កងទ័ពបារាំងនៅសមុទ្រក្រហម បាញ់ទម្លាក់ដ្រូន២គ្រឿងរបស់ក្រុមហ៊ូទីយេម៉ែន
នាវាយាមល្បាតរបស់កងទ័ពបារាំង ប្រចាំនៅក្នុងសមុទ្រក្រហមតំបន់ដើមបូព៌ា បានបាញ់ទម្លាក់យានដ្រូន២គ្រឿង របស់ក្រុមហ៊ូទីយេម៉ែន។ ផ្អែកតាមលិខិតប្រកាស របស់សេនាធិការដ្ឋាននៃកងទ័ពបារាំង គឺការបាញ់ស្ទាក់កម្ទេចនេះ ត្រូវបានធ្វើឡើង ដោយនាវាយាមល្បាតកងកងទ័ពបារាំង Languedoc កាលពីយប់ថ្ងៃសៅរ៍ ឈានចូលថ្ងៃអាទិត្យទី១០ធ្នូ ចំងាយប្រមាណ១១០គីឡូម៉ែត្រ ពីឆ្នេរសមុទ្ររបស់យេម៉ែន មិនឆ្ងាយប៉ុន្មានពីកំពង់ផែ Hodeida ដែលជាតំបន់ស្ថិតក្រោមការកាន់កាប់របស់ក្រុមហ៊ូទី។
ចុះផ្សាយនៅថ្ងៃ៖
ស្តាប់ - ០២:៣២
សូមបញ្ជាក់ថា កាលពីថ្ងៃសៅរ៍ ក្រុមឧទ្ទាមហ៊ូទី ដែលគេស្គាល់ថាគឺជាកូនចៅរបស់អ៊ីរ៉ង់ បានប្រកាសគំរាមថា នឹងបាញ់កម្ទេចគ្រប់នាវាដឹកទំនិញទាំងអស់ នៅក្នុងសមុទ្រក្រហម ដែលបើកសំដៅចូលទៅអ៊ីស្រាអែល ប្រសិនបើប្រជាជនប៉ាឡេស្ទីននៅហ្កាហ្សា មិនទទួលបានជំនួយបន្ទាន់ទេនោះ។ ក្រោយការប្រកាសដូច្នេះ ក្រុមហាម៉ាស បានប្រកាសកោតសរសើរក្រុមឧទ្ទាមហ៊ូទី ថាមានភាពក្លាហាន ចូលរួមក្នុងខ្សែបណ្តាញតស៊ូប្រឆាំងអ៊ីស្រាអែល ដែលមាន ក្រុមហាម៉ាស ក្រុមហេសបូឡា និងក្រុមហ៊ូទី។
គួររំលឹកថា ការគំរាមរបស់ក្រុមហ៊ូទីនេះ បានធ្វើឲ្យស្ថានការណ៍សន្តិសុខនៅតំបន់សមុទ្រក្រហម កាន់តែជួបភាពតានតឹង។ ច្រកសមុទ្រក្រហម គឺជាផ្លូវឆ្លងកាត់នៃនាវាដឹកទំនិញអន្តរជាតិ ដ៏សំខាន់បំផុតមួយ។ ក្រុមហ៊ូទី ដែលគ្រប់គ្រងដែនដីភាគខាងជើងយេម៉ែន បានវាយប្រហារមកលើសន្តិសុខនាវាដឹកទំនិញអន្តរជាតិជាច្រើនដងមកហើយ។ កាលពីសប្តាហ៍មុន ក្រុមឧទ្ទាមហ៊ូទី បានវាយប្រហារទៅលើនាវាដឹកទំនិញមួយ ដោតទង់ជាតិបាម៉ាម៉ាស ដែលក្រុមហ៊ូទី ចោទថាជានាវាដឹកទំនិញអ៊ីស្រាអែល។ កាលពីថ្ងៃទី១៩វិច្ឆិកា ក្រុមហ៊ូទីបានប្លន់យកនាវាដឹកទំនិញមួយ ឈ្មោះ Galaxy Leader ដែលជាកម្មសិទ្ធិរបស់ក្រុមហ៊ុនអង់គ្លេសមួយ មានម្ចាស់ជាអ្នកជំនួញសញ្ជាតិអ៊ីស្រាអែល។
លោកប្រធានក្រុមប្រឹក្សាសន្តិសុខផ្ទៃក្នុងអ៊ីស្រាអែល បានចាត់ទុកសកម្មភាពគំរាមរបស់ក្រុមហ៊ូទី ថាគឺជាការបិទផ្លូវរាំងខ្ទប់អ៊ីស្រាអែល តាមច្រកសមុទ្រ។ កាលពីសប្តាហ៍មុនដែរ នាវាចម្បាំងរបស់កងទ័ពអាមេរិក ដែលយាមការពារសន្តិសុខនៅតំបន់សមុទ្រក្រមហម បានវាយកម្ទេចយានដ្រូនអត្តឃាតរបស់ក្រុមឧទ្ទាមហ៊ូទី ចំនួន៣គ្រឿង។ ក្រៅពីប្រើយានដ្រូនមកបាញ់បំផ្ទុះនាវាដឹកទំនិញ ក្រុមហ៊ូទីកូនចៅអ៊ីរ៉ង់ ក៏បានបាញ់មីស៊ីលជាច្រើនគ្រាប់ សំដៅទៅអ៊ីស្រាអែលដែរ តែភាគច្រើនត្រូវប្រព័ន្ធខែលមីស៊ីលអ៊ីស្រាអែល និងនាវាចម្បាំងអាមេរិកស្ទាក់កំទេចបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ