អ៊ីស្រាអែលបង្កើនការវាយប្រហារដ៏សន្ធឹកលើហ្កាហ្សា បន្ទាប់ពីការចរចាដោះដូរចំណាប់ខ្មាំងឈានដល់ផ្លូវទ័ល
អ៊ីស្រាអែលនៅតែសម្រុកវាយប្រហារតាមផ្លូវអាកាសផ្លូវគោកទៅលើហ្កាហ្សា នោះបើទោះបីជាមានការអំពាវនាវពីសហគមន៍អន្តរជាតិឲ្យអ៊ីស្រាអែលគិតពីសុវត្ថិភាពរបស់ប្រជាជនស៊ីវិលប៉ាឡេស្ទីន។ នៅក្រោយការផ្អាកបាញ់មនុស្សធម៌មួយសប្តាហ៍ដើម្បីឈានទៅដោះដូរចំណាប់ខ្មាំង និងអ្នកទោសប៉ាឡេស្ទីន អ៊ីស្រាអែលនិងពួកហាម៉ាសចាប់ផ្តើមប្រយុទ្ធគ្នាសាជាថ្មីឡើង និងកាន់តែខ្លាំងក្លាជាងមុន។ ខណៈពេលដែលភាគីជម្លោះទាំងពីរទម្លាក់កំហុសដាក់គ្នាពីការរំលោភបទឈប់បាញ់ ប៉ុន្តែ គេជឿថា អ៊ីស្រាអែលចាប់ផ្តើមវាយប្រហារដ៏សន្ធប់ខ្លាំងទៅលើក្រុមហាម៉ាសនៅហ្កាហ្ស បន្ទាប់ពីការចរចានៅកាតាដើម្បីការផ្អាកបាញ់សាជាថ្មី ជាថ្នូរនឹងការដោះលែងចំណាប់ខ្មាំងឈានដល់ផ្លូវទ័លគ្មានច្រកចេញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៣៤
គ្រាន់តែបទឈប់បាញ់មនុស្សធម៌ចប់ភ្លាម នៅថ្ងៃសុក្រ អ៊ីស្រាអែលនិងក្រុមហាម៉ាសលើកអាវុធវាយប្រហារគ្នាដោយមិនបន្ថយដៃ។ ខណៈពេលដែល ក្រុមហាម៉ាសនិងក្រុមជីហាតអ៊ីស្លាមដែលជាដៃគូប្រកាសបាញ់គ្រាប់រ៉ូក្កែតសំដៅទឹកដីអ៊ីស្រាអែល ជាពិសេសទីក្រុងតែលអាវីវ ប្រជាជនប៉ាឡេស្ទីននៅក្នុងតំបន់ហ្កាហ្សាយល់ថា ការវាយប្រហាររបស់អ៊ីស្រាអែល នៅក្រោយបទឈប់បាញ់ គឺសន្ធឹកខ្លាំងក្លាជាងពេលណាៗទាំងអស់ គិតចាប់តាំងអ៊ីស្រាអែលផ្តើមសង្រ្គាមប្រឆាំងក្រុមហាម៉ាសកាលពីដើមខែតុលា។
នៅព្រឹកថ្ងៃអាទិត្យ កងទ័ពអ៊ីស្រាអែលនៅតែបន្តជញ្ជ្រុំទម្លាក់គ្រាប់បែក បាញ់គ្រាប់ផ្លោងទៅលើទឹកដីហ្កាហ្សា ដោយមិនខ្វល់ពីការអំពាវនាវរបស់សហគមន៍អន្តរជាតិដែលទាមទារឲ្យអ៊ីស្រាអែលគិតគូរការពារជីវិតប្រជាជនស៊ីវិលប៉ាឡេស្ទីន។ តាមកងទ័ពអ៊ីស្រាអែល គិតចាប់តាំងពីថ្ងៃសុក្រ ថ្ងៃចប់ការផ្អាកបាញ់មនុស្សធម៌ អ៊ីស្រាអែលវាយប្រហារទៅលើទីតាំងរបស់ពួកហាម៉ាសជាង៤០០កន្លែង នៅក្នុងទឹកដីហ្កាហ្សា ប៉ុន្តែ ក្រសួងសុខាភិបាលហាម៉ាសវិញ អះអាងថា ការវាយប្រហាររបស់អ៊ីស្រាអែលនៅ២ថ្ងៃមកនេះសម្លាប់មនុស្សយ៉ាងតិច២៤០នាក់។
ការវាយប្រហាររបស់កងទ័ពអ៊ីស្រាអែលនៅពីរថ្ងៃមកនេះលែងផ្តោតសំខាន់តែនៅតំបន់ភាគខាងជើងហ្កាហ្សាដូចមុន ប៉ុន្តែ រាលដាលមកដល់តំបន់ភាគខាងត្បូងជាប់ជាមួយព្រំដែនអេហ្ស៊ីប ជាទីដែលអ៊ីស្រាអែលធ្លាប់បញ្ជាប្រាប់ឲ្យប្រជាជនប៉ាឡេស្ទីនរត់មកជ្រកកោន ដើម្បីគេចពីការទម្លាក់គ្រាប់នៅភាគខាងជើងហ្កាហ្សា។ សម្រាប់ប្រជាជនប៉ាឡេស្ទីន ពួកគេអស់សង្ឃឹម គ្មានកន្លែងណាត្រូវទៅជ្រកដើម្បីសុវត្ថិភាពទៀតទេ ព្រោះសូម្បីតែទីក្រុង Khan Youes និងRafahនៅជាប់ព្រំដែនអេហ្ស៊ីបក៏ក្លាយជាតំបន់សង្រ្គាម គោលដៅវាយប្រហាររបស់អ៊ីស្រាអែលដែរ។
កងទ័ពអ៊ីស្រាអែលពង្រីកការវាយប្រហារទៅលើទឹកដីហ្កាហ្សានៅក្នុងគោលដៅពីរ។ នេះបើតាមរដ្ឋមន្រ្តីការពារជាតិអ៊ីស្រាអែល។ ទីមួយគឺវាយប្រហារក្រុមហាម៉ាស សម្លាប់ពួកភេរវជនឲ្យបានច្រើនបំផុត បំផ្លាញហេដ្ឋារចនាសម្ព័ន្ធ ដើម្បីលែងឲ្យមានទីបញ្ជាការដ្ឋាន រូងក្រោមដីរបស់ពួកហាម៉ាសតទៅទៀត។ ទី២គឺបង្កើតបរិយាកាសដាក់សម្ពាធលើក្រុមហាម៉ាសឲ្យដោះលែងចំណាប់ខ្មាំង។ សម្រាប់នាយករដ្ឋមន្រ្តីអ៊ីស្រាអែល ប្រតិបត្តិការយោធាជើងគោកជាមធ្យោបាយតែមួយគត់ដើម្បីអាចសម្រេចគោលដៅខាងលើ ជាមួយនឹងការគោរពច្បាប់អន្តរជាតិ។
អ៊ីស្រាអែលបង្កើនការវាយប្រហារសន្ធប់ខ្លាំងលើហ្កាហ្សា នៅបន្ទាប់ពីការចរចាដើម្បីការផ្អាកបាញ់សាជាថ្មី។ នៅថ្ងៃសៅរ៍ ប្រតិភូអ៊ីស្រាអែលទទួលបន្ទុកការចរចាដើម្បីដោះលែងចំណាប់ខ្មាំង បានចាកចេញពីកាតា នៅបន្ទាប់ពីភាគីជម្លោះទាំងពីរ អ៊ីស្រាអែល និងហាម៉ាសនិយាយមិនត្រូវគ្នាពីលក្ខខណ្ឌដោះលែងចំណាប់ខ្មាំងទល់នឹងអ្នកទោសប៉ាឡេស្ទីន។ ម្យ៉ាង អ៊ីស្រាអែលបានចោទក្រុមហាម៉ាសថា រំលោភបទឈប់បាញ់។
ដោយពង្រីកការវាយប្រហាររបស់អ៊ីស្រាអែលទៅលើហ្កាហ្សាខាងត្បូងដែលជាកន្លែងប្រមូលផ្តុំប្រជាជនប៉ាឡេស្ទីនដែលរត់ភៀសខ្លួនចេញពីភាគខាងជើង ដោយមិនខ្វល់ពីអាយុជីវិតរបស់ប្រជាជនស៊ីវិលកំពុងធ្វើឲ្យមានការចោទសំនួរពីគោលដៅចង់បានពិតប្រាកដរបស់អ៊ីស្រាអែលនៅក្នុងការធ្វើសង្រ្គាមហ្កាហ្សា។ នៅក្នុងសន្និសីទកាសែតដែលធ្វើឡើងនៅក្រៅក្របខ័ណ្ឌជំនួបកំពូលស្តីពីអាកាសធាតុនៅអេមីរ៉ាតអារ៉ាប់រួម ប្រធានាធិបតីបារាំង លោកម៉ាក្រុងបានទាមទារឲ្យអ៊ីស្រាអែលកំណត់ច្បាស់ៗពីគោលដៅចង់បានរបស់ខ្លួន ព្រោះថា សន្តិសុខរបស់អ៊ីស្រាអែលមិនអាចត្រូវធានាបានឡើយ បើសិនមានការបាត់បង់ជីវិតប្រជាជនប៉ាឡេស្ទីន។ ប្រធានាធិបតីបារាំងបានព្រមានដែរថា ប្រសិនបើអ៊ីស្រាអែលនៅតែដៅចង់កម្ទេចក្រុមហាម៉ាសទាំងស្រុង នោះសង្រ្គាមនឹងអូសបន្លាយយ៉ាងតិច១០ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ