រូងក្រោមដីក្នុងតំបន់ហ្កាហ្សាជាផ្ទាំងស៊ីប និងជាគ្រោះថ្នាក់ខ្លាំងរបស់ទាហានអ៊ីស្រាអែល?
សង្រ្គាមរវាងពួកហាម៉ាសប៉ាឡេស្ទីននៅតំបន់ហ្កាហ្សា និងអ៊ីស្រាអែលបានឈានចូលដល់ ១០ថ្ងៃក្នុងថ្ងៃចន្ទ ទី១៦ តុលា។ ក្នុងពេលដែលការវាយប្រហារតាមផ្លូវអាកាសលើតំបន់ហ្កាហ្សាកំពុងបន្តទាំងយប់ ទាំងថ្ងៃ កងទ័ពអ៊ីស្រាអែលក៏កំពុងត្រៀមបើកប្រតិបត្តិការផ្លូវគោកចូលហ្កាហ្សាដែរ។ តែក្នុងពេលរង់ចាំ កងទ័ពអ៊ីស្រាអែលកំពុងបន្តអំពាវនាវឲ្យពលរដ្ឋប៉ាឡេស្ទីនក្នុងតំបន់ហ្កាហ្សានៅប៉ែកខាងជើងចាកចេញទៅកាន់ប៉ែកខាងត្បូង។
ចុះផ្សាយនៅថ្ងៃ៖
ស្តាប់ - ០៣:៥៤
គោលដៅបន្ទាប់របស់កងទ័ពអ៊ីស្រាអែល គឺការវាយប្រហារតាមផ្លូវគោកចូលទៅកម្ទេចពួកហាម៉ាសដល់ក្នុងផ្ទះតែម្តង។ តែបើតាមមើលទៅ គោលដៅមួយនេះមិនមែនជារឿងងាយស្រួលទេ ព្រោះនៅតំបន់ហ្កាហ្សាមានបង្កប់ដោយផ្លូវក្រោមដី ឬរូងក្រោមដីច្រើនជាន់ និងខ្វាត់ខ្វែងរាប់សិបគីឡូម៉ែតដែលជីកដោយពួកហាម៉ាស។ កងទ័ពអ៊ីស្រាអែលបានហៅផ្លូវក្រោមដីនេះជាមេត្រូហ្កាហ្សា។ ផ្លូវក្រោមដីត្រូវបានពួកហាម៉ាសសាងសង់ក្នុងឆ្នាំ ២០០៧ ដែលជាឆ្នាំនៃការឡើងអំណាចរបស់ពួកគេនៅហ្កាហ្សា និងជាឆ្នាំដែលអ៊ីស្រាអែលបានបិទខ្ទប់ច្រកចេញចូលលើដីក្នុងតំបន់ហ្កាហ្សាទាំងមូល។
អ៊ីចឹងហើយបានជាពួកហាម៉ាសបានប្រើផ្លូវក្រោមដីនេះដើម្បីដឹកជញ្ជូនផលិតផលគ្រប់បែបយ៉ាងពីប្រទេសអេហ្ស៊ីបចូលហ្កាហ្សា ពិសេសស្បៀងសម្រាប់ផ្គត់ផ្គង់ដល់ជីវភាពរស់នៅប្រចាំថ្ងៃរបស់ពលរដ្ឋប៉ាឡេស្ទីននៅហ្កាហ្សា។ ទន្ទឹមគ្នានេះ ផ្លូវក្រោមដីដដែលនេះក៏ត្រូវបានពួកហាម៉ាសប្រើដើម្បីនាំចូលគ្រឿងសព្វាវុធ និងសារធាតុផ្ទុះគ្រប់ប្រភេទ រួមទាំងប្រើជាមូលដ្ឋានទ័ព ជាកន្លែងផលិតអាវុធ និងជាកន្លែងស្តុកអាវុធទៀតផង។ ក្រៅពីជីកសំដៅទៅអេហ្ស៊ីប ពួកហាម៉ាសក៏បានលួចជីកសំដៅទៅខ្សែព្រំដែនជាមួយអ៊ីស្រាអែលដែរ។ ក្នុងឆ្នាំ ២០១៣ កងទ័ពអ៊ីស្រាអែលបានរកឃើញផ្លូវក្រោមដីប្រវែង ២គីឡូម៉ែត្រកន្លះដែលតភ្ជាប់រវាងហ្កាហ្សា និងដែនដីអ៊ីស្រាអែល។
នៅក្នុងសង្រ្គាមអ៊ីស្រាអែល ហាម៉ាសឆ្នាំ ២០១៤ ពួកហាម៉ាសបានប្រើរូងក្រោមដីដើម្បីឆ្លងចូលក្នុងទឹកអ៊ីស្រាអែល។ កាលណោះ ពួកហាម៉ាសសម្លាប់បានទាហានអ៊ីស្រាអែលចំនួន ១១នាក់នៅក្នុងបាញ់ តទល់គ្នាចំនួន ៣ទីតាំងខុសគ្នា នេះបើតាមមជ្ឈមណ្ឌលយុទ្ធសាស្រ្តមួយក្នុងក្រុងតេឡាវី។ តាំងពីពេលនោះមក រដ្ឋាភិបាលអ៊ីស្រាអែលបានមធ្យោបាយគ្រប់បែបដើម្បីកម្ទេចផ្លូវក្រោមដីនៅហ្កាហ្សា។ ក្នុងឆ្នាំ ២០២១ អ៊ីស្រាអែលបានប្រកាសពីការវាយប្រហារផ្លូវអាកាសកម្ទេចបានផ្លូវក្រោមដីនៅហ្កាហ្សាជាង ១០០គីឡូម៉ែត្រ។ តែពួកហាម៉ាសបានឆ្លើយតបវិញពេលនោះថា កម្ទេចជាង ១០០គីឡូម៉ែត្រគឺស្មើនឹង ៥% នៃផ្លូវក្រោមដីដែលហ្កាហ្សាមានដល់ទៅ ៥០០គីឡូម៉ែត្រ។
តើហ្កាហ្សាមានផ្លូវក្រោមដី ឬរូងក្រោមដីប៉ុន្មានជាន់ មានជម្រៅប៉ុន្មានម៉ែត្រ មានប្រវែងប៉ុន្មានគីឡូម៉ែត្រ និងបានតភ្ជាប់ពីណាទៅណាខ្លះ?។ គឺមានតែពួកហាម៉ាសខ្លួនឯងដែលបានដឹងច្បាស់ និងស្គាល់ដូចបាតដៃ។ ចំណែកអ៊ីស្រាអែលបានដឹងដែរ តែដឹងត្រឹមមួយភាគ ដឹងមិនលំអិត និងដឹងមិនសូវស៊ីម្រៅ ទោះបីជាអ៊ីស្រាអែលបានប្រើមធ្យោបាយ និងបច្ចេកវិទ្យាគ្រប់បែបយ៉ាងដើម្បីស៊ើបអង្កេត តាមឃ្លាំមើលក៏ដោយ។ នៅក្នុងការត្រៀមបើកការវាយប្រហារផ្លូវគោកចូលហ្កាហ្សាលើកនេះ ការកម្ទេចផ្លូវក្រោមដី ឬរូងក្រោមដីនៅជាផ្ទាំងស៊ីបអាទិភាពរបស់កងទ័ពអ៊ីស្រាអែល។
តែក្រុមអ្នកជំនាញបានមើលឃើញថា ប្រតិបត្តិការសឹកមួយនេះអាចប្រើពេលយូរ លំបាក និងប្រកបដោយគ្រោះថ្នាក់ខ្លាំងសម្រាប់ទាហានអ៊ីស្រាអែល។ នៅខាងពួកហាម៉ាសវិញត្រូវបានក្រុមអ្នកជំនាញយល់ថា ក្រៅពីទទួលបានអត្ថប្រយោជន៍ រូងក្រោមដីក៏ជាអន្ទាក់ទាក់ខ្លួនឯងដែរ ព្រោះនៅពេលទាហានអ៊ីស្រាអែលរកឃើញផ្លូវចូលក្រោមដី ពួកគេនឹងបិទខ្ទប់ផ្លូវចេញ ចូលក្រោមដីនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ