ក្រោយការវាយប្រហាររបស់អ៊ីរ៉ង់ អ៊ីស្រាអែលស្ថិតនៅចំពោះមុខជំរើស២ដ៏គ្រោះថ្នាក់
គិតមកត្រឹមពេលនេះ ២ថ្ងៃក្រោយអ៊ីរ៉ង់បញ្ជាដ្រូននិងមីស៊ីលសរុបជាង៣០០គ្រាប់ បាញ់ឆ្ពោះមកលើអ៊ីស្រាអែល រដ្ឋាភិបាលរបស់ណេតាន់យ៉ាហ៊ូ នៅមិនទាន់សម្រេច ឬប្រកាសអ្វីទាំងអស់ ទាក់ទិននឹងការឆ្លើយតបទៅលើអ៊ីរ៉ង់វិញ។ តើអ៊ីស្រាអែល នឹងស្ងាត់ត្រឹមនេះ ឬមួយអ៊ីស្រាអែល និងវាយប្រហារលើទឹកដីអ៊ីរ៉ង់ដើម្បីសងសិកវិញ? នេះគឺជាជម្រើសដ៏លំបាកចំនួន២ ដែលរដ្ឋាភិបាលលោកណេតាន់យ៉ាហ៊ូ កំពុងតែប្រឈម ខណៈសហគមន៍អន្តរជាតិ ព្រួយបារម្ភកាន់តែខ្លាំង អំពីសង្គ្រាមឆាបឆេះរាលដាល។
ចុះផ្សាយនៅថ្ងៃ៖
ស្តាប់ - ០៥:១៦
ការវាយប្រហាររបស់អ៊ីរ៉ង់ កាលពីយប់ថ្ងៃសៅរ៍ឈានចូលថ្ងៃអាទិត្យ បានធ្វើឲ្យអ៊ីស្រាអែលត្រូវស្ថិតនៅចំពោះមុខការសម្រេចចិត្តដ៏លំបាក។ បើអ៊ីស្រាអែលវាយបកទៅលើអ៊ីរ៉ង់វិញ នោះសង្គ្រាមប្រាកដជាឆេះរាលផ្ទុះសន្ធៅឡើង ក្នុងតំបន់ដើមបូព៌ាជាក់ជាមិនខាន។ តែបើអ៊ីស្រាអែលសុខចិត្តខាំមាត់នៅស្ងៀម នោះមានន័យថា អ៊ីស្រាអែលសុខចិត្តឲ្យអ៊ីរ៉ង់យកទំលាប់ថ្មីនេះ ទៅធ្វើទៀតនៅថ្ងៃខាងមុខ។ ពោលគឺអ៊ីរ៉ង់នឹងប្រើដ្រូន ប្រើមីស៊ីលបាញ់មកលើទឹកដីអ៊ីស្រាអែលដោយផ្ទាល់តែម្តង នៅរាល់ពេលដែលអ៊ីស្រាអែល វាយប្រហារទីតាំងផលប្រយោជន៍អ៊ីរ៉ង់នៅក្រៅប្រទេស។
គួរបញ្ជាក់ថា សហរដ្ឋអាមេរិកដែលជាសម្ព័ន្ធមិត្តរបស់អ៊ីស្រាអែល មិនចង់ឃើញភ្លើងសង្គ្រាមឆាបឆេះនៅតំបន់ដើមបូព៌ា ថែមមួយទៀតទេ។ ម៉ោង២និង៣០នាទីរំលងអាធ្រាត្រ ថ្ងៃសៅរ៍ឈានចូលថ្ងៃអាទិត្យ លោកណេតាន់យ៉ាហ៊ូ បានទូរស័ព្ទនិយាយជាមួយលោកចូ បៃដិន។ បើផ្អែកតាមការចុះផ្សាយរបស់គេហទំព័រ Axios គឺលោកចូបៃដិនបាន ប្រាប់ទៅលោកណេតាន់យ៉ាហ៊ូ ថាមិនត្រូវវាយបកទៅវិញជាដាច់ខាត។
គិតមកដល់ព្រឹកថ្ងៃចន្ទទី១៥មេសា គឺគ្មានការការសម្រេចអ្វីទាំងអស់ពីរដ្ឋាភិបាលអ៊ីស្រាអែល។ ក្រុមប្រឹក្សាសង្គ្រាមបានប្រជុំចប់ តែដោយគ្មានប្រកាសអ្វីទាំងអស់។ លោកណេតាន់យ៉ាហ៊ូ បានត្រឹមចេញលិខិតប្រកាសខ្លីមួយ ដែលសរសេរថា “យើងបានចាប់ស្ទាក់បានសឹងទាំងអស់ ការសាមគ្គីរួមគ្នានឹងធ្វើឲ្យយើងឈ្នះ”។
ភាពស្ងាត់ស្ងៀមរបស់រដ្ឋាភិបាលអ៊ីស្រាអែលនេះ បានធ្វើឲ្យមានពាក្យចចាមអារ៉ាមជាច្រើន ដែលលើកឡើងពីគំនិតខុសៗគ្នា នៃឥស្សរៈជនសមាជិកក្រុមប្រឹក្សាសង្គ្រាមអ៊ីស្រាអែល។ បណ្តាញសារព័ត៌មានអ៊ីស្រាអែល បានចុះផ្សាយនៅព្រឹកថ្ងៃចន្ទ ដោយស្រង់ប្រភពពីមន្ត្រីយោធាមួយចំនួន ដែលថាសមាជិកភាគច្រើននៃក្រុមប្រឹក្សាសង្គ្រាម បានរុញគ្នាថា “ តោះកុំបង្អង់! ត្រូវតែវាយអ៊ីរ៉ង់នៅពេលនេះឲ្យចាស់ដៃបំផុត ព្រោះវាជាឱកាសហើយ”។ មន្ត្រីយោធាអ៊ីស្រាអែលខាងលើបានបង្ហាញការព្រួយបារម្ភ ក្នុងករណីដែលអ៊ីស្រាអែលវាយបកវិញដោយកំហឹង ដោយតក់ក្រហល់ ដោយមិនបានគិតឲ្យវែងឆ្ងាយអំពីផលវិបាក។
ការពិតទៅ រដ្ឋបាលលោកចូ បៃដិនបារម្ភណាស់ ខ្លាចក្រែងលោកណាតាន់យ៉ាហ៊ូ ពង្រីកសមរភូមិសង្គ្រាមជាមួយអ៊ីរ៉ង់ បន្ថែមជាពីលើសមរភូមិនៅហ្កាហ្សា ព្រោះថាវាគឺជាឱកាសល្អមែនសម្រាប់លោកណេតាន់យ៉ាហ៊ូ ដែលចង់កំទេចសមត្ថភាពនុយក្លេអ៊ែររបស់អ៊ីរ៉ង់។ គ្រប់គ្នាដឹងច្បាស់ ថាលោកណេតាន់យ៉ាហ៊ូ និងក្រុមស្តាំនិយមជ្រុលអ៊ីស្រាអែល ស្អប់របបអ៊ីស្លាមផ្តាច់ការអ៊ីរ៉ង់កម្រិតណា ហើយព្រួយបារម្ភកម្រិតណាប្រសិនបើអ៊ីរ៉ង់មានអាវុធនុយក្លេអ៊ែរ។ គេនៅចាំបាន ថាកាលពីចុងឆ្នាំ២០២០ លោកណេតាន់យ៉ាហ៊ូ ធ្លាប់បានបបួលលោកដូណាល់ត្រាំ ឲ្យរួមគ្នាវាយកំទេចទីតាំងនុយក្លេអ៊ែរ និងមីស៊ីលបាលីស្ទីកអ៊ីរ៉ង់។
ទន្ទឹមគ្នានេះ លោកណេតាន់យ៉ាហ៊ូ កំពុងរងសំពាធខ្លាំង ពីក្រុមស្តាំនិយមជ្រុលដែលជាសមាជិករដ្ឋាភិបាលចម្រុះ។ ជាក់ស្តែង លោក Itmar Ben Gvir រដ្ឋមន្ត្រីសន្តិសុខជាតិ បានប្រកាសដាច់ណាត់កាលពីថ្ងៃអាទិត្យថា អ៊ីស្រាអែលត្រូវតែយកឱកាសនេះ ស្រោចស្រង់កិត្តិយសវិញ ធ្វើឲ្យគ្រប់គ្នានៅតំបន់ដើមបូព៌ាកោតខ្លាចកម្លាំងអ៊ីស្រាអែល។ ដូចគ្នាដែរ លោក Naftali Bennett អតីតនាយករដ្ឋមន្ត្រីស្តាំនិយមជ្រុលសាសនា បានលើកឡើងថា “ អ៊ីស្រាអែលមិនអាចសប្បាយចិត្តស្ងប់ចិត្ត ដោយគ្រាន់តែបាញ់ស្ទាក់ស្កាត់ដ្រូន និងមីស៊ីលអ៊ីរ៉ង់បានជោគជ័យប៉ុណ្ណោះទេ។ ត្រឹមទប់គ្រាប់របស់សត្រូវបាន គេមិនហៅថាបានឈ្នះសង្គ្រាមឡើយ ចង់ឈ្នះគឺទាល់តែធ្វើឲ្យសត្រូវខ្លាចលែងហ៊ាន”។
ដោយឡែក លោក Benny Gantz អតីតអគ្គមេបញ្ជាការកងទ័ពអ៊ីស្រាអែល ថ្វីបើមានគោលជំហរ ចង់ឲ្យអ៊ីស្រាអែលវាយបកទៅលើអ៊ីរ៉ង់វិញ តែលោកមានយោបល់ថា ត្រូវពិចារណាឲ្យគ្រប់ជ្រុងជ្រោយ កុំប្រញេបប្រញាប់។ លោក Benny Gantz បានលើកឡើងថា អ៊ីស្រាអែលត្រូវប្រមូលកម្លាំងពីសម្ព័ន្ធមិត្ត ព្រោះថាអ៊ីរ៉ង់គឺជាគ្រោះថ្នាក់គំរាមសន្តិសុខតំបន់ដើមបូព៌ាទាំងមូល មិនមែនគំរាមតែអ៊ីស្រាអែលតែម្នាក់ឯងឡើយ។ ក្នុងន័យនេះ អ៊ីស្រាអែលត្រូវប្រើប្រាស់ អត្ថប្រយោជន៍ដែលបានមក សន្ធិសញ្ញាសន្តិភាពជាមួយហ្សកដានីដែលចុះនៅឆ្នាំ១៩៩៤ ព្រមទាំងកិច្ចព្រមព្រៀងភ្ជាប់ទំនាក់ទំនងល្អនៅឆ្នាំ២០២០ ដែលអ៊ីស្រាអែលបានចុះជាមួយបារ៉ែននិងអេមីរ៉ាតអារ៉ាប់រួម។ លោកអតីតអគ្គមេបញ្ជាការអ៊ីស្រាអែលរូបនេះ បានសំឡឹងឃើញក្តីសង្ឃឹមនេះ បន្ទាប់ពីឃើញថា ហ្សកដានីក៏បានបាញ់ស្ទាក់មីស៊ីលអ៊ីរ៉ង់ដែរ កាលពីយប់ថ្ងៃសៅរ៍ ហើយប្រព័ន្ធរ៉ាដារបស់បារ៉ែននិងអេមីរ៉ាតអារ៉ាប់រួម បានជូនដំណឹងទៅកងទ័ពអាមេរិកថាមានមីស៊ីលនិងដ្រូនហោះចេញពីដីអ៊ីរ៉ង់។
តែយ៉ាងណាក៏ដោយ ប្រទេសអារ៉ាប់ក្បែរខាងអ៊ីស្រាអែល មានការទើសទ័លចិត្តណាស់ នៅពេលណាអ៊ីស្រាអែលលើកឡើងថាចង់ផ្សារភ្ជាប់សម្ព័ន្ធមិត្ត តែទន្ទឹមនឹងនេះ អ៊ីស្រាអែលនៅតែបន្តធ្វើសង្គ្រាមនៅហ្កាហ្សា ធ្វើបាបប្រជាជនប៉ាឡេស្ទីន។ ប្រទេសអារ៉ាប់ក្នុងតំបន់ដើមបូព៌ា កាន់តែដកចិត្តពីអ៊ីស្រាអែល បន្ទាប់ពីឃើញអ៊ីស្រាអែលប្រើកម្លាំងវាយប្រហារនៅលីបង់ នៅស៊ីរី និងដោយទាំងហ៊ានវាយប្រហារស្ថានទូតអ៊ីរ៉ង់នៅក្រុងដាម៉ាស ដើម្បីសម្លាប់មេបញ្ជាការធំៗរបស់អ៊ីរ៉ង់។ គឺភាពកម្រោលពុលនឹងកម្លាំងខ្លួនឯងរបស់អ៊ីស្រាអែលនេះហើយ ដែលបានហុចឱកាសឲ្យអ៊ីរ៉ង់សងសឹក កាលពីយប់ថ្ងៃសោរ៍ទី១៣មេសា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ