ប្រមុខការទូតអាមេរិកព្យាយាមរំងាប់កំហឹងតួកគីនៅក្នុងបរិបទសង្រ្គាមអ៊ីស្រាអែល និងពួកហាម៉ាស
ប្រមុខការទូតអាមេរិកលោកអង់តូនី ប៊្លីនកិនកំពុងបន្តបំពេញទស្សនកិច្ចនៅក្នុងតំបន់មជ្ឈិមបូព៌ា។ បន្ទាប់ពីប្រទេសអ៊ីស្រាអែល ដែនដីប៉ាឡេស្ទីន ប្រទេសហ្សកដានី និងប្រទេសអ៊ីរ៉ាក់ លោកប៊្លីនកិនបានទៅប្រទេសតួកគីក្នុងថ្ងៃចន្ទ ទី៦ វិច្ឆិកា។ តាំងពីថ្ងៃផ្ទុះសង្រ្គាមរវាងអ៊ីស្រាអែល និងចលនាប៉ាឡេស្ទីនហាម៉ាសក្នុងថ្ងៃទី៧ តុលាមក នេះជាលើកទី១ ដែលប្រមុខការទូតអាមេរិកបានធ្វើដំណើរទៅកាន់ប្រទេសតួកគី។ នៅក្នុងទីក្រុងអង់ការ៉ា លោកប៊្លីនកិនត្រូវបានទទួលជួបដោយសមភាគីតួកគីលោកហាខាន ហ្វេដិន។
ចុះផ្សាយនៅថ្ងៃ៖
ស្តាប់ - ០២:៤១
ជំនួបរវាងលោកប៊្លីនកិន និងលោកហ្វេដិនបានធ្វើឡើង ខណៈដែលតួកគីកំពុងបន្តបញ្ចេញកំហឹងប្រឆាំងអ៊ីស្រាអែល និងបស្ចិមលោកទាក់ទងនឹងការវាយប្រហាររបស់កងទ័ពអ៊ីស្រាអែលលើតំបន់ហ្កាហ្សា។ កំហឹងរបស់តួកគីនេះត្រូវបានសម្តែងចេញពីចលនាបាតុកម្មរបស់មហាជន និងពីប្រធានាធិបតីលោកអ៊ែរដូហ្កាន។ នៅក្នុងពិធីជួបជុំជាមួយក្រុមអ្នកគាំទ្រលោកកាលពីថ្ងៃទី២៨ តុលា លោកអ៊ែរដូហ្កានបានចោទអ៊ីស្រាអែលពីបទកំពុងសម្លាប់រង្គាលប្រជាជនប៉ាឡេស្ទីននៅហ្កាហ្សា និងថា ទង្វើរបស់អ៊ីស្រាអែលលើហ្កាហ្សាជាឧក្រិដ្ឋកម្មសង្រ្គាម ពោលមិនមែនជាទង្វើការពារខ្លួនទេ។
បន្ទាប់មក មនុស្សខ្លាំងតួកគីរូបនេះបានចង្អុលមុខបស្ចិមលោក ពិសេសអាមេរិក និងសហភាពអឺរ៉ុបដែលបានគាំទ្រ និងលើកទឹកចិត្តឲ្យអ៊ីស្រាអែលវាយប្រហារឥតត្រាប្រណីលើតំបន់ហ្កាហ្សា។ មួយវិញទៀត ដើម្បីបង្ហាញសញ្ញាប្រឆាំងអាមេរិកបន្ថែមទៀត លោកអ៊ែរដូហ្កានបានជ្រើសយកថ្ងៃទស្សនកិច្ចរបស់ប្រមុខការទូតអាមេរិកលោកប៊្លីនកិននៅតួកគីក្នុងថ្ងៃចន្ទ ទី៦ វិច្ឆិកាដើម្បីធ្វើដំណើរទៅកាន់ភាគឦសានប្រទេស។ តែទោះជាមិនបានជួបលោកអ៊ែរដូហ្កានផ្ទាល់ក៏ដោយក៏លោកប៊្លីនកិនមិនបានបោះបង់គោលដៅនៃទស្សនកិច្ចរបស់លោកដែរ។ គោលដៅនោះ គឺព្យាយាមរំងាប់កំហឹងរបស់តួកគីដែលជាសម្ព័ន្ធមិត្តយុទ្ធសាស្រ្តម្នាក់របស់អាមេរិក និងក៏ជាសម្ព័ន្ធមិត្តម្នាក់ដ៏លំបាករបស់អាមេរិកដែរ។
គេមិនដឹងថា តើប្រមុខការទូតអាមេរិកអាចរំងាប់ភាពក្តៅក្រហាយរបស់តួកគីបានឬអត់ទេ។ អ្វីដែលគេអាចនិយាយបាន ក្នុងពេលដែលលោកប៊្លីនកិនបានបន្តបង្ហាញការគាំទ្រអ៊ីស្រាអែល និងធានាដល់បណ្តាប្រទេសក្នុងតំបន់ពីការគិតគូររបស់អាមេរិកដល់ការលំបាករបស់ជនស៊ីវិលប៉ាឡេស្ទីននៅហ្កាហ្សា លោកអ៊ែរដូហ្កានបានបញ្ជាក់ក្នុងថ្ងៃអាទិត្យ ទី៥ វិច្ឆិកាថា តួកគីបានធ្វើការងារជាមួយសម្ព័ន្ធមិត្តក្នុងតំបន់ដើម្បីធានាពីការផ្តល់ជំនួយមនុស្សធម៌ឥតដាច់ដល់ជនស៊ីវិលប៉ាឡេស្ទីននៅហ្កាហ្សា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ