អ.ស.ប.ផ្តើមជជែកពីការរំសាយអាវុធនុយក្លេអ៊ែរដោយគ្មានសង្ឃឹមទទួលបានលទ្ធផល
នៅថ្ងៃសុក្រ ទី២ តុលា អង្គការសហប្រជាជាតិផ្តើមជជែកពីការរំសាយអាវុធនុយក្លេអ៊ែរ។ ការជជែកលើសំណុំរឿងដ៏រស៊ើប និងសំខាន់មួយនេះធ្វើឡើងនៅក្នុងឱកាសមហាសន្និបាតអង្គការសហប្រជាជាតិប្រចាំឆ្នាំលើកទី៧៥។ តែក្តីសង្ឃឹមទទួលបានលទ្ធផលវិជ្ជមាន និងដូចក្តីរំពឹងមានតិចតួច។ នេះក៏ដោយសារថា កិច្ចសន្ទនារវាងរុស្ស៊ី និងសហរដ្ឋអាមេរិកស្តីពីការរំសាយអាវុធនុយក្លេអ៊ែរកំពុងបន្តជាប់គាំង។ គួរបញ្ជាក់ថា រុស្ស៊ី និងសហរដ្ឋអាមេរិកកំពុងមានអាវុធនុយក្លេអ៊ែរក្នុងដៃដល់ទៅ ៩០% នៃអាវុធនុយក្លេអ៊ែរសរុបក្នុងលោក។
ចុះផ្សាយនៅថ្ងៃ៖
ស្តាប់ - ០២:៤០
អង្គការសហប្រជាជាតិបានកត់សម្គាល់ និងទាញសញ្ញាអាសន្នថានាពេលបច្ចុប្បន្ននេះ ហានិភ័យនៃការប្រើអាវុធនុយក្លេអ៊ែរដោយចេតនា ដោយអចេតនា ឬដោយកំហុសឆ្គងក្តីកំពុងមានការកើនឡើងគួរឲ្យបារម្ភតាំងពីក្រោយការបិទបញ្ចប់សង្រ្គាមត្រជាក់។ ការហ៊ានអះអាងយ៉ាងដូចនេះដោយអង្គការសហប្រជាជាតិបានសម្គាល់ឃើញពីទំនាក់ទំនងមិនល្អរវាងរដ្ឋមាននុយក្លេអ៊ែរ ការចាត់ទុកអាវុធនុយក្លេអ៊ែរជាយុទ្ធសាស្រ្តនៃសន្តិសុខជាតិ ភាពជឿនលឿនផ្នែកបច្ចេកវិទ្យានុយក្លេអ៊ែរ និងការបំពានលើសន្ធិសញ្ញាមិនសាយភាយនុយក្លេអ៊ែររបស់ប្រទេសមួយចំនួន។
កម្មវត្ថុនៃកិច្ចប្រជុំរបស់អង្គការសហប្រជាជាតិពេលនេះ គឺជួយជំរុញឲ្យមានកិច្ចសន្ទនា និងកិច្ចចរចាឡើងវិញស្តីពីការគ្រប់គ្រងអាវុធនុយក្លេអ៊ែរ និងគិតគូរពីរបៀបដែលរដ្ឋនីមួយៗអាចធ្វើការរួមគ្នាឆ្ពោះទៅរកផ្លូវរំសាយនុយក្លេអ៊ែរ។ តែនៅក្នុងបរិបទនៃកំណើនតានតឹងក្នុងលោកសព្វថ្ងៃ ក្តីសង្ឃឹម និងក្តីរំពឹងទទួលបានលទ្ធផលពីកិច្ចប្រជុំមួយនេះហាក់មានតិចតួច ស្តួចស្តើង។ ប្រទេសដែលគ្រប់គ្នាកំពុងសម្លឹងមើល គឺរុស្ស៊ី និងសហរដ្ឋអាមេរិកដែលកំពុងមានអាវុធនុយក្លេអ៊ែរក្នុងដៃដល់ ៩០% នៃអាវុធនុយក្លេអ៊ែរទាំងអស់ក្នុងលោក។ ក្នុងឆ្នាំ ១៩៨៧ ក្រុងមូស្គូ និងវ៉ាស៊ីនតោនបានចុះហត្ថលេខាលើសន្ធិសញ្ញាមួយស្តីពីកម្លាំងនុយក្លេអ៊ែរកម្រិតមធ្យម។
តាមរយៈសន្ធិសញ្ញាដែលបានស្លាប់តាំងពីឆ្នាំ ២០១៩ មួយនេះ រុស្ស៊ី និងអាមេរិកបានបំផ្លាញគ្រាប់មីស៊ីលបាញ់ចម្ងាយពី ៥០០ ទៅ ៥ ៥០០គីឡូម៉ែត្រចំនួន ២ ៧០០គ្រាប់។ ក្នុងឆ្នាំ ២០១០ រុស្ស៊ី និងអាមេរិកបានចុះហត្ថលេខាលើសន្ធិសញ្ញានុយក្លេអ៊ែរមួយទៀតឈ្មោះ « New Start »។ តែ « New Start » នឹងត្រូវអស់សុពលភាពនៅដើមឆ្នាំ ២០២១ ខាងមុខ និងដែលរុស្ស៊ី និងអាមេរិកកំពុងនិយាយមិនចុះសម្រុងគ្នាដើម្បីពន្យារពេលបន្ថែម។ ប្រធានាធិបតីអាមេរិកលោកត្រាំបានដាក់លក្ខខណ្ឌបន្ថែមដើម្បីអាចពន្យារសន្ធិសញ្ញា « New Start » បាន ពិសេសលោកត្រាំចង់ទាញចិនឲ្យចូលរួមនៅក្នុងកិច្ចចរចា។ តែចិនបានបដិសេធ ហើយរុស្ស៊ីក៏មិនច្បាស់ចង់ឲ្យចិនចូលរួមដែរ។
ខណៈដែលកិច្ចចរចារវាងរុស្ស៊ី និងអាមេរិកកំពុងជាប់គាំង ក្រុមសកម្មជនរំសាយនុយក្លេអ៊ែរបានបន្តគាំទ្រ និងសាទរលើសន្ធិសញ្ញាហាមឃាត់អាវុធនុយក្លេអ៊ែរដែលបានអនុម័តដោយ ១២២ប្រទេសកាលពីឆ្នាំ ២០១៧ និងមានជិត ៥០ប្រទេសបានឲ្យសច្ចាប័ន។ តែអ្វីដែលគួរឲ្យស្តាយ មានមហាអំណាចនុយក្លេអ៊ែរចំនួន ៩ប្រទេសមិនបានចុះហត្ថលេខាទេ គឺអាមេរិក រុស្ស៊ី ចិន បារាំង អង់គ្លេស ឥណ្ឌា ប៉ាគីស្ថាន អ៊ីស្រាអែល និងកូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ