អាមេរិកបរាជ័យក្នុងការសាកល្បង វ៉ាក់សាំង ប្រឆាំងមេរោគអេដស៍ នៅអាហ្វ្រិកខាងត្បូង
អាជ្ញាធរសុខភាពអាមេរិក បានប្រកាស កាលពីថ្ងៃចន្ទទី ៣កុម្ភៈ ពីការបញ្ឈប់ ការងារសាកល្បង ចាក់វ៉ាក់សាំង ប្រឆាំង ជំងឺអេដស៍ ដែលបានចាប់ផ្តើម ធ្វើឡើង តាំងពីឆ្នាំ ២០១៦ នៅប្រទេសអាហ្វ្រិកខាងត្បូង។ តាមអាជ្ញាធរអាមេរិកាំង គេបានសម្រេច បិទបញ្ចប់ កម្មវិធី សាកល្បង វ៉ាក់សាំង ដោយសារតែ វាក់សាំងគ្មានប្រសិទ្ធិភាព ជួយទប់ស្កាត់កុំឲ្យមានការចម្លងមេរោគអេដស៍ នៅក្នុងចំណោមអ្នកស្ម័គ្រចិត្ត ដែលបានទទួលចាក់វ៉ាក់សាំង នៅអាហ្វ្រិក ខាងត្បូង។
ចុះផ្សាយនៅថ្ងៃ៖
អាជ្ញាធរអាមេរិកាំង ដែលជាអ្នកឧបត្ថម្ភ ហិរញ្ញវត្ថុសម្រាប់កម្មវិធីសាកល្បង វ៉ាក់សាំងនៅអាហ្វ្រិកខាងត្បូង បានសំដែងការសោកស្តាយ ដែលកម្មវិធី ធ្វើតេស្តសាកល្បង វ៉ាក់សាំងប្រឆាំងជំងឺអេដស៍ទទួលបរាជ័យ ។
តាមប្រធានវិទ្យាស្ថានជាតិអាមេរិកាំងនៃជំងឺឆ្លង លោក Anthony Fauci វ៉ាក់សាំង ប្រឆាំងជំងឺអេដស៍ សំខាន់សម្រាប់លុបបំបាត់ជំងឺអេដស៍ពីលើផែនដី។ គេធ្លាប់សង្ឃឹមថា វានឹងអាចជួយឲ្យគេសម្រេចគោលដៅនេះបាន។ ប៉ុន្តែ ភ័ព្វសំណាងមិនល្អ វ៉ាក់សាំងដែលគេបានសាកល្បង មិនអាចទប់ស្កាត់ការចម្លងមេរោគអេដស៍បាននោះទេ។
អាហ្វ្រិកខាងត្បូង ដែលមានចំនួនអ្នកឆ្លងមេរោគអេដស៍ខ្ពស់ជាងគេនៅក្នុងពិភពលោកបានស្ម័គ្រចិត្តចូលរួម នៅក្នុងគម្រោងសាកល្បងវ៉ាក់សាំង ប្រឆាំងជំងឺអេដស៍ នៅឆ្នាំ ២០១៦។ ការធ្វើតេស្តសាកល្បង វ៉ាក់សាំងបានធ្វើឡើងនៅទីតាំងចំនួន ១៦ ក្នុងប្រទេសអាហ្វ្រិកខាងត្បូង។ ប្រជាជនអាហ្វ្រិកខាងត្បូង ប្រុស ស្រី ជាង ៥៤០០នាក់ អាយុ ពី ១៨ ទៅ ៣៥ឆ្នាំ ដែលគ្មានមេរោគអេដស៍ សោះ បានស្ម័គ្រចិត្តចូលរួមក្នុងកម្មវិធីធ្វើតេស្តសាកល្បងវ៉ាក់សាំងរបស់វិទ្យាស្ថានជាតិអាមេរិកាំងនៃ ជំងឺរាតត្បាត។
តេស្តសាកល្បងធ្វើឡើងទៅលើក្រុមមនុស្ស ២ប្រភេទ ដែលសកម្មខ្លាំង ក្នុងទំនាក់ទំនងផ្លូវភេទ។ ពួកគេមួយក្រុមបានទទួលវ៉ាក់សាំងចំណែកមួយក្រុមទៀត បានទទួលការចាក់ថ្នាំ Placebo ៦ដង ក្នុងរយៈពេល ១៨ខែ។
នៅ ១៨ខែក្រោយទទួលវាក់សាំង ក្រុមការងាររបស់គម្រោងអាមេរិកាំង ចាប់វិភាគលើទិន្នន័យដើម្បីចង់ដឹង ថា តើវ៉ាក់សាំងអាចជួយផលិត អង់ទីករការពារមេរោគអេដស៍ដែរឬទេ។ ជាអកុសល គេរកឃើញថា មនុស្ស ដែលបានទទួលវាក់សាំង ចំនួន ១២៩នាក់ បានឆ្លងមេរោគអេដស៍ ចំណែក ក្នុងចំណោមមនុស្សដែលបានទទួលការចាក់ថ្នាំ Placebo មាន១២៣នាក់បានឆ្លងមេរោគអេដស៍។ គឺលទ្ធផលអវិជ្ជមាន ដែលជំរុញឲ្យអាជ្ញាធរអាមេរិកាំង ដែលជាអ្នករៀបចំកម្មវិធីធ្វើតេស្តសាកល្បង សម្រេចបញ្ឈប់ជាបន្ទាន់ ការធ្វើតេស្តសាកល្បង នៅប្រទេសអាហ្វ្រិកខាងត្បូង។
សម្រាប់ អាជ្ញាធរអាមេរិក ទោះជាការសាកល្បង លើកនេះ បរាជ័យ ប៉ុន្តែ ការស្រាវជ្រាវស្វែងរកវាក់សាំងប្រឆាំងមេរោគអេដស៍នៅតែបន្តទៀត។ ដើម្បីស្វែងរកវាក់សាំង ប្រឆាំងមេរោគអេដស៍ កម្មវិធីតេស្តសាកល្បង វាក់សាំងប្រភេទៗផ្សេងទៀត ក្រៅពី HVTN 702 របស់អាមេរិក កំពុងធ្វើនៅភាគខាងត្បូងទ្វីបអាហ្វ្រិក នៅអាមេរិកខាងជើង អាមេរិកខាងត្បូង និងអឺរ៉ុបជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ