ប្រមុខទូតបារាំង ទៅអ៊ីស្រាអែលនិងប៉ាឡេស្ទីន ព្រមទាំងអំពាវនាវបទឈប់បាញ់ជាបន្ទាន់
នៅថ្ងៃអាទិត្យ ទី១៧ធ្នូ រដ្ឋមន្ត្រីការបរទេសបារាំង បានអញ្ជើញដោយផ្ទាល់ទៅដល់ អ៊ីស្រាអែល និង ប៉ាឡេស្ទីន។ ក្នុងជំនួបជាមួយសមភាគីអ៊ីស្រាអែល អ្នកស្រី កាទ្រីន កូឡូនណា អំពាវនាវឲ្យបង្កើតបទឈប់បាញ់ ម្តងទៀត ជាបន្ទាន់។ ដូចប្រមុខការទូតបារាំងដែរ រដ្ឋមន្ត្រីការបរទេសអង់គ្លេស និង ប្រមុខការទូតអាល្លឺម៉ង់ គឺសុទ្ធតែអំពាវនាវតាមរយៈបណ្តាញសង្គម ស្នើឲ្យបង្កើតបទ«ឈប់បាញ់ជាប្រញាប់ និង រយៈពេលយូរ»។ ក៏ប៉ុន្តែ រដ្ឋមន្ត្រីការបរទេសអ៊ីស្រាអែល បញ្ជាក់ថា ប្រសិនបើឈប់បាញ់ គឺជា«កំហុស» និងជា«អំណោយដល់ក្រុមហាម៉ាស»។
ចុះផ្សាយនៅថ្ងៃ៖
ស្តាប់ - ០៣:០០
ពីដែនដីអ៊ីស្រាអែល រដ្ឋមន្ត្រីការបរទេសបារាំង បានលើកឡើងថា ប្រជាជនស៊ីវិល បានស្លាប់បាត់បង់ជីវិត អស់ច្រើននាក់ណាស់ ហើយអ្នកស្រី កាទ្រីន កូឡូនណា ក៏អំពាវនាវឲ្យភាគីជម្លោះ បង្កើតបទ«ឈប់បាញ់ជាប្រញាប់ និង រយៈពេលយូរ»។ ការអំពាវនាវឲ្យមានបទឈប់បាញ់ជាថ្មីនេះ ក៏ដ្បិតថា បទឈប់បាញ់លើកទី១ នាដើមខែធ្នូ បានធ្វើឲ្យមានការដោះលែងចំណាប់ថ្នូរ មនុស្សជាង១០០នាក់។ នៅពេលនេះ មានជនជាតិបារាំងច្រើននាក់ទៀត ដែលកំពុងជាប់ក្នុងចំណាប់ថ្នូររបស់ក្រុមអាម៉ាស។ ហេតុនេះ បន្ទាប់ពីជួបភាគីអ៊ីស្រាអែល គឺតម្រូវឲ្យរដ្ឋមន្ត្រីការបរទេសបារាំង អញ្ជើញជាបន្តទៅជួបភាគីអាជ្ញាធរប៉ាឡេស្ទីន ដើម្បីចរចា។
ឆ្លើយបកចំពោះការអំពាវនាវរបស់ប្រមុខទូតបារាំង រដ្ឋមន្ត្រីការបរទេសអ៊ីស្រាអែល លោក Eli Cohen បញ្ជាក់ទៅវិញថា ប្រសិនបើឈប់បាញ់ គឺជា«កំហុស» និងជា«អំណោយដល់ក្រុមហាម៉ាស»។ លើសពីនេះ នាយករដ្ឋមន្ត្រីអ៊ីស្រាអែល លោក បេនចាមិន នេតាន់យ៉ាហ៊ូ សង្កត់ធ្ងន់ កាលពីល្ងាចថ្ងៃសៅរ៍ ថានឹងតាមកម្ទេចពួកហាម៉ាសឲ្យដល់ទីបំផុត ហើយនិងនាំយកចំណាប់ថ្នូរមកវិញ ដោយប្រើកម្លាំងយោធា។
ទោះបីជាយ៉ាងនេះក្តី រដ្ឋមន្ត្រីការបរទេសអ៊ីស្រាអែល ក៏បានទទួលស្គាល់ដែរ ថា ប្រទេសបារាំង មាន«តួនាទីសំខាន់» ក្នុងការចរចាជាមួយពួក Hezbollah លីបង់។ ពួក Hezbollah លីបង់ ជាសម្ព័ន្ធរបស់ពួកក្រុមហាម៉ាស់ប៉ាឡេស្ទីន និងជា ក្រុមអ៊ីស្លាមនិកាយស៊ីអ៊ីត ដែលគាំទ្រដោយ អ៊ីរ៉ង់។ ពួកនេះបានបាញ់ផ្លោងជាញឹកញយនៅព្រំដែនអ៊ីស្រាអែល ដែលជាក្តីបារម្ភមួយរបស់ប្រទេសបច្ចិមលោក។ បារម្ភព្រោះខ្លាចក្រែងផ្ទុះជាសង្គ្រាមកាន់តែធំ និងច្រើនប្រទេសចូលរួម។ ដូច្នេះហើយទើប រដ្ឋមន្ត្រីការបរទេសបារាំង ក៏នឹងបន្តដំណើរទៅ ប្រទេសលីបង់ នៅថ្ងៃច័ន្ទ ទី១៨ធ្នូ។
ក្នុងកិច្ចចរចាសង្គ្រាមនេះដែរ នៅចុងសប្តាហ៍ លោក David Barnea ប្រមុខដឹកនាំចារកម្មអ៊ីស្រាអែល មូស្សាដ បានទៅជួបនឹងនាយករដ្ឋមន្ត្រីកាតារ។ កាតារ ដែលមានទឹកមាត់ប្រៃជាមួយ ប៉ាឡេស្ទីន និងជាអ្នកជ្រោមជ្រែងមួយ ក្នុងបទឈប់បាញ់លើកទី១ កាលពីដើមខែធ្នូ។ ចំណែកសហរដ្ឋអាមេរិក ក្នុងសប្តាហ៍នេះ រដ្ឋមន្ត្រីការពារជាតិ លោក ឡយដ៍ អូស្ទីន បានអញ្ជើញទៅអ៊ីស្រាអែល ប៉ារ៉ែន និង កាតារ ហើយរដ្ឋបាលអាមេរិក ក៏ជំរុញឲ្យ អ៊ីស្រាអែល គិតគូរពីមធ្យោបាយសង្គ្រោះជនស៊ីវិល នៅក្នុងប្រតិបត្តិការយោធានៅតំបន់ហ្កាហ្សា។
គួររំឭកថា សង្គ្រាមអ៊ីស្រាអែលនិងក្រុមហាម៉ាស បានឈានចូល ៧២ ថ្ងៃ ហើយសម្លាប់មនុស្ស អស់ ១ ១៤០ នាក់ នៅខាងអ៊ីស្រាអែល គឺស្លាប់អស់ប្រជាជនច្រើនជាងគេ នៅក្នុងប្រវត្តិសាស្ត្រ គិតចាប់តាំងពីអ៊ីស្រាអែលបង្កើតរដ្ឋ នៅឆ្នាំ១៩៤៨ មក។ ហើយចំណែកនៅខាងប៉ាឡេស្ទីន គឺបានបាត់បង់ជីវិតមនុស្ស ១៨ ៨០០ នាក់ ដែលភាគច្រើន ជាស្ត្រី កុមារ និងយុវជន។ នេះបើតាមអាជ្ញាធរសុខាភិបាលរបស់ក្រុមហាម៉ាសនៅតំបន់ហ្កាហ្សា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ