្ឋាភិបាលអ៊ីស្រាអែល និងថ្នាក់ដឹកនាំរបស់ប្រទេសដែលមានជនជាតិរបស់ខ្លួនជាចំណាប់ខ្មាំងក្នុងដៃរបស់ពួកហាម៉ាស បើកការចរចាដើម្បីជំរុញ ការដោះលែងចំណាប់ខ្មាំង។
អ្នកជំនាញវាយតម្លៃថា រដ្ឋាភិបាលអ៊ីស្រាអែលទំនងលែងអនុវត្តមនោគមវិជ្ជារបស់ខ្លួនដែលថា ត្រូវតែការពាររាល់ជីវិតប្រជាជន ដែលជាប់ជាចំណាប់ខ្មាំង ទៀតហើយ ព្រោះថា បើមើលទៅលើចំនួនចំណាប់ខ្មាំងជាង ១២០នាក់ ដែលស្ថិតក្នុងដៃរបស់ក្រុមហាម៉ាស អ៊ីស្រាអែលត្រូវដោះលែង គ្មានសល់ អ្នកទោសប៉ាឡេស្ទីនដែលមួយចំនួនជាភេរវជន គ្រោះថ្នាក់សម្រាប់សន្តិសុខអ៊ីស្រាអែល។ ទីប្រឹក្សាសន្តិសុខជាតិរបស់រដ្ឋាភិបាលអ៊ីស្រាអែល បានប្រកាសនៅថ្ងៃសៅរ៍ម្សិលមិញថា រដ្ឋាភិបាលមិនអាចចរចាជាមួយសត្រូវដែលអ៊ីស្រាអែលសន្យាកម្ទេចឲ្យទៅជាផេះ បាត់ពីលើផែនដីនោះទេ។
តាមក្រុមហាម៉ាស ការវាយប្រហារផ្លូវអាកាសរបស់អ៊ីស្រាអែលលើទឹកដីហ្កាហ្សា នៅ៧ថ្ងៃមកនេះ បានសម្លាប់ចំណាប់ខ្មាំង ២២នាក់ ដែលជាជនជាតិអ៊ីស្រាអែល និងបរទេស។ នៅចំពោះមុខនៃការត្រៀមប្រយុទ្ធរបស់កងទ័ពថ្មើជើងអ៊ីស្រាអែលទៅក្នុងទឹកដីហ្កាហ្សា ដែលអាចគ្រោះថ្នាក់ ដោយជៀសមិនផុត ដល់ជីវិតចំណាប់ខ្មាំង ក្រុមគ្រួសាររបស់ចំណាប់ខ្មាំងខំប្រឹងប្រែងឲ្យអស់ពីសមត្ថភាពដែលមាន ដើម្បីសាច់ញាតិរបស់ខ្លួនមានជីវិតរស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ