បោះឆ្នោតអាមេរិក៖ Facebook Twitterដាក់ស្លាកសញ្ញាលើ សាររបស់លោកដូណាល់ ត្រាំ ថា អាចភូតកុហក
ដោយយគ្មានការភ្ញាក់ផ្អើល Facebook និងTwitter បានបិទស្លាក សំគាល់សាររបស់លោកដូណាល់ ត្រាំ ដែលអះអាងថា លោកបានឈ្នះឆ្នោតនាំមុខដាច់ឆ្ងាយ ប៉ុន្តែ មានគេព្យាយាមលួចជ័យជំនះឆ្នោតរបស់លោក។ នៅក្នុងការបោះឆ្នោតដ៏តានតឹងខ្លាំង ជាមួយ សំឡេងឆ្នោតដ៏ប្រកៀកប្រកិត ក្រុមហ៊ុន អាមេរិកាំង ដូចជាFacebook Twitter Google និងYoutube បានត្រៀមយន្តការរួចជាស្រេច ដើម្បី ទប់ស្កាត់ការបង្ហោះផ្សាយ ព័ត៌មានមិនពិត ព័ត៌មានបោកបន្លំទាក់ទងនឹងលទ្ធផលបោះឆ្នោតប្រធានាធិបតីអាមេរិក នៅលើបណ្តាញសង្គម។
ចុះផ្សាយនៅថ្ងៃ៖
ស្តាប់ - ០២:៣០
សាររបស់បេក្ខជនដែលអះអាងពីជ័យជំនះរបស់ខ្លួន នៅមុនការរាប់សន្លឹកឆ្នោត បិទបញ្ចប់។ នេះជាសេណារីយ៉ូ ដែលក្រុមហ៊ុនបណ្តាញសង្គម ដូចជាTwitter បានFacebook បានព្យាករទុកមុនហើយថា នឹងកើតមានដោយជៀសមិនផុត ជាពិសេស នៅកាលៈទេសៈ ដែល ការរាប់សន្លឹកឆ្នោតយឺតយ៉ាវ ដែលជាហេតុធ្វើឲ្យបេក្ខជនអាចប្រកាសពីជោគជ័យរបស់ខ្លួនដោយផ្អែកលើលទ្ធផលមិនទាន់ពេញលេញ ដូចជាលោកដូណាល់ ត្រាំ។
តាំងពីយប់ថ្ងៃបោះឆ្នោត Twitterបានឲ្យសញ្ញាពីខ្លឹមសារចម្រូងចម្រាស ភូតកុហក នៅលើសារទ្វីតរបស់លោកដូណាល់ ត្រាំ។ នៅក្នុងសារ Twitter ដែលលោក បានសរសេរ នៅយប់ថ្ងៃបោះឆ្នោត លោកដូណាល់ ត្រាំបានសរសេរថា លោកបានឈ្នះនាំមុខ ដាច់ឆ្ងាយ ប៉ុន្តែ គេបានព្យាយាមលួចយកសំឡេងឆ្នោតរបស់លោក។
ដូចការសន្យាដែលថា នឹងចាត់វិធានការ រឹតបន្តឹងការបង្ហោះផ្សាយព័ត៌មានបោកប្រាស់ ទាក់ទងនឹងលទ្ធផលបោះឆ្នោត ក្រុមហ៊ុនTwitter បានបិទខ្ទប់សារចំនួន២របស់លោកដូណាល់ ត្រាំ តាំងពីយប់ថ្ងៃអង្គារ។ នៅក្នុងសារទ្វីតទី២ដែលលោកបង្ហោះ តាំងពីព្រឹកព្រលឹមថ្ងៃពុធ លោកដូណាល់ត្រាំ បានសរសេរថា កាលពីយប់លោកនាំមុខ នៅក្នុងរដ្ឋគន្លឹះជាច្រើន មិនថារដ្ឋដែលគ្រប់គ្រងដោយក្រុមបក្សប្រជាធិបតេយ្យ ប៉ុន្តែ ចម្លែកណាស់ ស្រាប់តែ លោករបូតបាត់រដ្ឋម្តងមួយៗ នៅក្រោយ គេចាប់រាប់សន្លឹកឆ្នោត បោះតាមសំបុត្រ។ ដូចសារទី១ របស់លោកដូណាល់ ត្រាំ ក្រុមហ៊ុនTwitter បិទ និងដាក់សញ្ញាសំគាល់ ដែលជាហេតុធ្វើឲ្យអ្នកប្រើប្រាស់ផ្សេងទៀត មិនអាច ចុច Like ឬចែករំលែកបន្ត។ លើកនេះ Twitter បានចំណាយពេលតែ កន្លះម៉ោងប៉ុណ្ណោះសម្រាប់ចាត់វិធានការទៅលើសាររបស់លោកដូណាល់ ត្រាំ។
នៅលើបណ្តាញរបស់ខ្លួន Facebook ឯណោះវិញ បានបិទភ្ជាប់សាររបស់លោកដូណាល់ ត្រាំ ដើម្បីឲ្យអ្នកប្រើប្រាស់អាចចូលទៅអានព័ត៌មានពិតប្រាកដស្តីពីលទ្ធផលបោះឆ្នោតផ្លូវការ។ សម្រាប់ហ្វេសប៊ុក នៅពេល លោកដូណាល់ ត្រាំ ឆាប់ប្រកាសជ័យជំនះពេក ហ្វេសប៊ុក និងInstagram បានដាក់សញ្ញាសំគាល់ ថា ការរាប់សន្លឹកឆ្នោតនៅមិនទាន់ចប់ និងថា លោកដូណាល់ ត្រាំ នៅមិនទាន់ឈ្នះនៅឡើយទេ។
នៅប៉ុន្មានថ្ងៃមុនការបោះឆ្នោត ស្ថាបនិកក្រុមហ៊ុនហ្វេសប៊ុកបានសំដែងក្តីបារម្ភពីគ្រោះថ្នាក់ ភាពចលាចលស៊ីវិល នៅទូទាំងប្រទេស នៅក្រោយការបោះឆ្នោត។ លទ្ធផលឆ្នោត បឋម ដ៏ប្រកៀកប្រកិត ហើយនិងសារចោទប្រកាន់របស់លោកដូណាល់ ត្រាំ រឹតតែជំរុញឲ្យមានការភ័យខ្លាចស្តីពីការបែកបាក់នយោបាយ ហើយគឺបណ្តាញសង្គមដែលនឹងត្រូវគេយកប្រើ នៅក្នុងផ្លូវមិនល្អ។
សូមបញ្ជាក់ថា ចាប់តាំងពីថ្ងៃពុធ ការផ្សាយពាណិជ្ជកម្មនយោបាយ ឬប្រធានបទស្តីពីបញ្ហាសង្គម ការបោះឆ្នោត នឹងត្រូវហាមមិនឲ្យបង្ហោះផ្សាយនៅលើបណ្តាញសង្គមហ្វេសប៊ុក នៅអាមេរិក រហូតដល់សប្តាហ៍ក្រោយ ដើម្បីកាត់បន្ថយ ការប្រឈម យល់ច្រលំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ