អ៊ីរ៉ង់គំរាមវាយប្រហារ អ៊ីស្រាអែលពង្រឹងប្រព័ន្ធការពារដែនអាកាសនិងហាមមិនឲ្យកងទ័ពសុំច្បាប់សម្រាក
ពាក្យគំរាមរបស់អ៊ីរ៉ង់ដែលថា នឹងសងសឹកដាក់ទោសអ៊ីស្រាអែល ដែលបានវាយប្រហារស្ថានកុងស៊ុល និងសម្លាប់មេឆ្មាំបដិវត្តន៍ កាលពីថ្ងៃទី ១ខែមេសានេះ គឺជារឿងពិត និងគួរឲ្យជឿទុកចិត្ត។ នេះបើតាមការអះអាងរបស់អ្នកនាំពាក្យសេតវិមាន។ បន្ទាប់ពីធ្វើបុណ្យសពឲ្យសមាជិកឆ្មាំបដិវត្តនៅទីក្រុងតេហេរ៉ង់ ថ្នាក់ដឹកនាំអ៊ីរ៉ង់បានព្រមានម្តងហើយម្តងទៀតថា នឹងវាយប្រហារចាស់ដៃទៅលើអ៊ីស្រាអែលដើម្បីសងសឹកឲ្យវីរជនរបស់ខ្លួន។ នៅថ្ងៃពុធកន្លងទៅ លោក ចូបៃដិននិយាយថា អាមេរិកនឹងនៅតែការពារសន្តិសុខអ៊ីស្រាអែល។ នៅចំពោះមុខការគំរាមកំហែងរបស់អ៊ីរ៉ង់ រដ្ឋមន្រ្តីការពារជាតិអ៊ីស្រាអែលបាននិយាយកាលពីថ្ងៃសុក្រទី១២មេសាថា អ៊ីស្រាអែល និងអាមេរិកកៀកស្មាគ្នាដើម្បីប្រឈមទប់ទល់អ៊ីរ៉ង់។ នៅចំពោះមុខស្ថានការណ៍កាន់តែរំជើបរំជួលនៅដើមបូព៌ា ដោយសារការគំរាមវាយប្រហារគ្នារវាងអ៊ីស្រាអែល និងអ៊ីរ៉ង់ បារាំងឯណោះវិញបានអំពាវនាវឲ្យប្រជាជនរបស់ខ្លួន ផ្អាក ធ្វើដំណើរទៅអ៊ីរ៉ង់ លីបង់ អ៊ីស្រាអែលនិងទឹកដីហ្កាហ្សា ចំណែកក្រុមហ៊ុនហោះហើរ អាល្លឺម៉ង់ប្រកាសផ្អាកការហោះហើរទៅអ៊ីរ៉ង់ រហូតដល់សប្តាហ៍ក្រោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៤:១៣
ស្ថានការណ៍នៅតំបន់ដើមបូព៌ាកាន់តែពុះកញ្រ្ជោលខ្លាំង បន្ទាប់ពីអ៊ីរ៉ង់គំរាមវាយប្រហារសងសឹកអ៊ីស្រាអែល រឿងបាញ់កម្ទេចស្ថានកុងស៊ុលនៅស៊ីរី ដែលបានសម្លាប់មេឆ្មាំបដិវត្តន៍អ៊ីរ៉ង់៦នាក់កាលពីថ្ងៃទី១ខែមេសា។ នៅសប្តាហ៍នេះ ប្រមុខសាសនាអ៊ីរ៉ង់ ខាមេណី និងប្រធានាធិបតីអ៊ីរ៉ង់ប្រកាសសងសឹកឲ្យវីរជនឆ្មាំបដិវត្តន៍ដែលស្លាប់ក្នុងការវាយប្រហារ ដែលអ៊ីរ៉ង់ចាត់ទុកថា ជាស្នាដៃរបស់អ៊ីស្រាអែល។ សម្រាប់ប្រមុខសាសនាអ៊ីរ៉ង់ អ៊ីស្រាអែលត្រូវតែទទួលទោស។ គេនឹងដាក់ទោសលើអ៊ីស្រាអែល។
នៅថ្ងៃព្រហស្បតិ៍កន្លងទៅ រដ្ឋមន្រ្តីការបរទេសអ៊ីរ៉ង់និយាយថា បន្ទាប់ពីក្រុមប្រឹក្សាសន្តិសុខបរាជ័យមិនចាត់វិធានការអ្វីសោះ អ៊ីរ៉ង់ហាក់គ្មានជម្រើសអ្វីផ្សេង ក្រៅតែពីវាយប្រហារតបតទៅលើអ្នកដែលបានសម្លាប់មន្រ្តីទូតអ៊ីរ៉ង់។
នៅក្នុងសន្និសីទកាសែត កាលពីថ្ងៃសុក្រ អ្នកនាំពាក្យរបស់សេតវិមាន លោកចន ឃើប៊ីបាននិយាយថា ពាក្យគំរាមវាយប្រហាររបស់អ៊ីរ៉ង់លើកនេះ គឺពិត និងគួរឲ្យជឿទុកចិត្តបាន។ លោកចន ឃើប៊ីនៅបានបន្ថែមថា លោកប្រធានាធិបតី ចូ បៃដិនបានទទួលដំណឹងជាបន្តបន្ទាប់ពីក្រុមប្រឹក្សាសន្តិសុខជាតិរបស់លោក និងថា អាមេរិកចង់ធ្វើគ្រប់បែបយ៉ាងដើម្បីធានាថា អ៊ីស្រាអែលអាចការពារខ្លួន។ នៅថ្ងៃពុធ កន្លងទៅ ប្រធានាធិបតីអាមេរិក លោកចូ បៃដិនបាននិយាយថា អ៊ីរ៉ង់នឹងធ្វើការវាយប្រហារធំមួយទៅលើអ៊ីស្រាអែល។ ប៉ុន្តែ លោកចូ បៃដិនសន្យាថា អាមេរិកនឹងជួយគាំទ្រអ៊ីស្រាអែលដោយមិនបន្ថយដៃឡើយ។ សេតវិមានមិនបានបញ្ជាក់ថា តើអាមេរិកនឹងប្រកាន់ជំហរយ៉ាងណាដើម្បីជួយអ៊ីស្រាអែលនោះទេ។ ប៉ុន្តែ នៅថ្ងៃសុក្រ មេបញ្ជាការកងទ័ពអាមេរិកប្រចាំតំបន់ដើមបូព៌ា លោកMichael Erik Kurilla បានធ្វើដំណើរទៅអ៊ីស្រាអែល ដើម្បីជួបពិភាក្សាជាមួយរដ្ឋមន្រ្តីការពារជាតិអ៊ីស្រាអែលស្តីពីការគំរាមកំហែងសន្តិសុខនៅក្នុងតំបន់។ នៅក្នុងកិច្ចសន្ទនាជាមួយសមភាគីអាមេរិក រដ្ឋមន្រ្តីការពារជាតិអ៊ីស្រាអែល លោកYaov Gallantបានសង្កត់ធ្ងន់ថា ប្រសិនបើអ៊ីរ៉ង់ចេញមុខដោយផ្ទាល់ វាយប្រហារអ៊ីស្រាអែល នោះអ៊ីស្រាអែលនឹងវាយតបតវិញ។ ដោយលើកឡើងពីការកៀកស្មាជាមួយអាមេរិក ប្រមុខការពារជាតិអ៊ីស្រាអែលអះអាងថា អ៊ីស្រាអែលត្រៀមខ្លួន ត្រៀមគ្រប់សេណារីយ៉ូ និងថា អ៊ីស្រាអែលមានសមត្ថភាពគ្រប់គ្រាន់ដើម្បីវាយបកវិញ ក្នុងករណីអ៊ីរ៉ង់វាយប្រហារលើទឹកដីអ៊ីស្រាអែល។ នៅចំពោះមុខការគំរាមកំហែងរបស់អ៊ីរ៉ង់ អ៊ីស្រាអែលស្ថិតនៅក្នុងស្ថានភាពប្រកាសអាសន្នជាប់ជានិច្ច និងបានពង្រឹងប្រព័ន្ធការពារដែនអាកាសរបស់ខ្លួន និងផ្អាកមិនឲ្យទាហានឈប់សម្រាក។
ការឆេះរាលដាលសង្រ្គាមហ្កាហ្សា ទៅជាសង្រ្គាមក្នុងតំបន់ដើមបូព៌ា គឺជាអ្វីដែលសហគមន៍អន្តរជាតិព្រួយបារម្ភ បន្ទាប់ពីអ៊ីស្រាអែល មិនត្រឹមតាមកម្ទេចក្រុមហាម៉ាសនៅហ្កាហ្សា ប៉ុន្តែ នៅបានវាយប្រហារទៅលើក្រុមហេសបូឡាលីបង់ និងទីតាំងយោធារបស់អ៊ីរ៉ង់ នៅក្នុងទឹកដីស៊ីរី។
ស្ថិតក្នុងស្ថានភាពដ៏គួរឲ្យគ្រោះថ្នាក់ ប្រទេសធំមួយចំនួន តាំងពីឥណ្ឌា បារាំង អាល្លឺម៉ង់ អ៊ីតាលី រុស្ស៊ី បានអំពាវនាវឲ្យភាគីជម្លោះ អត់ធ្មត់។ អាមេរិក និងចិនវិញ បានបោះសំដីដាក់គ្នា ព្រោះថា នៅពេលអាមេរិកតាមរយៈរដ្ឋមន្រ្តីការបរទេស ទាមទារឲ្យចិនអន្តរាគម និយាយបញ្ចុះបញ្ចូលអ៊ីរ៉ង់ដែលជាអ្នកលក់ប្រេងឲ្យចិន ប៉េកាំងវិញតាមរយៈអ្នកនាំពាក្យការបរទេសបានតបវិញថា អាមេរិកត្រូវដើរតួនាទីស្ថាបនានៅតំបន់ដើមបូព៌ា។ ម្យ៉ាង កំរិតស្អប់គំរាមកំហែងគ្នារវាងអ៊ីស្រាអែល និងអ៊ីរ៉ង់កើតឆ្លងចេញមកពីជម្លោះនៅហ្កាហ្សា។ ដូច្នេះ គេចាំបាច់ត្រូវបិទបញ្ចប់សង្រ្គាមនៅហ្កាហ្សាឲ្យបានឆាប់បំផុត។
ដោយសារតែស្ថានការណ៍កាន់តែឡើងក្តៅនៅដើមបូព៌ា បារាំងជាដើមបានអំពាវនាវឲ្យប្រជាជនរបស់ខ្លួនផ្អាកធ្វើដំណើរទៅអ៊ីស្រាអែល លីបង់ អ៊ីរ៉ង់ និងទឹកដីហ្កាហ្សា។ មួយវិញទៀត គ្រួសាររបស់មន្រ្តីទូតបារាំងនៅក្នុងទឹកដីអ៊ីស្រាអែលត្រូវចាកចេញឲ្យបានឆាប់ពីទឹកដីអ៊ីស្រាអែល។ សហរដ្ឋអាមេរិកវិញបានប្រាប់ប្រជាជនរបស់ខ្លួននៅក្នុងទឹកដីអ៊ីស្រាអែលឲ្យកាត់បន្ថយការធ្វើដំណើរក្រៅផ្ទះ ក្រៅស្ថានទូតបើសិនគ្មានការចាំបាច់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ