គណបក្សកាន់អំណាចរបស់លោកម៉ាឌូរ៉ូ ឈ្នះការបោះឆ្នោតសភាភ្លូកទឹកភ្លូកដី
នៅថ្ងៃអាទិត្យ ទី៦ ធ្នូ ប្រជាជនវ៉េណេស៊ុយអេឡាប្រមាណជា ២០ លាននាក់បានទៅបោះឆ្នោតជ្រើសរើសតំណាងរាស្ត្រថ្មីរបស់ខ្លួន។ យោងទៅតាមលទ្ធផលបឋមនៃការបោះឆ្នោត គណបក្សកាន់អំណាចរបស់លោកប្រធានាធិបតីនីកូឡា ម៉ាឌូរ៉ូ ទទួលបានសំឡេងគាំទ្រភាគច្រើន យកឈ្នះបក្សប្រឆាំងរបស់លោកហ័ន ហ្កាយដូ ដែលស្និទ្ធនឹងសហរដ្ឋអាមេរិក។
ចុះផ្សាយនៅថ្ងៃ៖
នៅក្នុងការបោះឆ្នោតសភាវ៉េណេស៊ុយអេឡានាអាណត្តិនេះ លោកម៉ាឌូរ៉ូ និងគណបក្សសម្ព័ន្ធដៃគូចម្រុះរបស់លោកដែលជាអ្នកឆ្វេងនិយមទទួលបានសំឡេងគាំទ្រចំនួនប្រមាណ ៦៧,៧ ភាគរយជាមួយនឹងសន្លឹកឆ្នោតដែលត្រូវរាប់បាន ៨០ ភាគរយ។
មេបក្សប្រឆាំងលោកហ័ន ហ្កាយដូ ដែលបានចេញមុខនិយាយតាំងពីមុនមកម្ល៉េះអំពីភាពមិនយុត្តិធម៌ និងការគ្មានតម្លាភាពក្នុងការបោះឆ្នោតសភា បានលើកឡើងថា ជ័យជម្នះរបស់បក្សកាន់អំណាចវ៉េណេស៊ុយអេឡាមិនមែនជារឿងចម្លែកនោះទេ។
ស្រដៀងគ្នានេះដែរ ក្រោយដឹងពីលទ្ធផលឆ្នោត សហរដ្ឋអាមេរិកដែលជាអ្នកគាំទ្របក្សប្រឆាំងវ៉េណេស៊ុយអេឡា បានបរិហារថាការបោះឆ្នោតសភានេះ មិនយុត្តិធម៌ មានការក្លែងបន្លំសន្លឹកឆ្នោត និងថាវាជារឿងគួរឲ្យអាម៉ាស់មួយសម្រាប់បក្សកាន់អំណាចរបស់លោកម៉ាឌូរ៉ូ។
គួររំឭកជូនថា ការបោះឆ្នោតសភាវ៉េណេស៊ុយអេឡាលើកនេះ ចូលរួមដោយ ១០៧ គណបក្ស និងមានបេក្ខជនឈរឈ្មោះសរុបប្រមាណជា ១៤ ០០០នាក់។ មានអ្នកតំណាងរាស្រ្តថ្មីចំនួន ២៧៧ រូបដែលអ្នកបោះឆ្នោតវ៉េណេស៊ុយអេឡាប្រមាណជា ២០លាននាក់ត្រូវជ្រើសរើស។
ជ័យជម្នះភ្លូកទឹកភ្លូកដីរបស់គណបក្សកាន់អំណាចនៅពេលនេះ នឹងធ្វើឲ្យបក្សប្រឆាំងរបស់លោកហ្កាយដូ បាត់បង់អំណាចនៅសភាដែលជាស្ថាប័នតែមួយគត់ដែលមាននៅក្នុងដៃរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ