FMI ព្រមានពីការកើតមាន ចលនាតវ៉ាប្រឆាំង ដោយសារវិបត្តិសេដ្ឋកិច្ច ដែលបង្កឡើងដោយកូវីដ១៩
ប្រទេសមួយចំនួននឹងអាចប្រឈមនឹងការកើតមានវិបត្តិសង្គម ដូចជាចលនាតវ៉ា របស់ប្រជាជន ប្រសិនបើ វិធានការរបស់រដ្ឋាភិបាល សម្រាប់ដោះស្រាយ វិបត្តិកូវីដ១៩ ត្រូវគេមើលឃើញថា មិនគ្រប់គ្រាន់ ឬមិនយុត្តិធម៌ ផ្តល់ប្រយោជន៍ទៅក្រុមហ៊ុន បក្សពួក អ្នកមាន ក៏ប៉ុន្តែ មិនមែនប្រជាជន។ នេះជាការព្រមានរបស់អ្នកសរសេររបាយការណ៍ របស់មូលនិធិរូបិយវត្ថុអន្តរជាតិ IMF ដែលត្រូវបានចេញបោះពុម្ពផ្សាយ កាលពីថ្ងៃពុធ ម្សិលមិញ នៅមុនកិច្ចប្រជុំរួមគ្នារវាងមូលនិធិIMF និងធនាគារពិភពលោក ដែលត្រូវប្រព្រឹត្តទៅថ្ងៃព្រហស្បតិ៍ស្អែកនេះ នៅទីក្រុងវ៉ាស៊ីនតោន។
ចុះផ្សាយនៅថ្ងៃ៖
ជំងឺរាតត្បាតកូវីដ១៩នឹងរុញច្រានពិភពលោកទៅក្នុងវិបត្តិសេដ្ឋកិច្ចមួយដ៏ធ្ងន់ធ្ងរយ៉ាងប្រាកដ។ ប៉ុន្តែ ការសម្រេចចិត្ត ណាមួយ របស់អ្នកនយោបាយដើម្បី កាត់បន្ថយផលវិបាកសេដ្ឋកិច្ច ដោយសារកូវីដ ១៩ ក៏នឹងអាចជំរុញផងដែរ ឲ្យមានបាតុកម្ម ចលនាប្រឆាំងតវ៉ា នៅក្នុងពិភពលោក។ មូលនិធិរូបិយវត្ថុអន្តរជាតិបានព្រមាន យ៉ាងដូច្នេះ នៅក្នុងរបាយការណ៍ប្រចាំឆមាស ចេញផ្សាយកាលពីថ្ងៃពុធម្សិលមិញ។
តាមIMF ប្រសិនបើវិធានការដោះស្រាយបញ្ហាសេដ្ឋកិច្ច របស់រដ្ឋាភិបាល ត្រូវបានវិនិច្ឆ័យថា មិនគ្រប់គ្រាន់ ឬមិនស្មើភាព អយុត្តិធម៌ លំអៀងទៅរកតែក្រុមហ៊ុន និងក្រុមអ្នកមាន នោះ ចលនាតវ៉ាប្រឆាំងនឹងផ្ទុះឡើង។ ភាពតានតឹងសង្គម និងបាតុកម្មតវ៉ាកើតមានផងដែរ នៅពេលរដ្ឋាភិបាលសម្រេចដោយអត្តនោម័តលុបចោលទៅវិញ វិធានការជំនួយ នៅក្នុងអំឡុងវិបត្តិកូវីដ១៩។
នៅអាហ្វ្រិកខាងត្បូង កាលពីថ្ងៃអង្គារ កន្លងទៅ ប៉ូលិសបានបាញ់គ្រាប់កៅស៊ូ និងឧស្ម័នបង្ហូរ ទឹកភ្នែក ទៅលើក្រុមបាតុករ ដែលផ្ទុះកំហឹង ដុតកង់ឡាន នៅតាមផ្លូវ បន្ទាប់ពីពួកគេមិនបានទទួលជំនួយអាហារ នៅក្នុងអំឡុងបិទទីក្រុង ដោយសារកូវីដ ១៩។
នៅក្នុងរបាយការណ៍របស់ខ្លួន IMF បានរំលឹកពីការកើនឡើងនៃចលនាបាតុកម្មតវ៉ារបស់មហាជន ដោយសារតែកម្មវិធីនយោបាយសេដ្ឋកិច្ច នៅក្នុងរយៈពេល២ឆ្នាំចុងក្រោយនេះ។ ភាពតានតឹងសង្គម កើតមានភាគច្រើននៅបណ្តាប្រទេសដែលមានអំពើពុករលួយ គម្លាតរវាងអ្នកមាន និងអ្នកក្រ។ នៅលីបង់ ប្រជាជនចុះថ្នល់ធ្វើបាតុកម្មប្រឆាំងនៅក្រោយ រដ្ឋអំណាចប្រកាសដំឡើងតម្លៃអ៊ីនធ័រនែត ចំណែក នៅបារាំង និងនៅអ៊ីរ៉ង់ ប្រជាជនបានធ្វើបាតុកម្មប្រឆាំងរដ្ឋាភិបាលដែលសម្រេចដំឡើងតម្លៃប្រេង។ នៅពេលការតវ៉ាមានលក្ខណៈខុសប្លែកពីប្រទេសមួយ ទៅប្រទេសមួយ ប៉ុន្តែ អ្វីដែលអ្នកសរសេររបាយការណ៍របស់IMF កត់សំគាល់ឃើញចំណុចរួមគ្នានោះ គឺ ប្រធានបទតវ៉ារបស់ពួកគេដូចគ្នា ពោលគឺដើម្បីតវ៉ា បរិហារអំពើអយុត្តិធម៌ អំពើពុករលួយនៅក្នុងសង្គម។
សម្រាប់មូលនិធិ IMF នៅក្នុងអំឡុងពេលដែលរដ្ឋាភិបាល ចាត់វិធានការ បិទទីក្រុង ដាក់បង្ខាំងឲ្យមនុស្សនៅក្នុងផ្ទះ ដាក់ប្រទេសក្នុងស្ថានភាពអាសន្ន ឬដាក់បំរាមគោរច ដើម្បី កាត់បន្ថយ ការឆ្លងកូរ៉ូណាវីរុស ចលនាបាតុកម្ម តវ៉ាប្រឆាំងរដ្ឋាភិបាល កើតមានដោយកម្រ។ ប៉ុន្តែ វានឹងលេចចេញ កើតមានច្រើន នៅក្រោយពេលពិភពលោក បានធូរស្រាលទៅវិញ ពីជំងឺរាតត្បាតកូវីដ ១៩។ តាមប្រធានផ្នែកហិរញ្ញវត្ថុសាធារណៈរបស់មូលនិធិ ហិរញ្ញវត្ថុអន្តរជាតិ IMF ដែលបានផ្តល់បទសម្ភាសន៍ដល់ទីភ្នាក់ងារព័ត៌មានអង់គ្លេស Reuters វិបត្តិសង្គម ចលនាតវ៉ាប្រឆាំង នឹងចាប់កើតមាន នៅពេលគេអាចគ្រប់គ្រងបាន វិបត្តិកូវីដ១៩។
ដូច្នេះ ដើម្បីជៀសវាងវិបត្តិសង្គម ការងើបតវ៉ាប្រឆាំងរបស់ប្រជាជន មូលនិធិIMF អំពាវនាវឲ្យរដ្ឋាភិបាលបង្ហាញតម្លាភាព ដើម្បីដោះស្រាយបញ្ហាសេដ្ឋកិច្ច។ បើតាមIMF នៅក្នុងវិធានការផ្តល់ជំនួយបន្ទាន់សម្រាប់ប្រជាជន ក៏ដូចជាក្រុមហ៊ុនដែលរងគ្រោះខាតបង់ដោយសារកូវីដ ១៩ រដ្ឋាភិបាល ត្រូវបង្ហាញច្បាស់ៗថា វាជាវិធានការបណ្តោះអាសន្ន នៅក្នុងកាលៈទេសៈនៃជំងឺរាតត្បាតកូវីដ ១៩ ប៉ុន្តែមិនមែនជាជំនួយគ្មានថ្ងៃបញ្ចប់នោះទេ។ បើសិនរដ្ឋាភិបាលបង្ហាញ ភាពស្មោះត្រង់ មានតម្លាភាព ក្នុងការពន្យល់កុំឲ្យប្រជាជនសង្ស័យ និងអាក់អន់ចិត្ត នោះ គេនឹងកាត់បន្ថយបានច្រើន ការយល់ច្រលំ និងការខឹងសម្បារ រហូតដល់កើតចេញជាចលនាតវ៉ាប្រឆាំងរដ្ឋាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ