ប្រធានាធិបតីតួកគីប្រកាសរៀបចំបោះឆ្នោតមុនកាលកំណត់នៅថ្ងៃទី២៤មិថុនា
លោកអ៊ែរដូហ្កាន់ ប្រធានាធិបតីតួកគី បានប្រកាសឲ្យដឹងនៅថ្ងៃពុធថា តួកគីនឹងរៀបចំធ្វើការបោះឆ្នោតមុនកាលកំណត់ នៅថ្ងៃទី២៤ខែមិថុនា ពោលគឺ ជាងមួយឆ្នាំមុនកាលបរិច្ឆេទ ដែលគេបានកំណត់កាលពីមុន។ ការបោះឆ្នោតនៅថ្ងៃទី២៤មិថុនានោះ នឹងមានទាំងការបោះឆ្នោតតំណាងរាស្រ្ត និងការបោះឆ្នោតប្រធានាធិបតី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
ការប្រកាសពីការបោះឆ្នោតមុនកាលកំណត់ត្រូវបានលោកអ៊ែរដូហ្កាន់ធ្វើឡើងដោយផ្ទាល់ នៅឯវិមានប្រធានាធិបតី ក្រោយពីលោកបានជួបជាមួយនឹងប្រមុខដឹកនាំគណបក្សដែលជាដៃគូរបស់លោកក្នុងរដ្ឋាភិបាលចម្រុះ។
គណបក្សដៃគូនេះត្រូវបានគេស្គាល់ថាជាគណបក្សដែលមាននិន្នាការជាតិនិយម ហើយមេដឹកនាំគណបក្សនេះបានធ្វើការទាមទារឲ្យលោកអ៊ែរដូហ្កាន់ រំកិលកាលបរិច្ឆេទនៃការបោះឆ្នោត ដែលពីដំបូងគ្រោងធ្វើនៅថ្ងៃទី៣ខែវិច្ឆិកាឆ្នាំ២០១៩ មកនៅថ្ងៃទី២៦ខែសីហាឆ្នាំ២០១៨នេះវិញ។
កាលពីដំបូង រដ្ឋាភិបាលដឹកនាំដោយលោកអ៊ែរដូហ្កាន់ធ្លាប់បានបញ្ជាក់ម្តងហើយម្តងទៀតថានឹងមិនមានការផ្លាស់ប្តូរកាលបរិច្ឆេទបោះឆ្នោតនេះទេ។ ក៏ប៉ុន្តែ នៅទីបំផុតទៅ លោកអ៊ែរដូហ្កាន់ក៏ស្រាប់តែបានផ្លាស់ប្តូរជំហរមកវិញ ហើយសម្រេចរំកិលកាលបរិច្ឆេទបោះឆ្នោតមកនៅថ្ងៃទី២៤មិថុនាឆ្នាំ២០១៨នេះ ពោលគឺ មុនកាលបរិច្ឆេទដែលទាមទារដោយគណបក្សដៃគូរដ្ឋាភិបាលចម្រុះទៅទៀត។
ការបោះឆ្នោត នៅថ្ងៃទី២៤មិថុនាខាងមុខនេះ គឺជាការបោះឆ្នោតដ៏មានសារៈសំខាន់សម្រាប់នយោបាយតួកគី ពីព្រោះថា ចាប់ពីការបោះឆ្នោតនោះហើយ ដែលសិទ្ធិអំណាចថ្មីរបស់ប្រធានាធិបតីតួកគីត្រូវចាប់ផ្តើមចូលជាធរមាន។ សិទ្ធិអំណាចប្រធានាធិបតី ដែលកើតចេញពីការកែប្រែរដ្ឋធម្មនុញ្ញនិងប្រជាមតិកាលពីឆ្នាំ២០១៧ ហើយដែលនឹងប្រគល់អំណាចនីតិប្រតិបត្តិទាំងអស់ទៅឲ្យប្រធានាធិបតី ដែលកាលពីមុនមានមុខនាទីត្រឹមតែជាប្រមុខរដ្ឋតែមិនគ្រប់គ្រងរដ្ឋាភិបាល។
ការបោះឆ្នោតនេះក៏នឹងជាឱកាសមួយដែរ សម្រាប់លោកអ៊ែរដូហ្កាន់ ក្នុងការរក្សាអំណាចរបស់លោកមួយអាណត្តិ ៥ឆ្នាំទៀត ក្រោយពីលោកបានកាន់អំណាចអស់រយៈពេល ១៥ឆ្នាំជាប់ៗគ្នារួចមកហើយ គឺពីដំបូងជានាយករដ្ឋមន្រ្តី និងបច្ចុប្បន្នជាប្រធានាធិបតី។
រហូតមកទល់នឹងពេលនេះ គេនៅមិនទាន់ដឹងច្បាស់នៅឡើយទេថា តើមានហេតុផលអ្វី ដែលធ្វើឲ្យលោកអ៊ែរដូហ្កាន់ផ្លាស់ប្តូរជំហរ ហើយសុខចិត្តធ្វើការបោះឆ្នោតមុនកាលកំណត់នេះ។ ក៏ប៉ុន្តែ ទោះជាយ៉ាងណា គណបក្សប្រឆាំងតួកគីបានប្រកាសស្វាគមន៍ការបោះឆ្នោតមុនកាលកំណត់នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ