ក្រុមហ៊ុនអាមេរិកាំងធំៗកាត់ផ្តាច់ចំណងហិរញ្ញវត្ថុជាមួយលោកដូណាល់ ត្រាំ
ព្រឹត្តិការណ៍សម្រុកចូលវិមានកាពីតូលពីសំណាក់អ្នកគាំទ្ររបស់លោកដូណាល់ ត្រាំ ធ្វើឲ្យលោកដូណាល់ ត្រាំ កាន់តែឯកោ ទាំងក្នុងពិភពលោកនយោបាយ និងសេដ្ឋកិច្ច។ បន្ទាប់ពី មន្រ្តីរដ្ឋាភិបាលដើរចេញពីលោកម្តងម្នាក់ៗ និងត្រូវ បណ្តាញ សង្គម ដូចជាTwitter បិទគណនីទៀតនោះ លោកដូណាល់ ត្រាំ កំពុងត្រូវកំពុងក្រុមហ៊ុនអាមេរិកាំងៗ ធំៗ ដោះដៃ លែងទាក់ទងជាមួយតទៅទៀត។
ចុះផ្សាយនៅថ្ងៃ៖
ស្តាប់ - ០២:៤១
ក្រោយហេតុការណ៍ សម្រុកចូលលុកលុយ របស់ក្រុមគាំទ្រ លោកដូណាល់ ត្រាំ នៅវិមានកាពីតូល បញ្ជីឈ្មោះ ក្រុមហ៊ុន អ្នកជំនួញដែលប្រកាសកាត់ផ្តាច់ស្ពានមេត្រីជាមួយ ប្រធានាធិបតី មានកាន់តែច្រើនឡើងៗ។
បន្ទាប់ពី ក្រុមហ៊ុន Twitter ផាត់លោកដូណាល់ ត្រាំ លែងឲ្យប្រើបណ្តាញសង្គមរបស់ខ្លួន សហជីពអ្នកជំនួញ ដ៏មានឥទ្ធិពល AFL-CIO មហាសេដ្ឋី Nelson Peltz ក៏ដូចជា ក្រុមហ៊ុនBen & Jerryបានស្រែកទាមទារឲ្យលោកដូណាល់ ត្រាំ ចុះចេញពីអំណាចជាបន្ទាន់។
នៅក្រោយ ក្រុមគាំទ្ររបស់លោកដូណាល់ ត្រាំ សម្រុកចូលវិមានកាពីតូល ក្រុមហ៊ុនអាមេរិកាំងមួយចំនួនទៀតបានចាត់វិធានការជាក់ស្តែងតែម្តង ដើម្បី កាត់ផ្តាច់ទំនាក់ទំនងជាមួយលោកដូណាល់ ត្រាំ។ ក្រុមហ៊ុនលក់ទំនិញតាមអ៊ីនធ័រនែត Shopify បានដកទំនិញ របស់ក្រុមហ៊ុនលោកដូណាល់ ត្រាំ ចេញពី បណ្តាញលក់របស់ខ្លួន។ ក្រុមហ៊ុនផ្ទេរលុយតាមអ៊ីនធ័នែត ឈ្មោះStripe ប្រកាសឈប់ គ្រប់គ្រង ការផ្ទេរលុយទៅ គណនី របស់ ក្រុមឃោសនាបោះឆ្នោត របស់លោកដូណាល់ ត្រាំ តទៅទៀត។
ការដោះដៃរបស់ក្រុមហ៊ុន និងអ្នកជំនួញ មិនមែនសម្រាប់តែ លោកដូណាល់ ត្រាំ ម្នាក់ទេ។ ក្រុមហ៊ុនធំៗ ដូចជា សណ្ឋាគារ Marriott ក្រុមហ៊ុនធានារ៉ាប់រង សុខភាព និងធនាគារ American Express ជាដើម បានប្រកាសថា ពួកគេ សម្រេចឈប់ ផ្តល់វិភាគទាន សម្រាប់អ្នកតំណាងរាស្រ្ត មកពីគណបក្សសាធារណរដ្ឋ ដែលបានបោះឆ្នោត ប្រឆាំង ការបញ្ជាក់ជ័យជំនះ របស់លោកចូ បៃដិន។ តាមធនាគារ American Express ក្នុងចំណោមសមាជិកបក្សសាធារណរដ្ឋ ១៣៩រូបដែលបោះឆ្នោត ប្រឆាំងលោកចូ បៃដិន កាលពីថ្ងៃទី ៦មករា កន្លងទៅ មាន ២២នាក់ជាអ្នកតំណាងរាស្រ្តដែលបានទទួលជំនួយឧបត្ថម្ភថវិកាពី ធនាគារ។
សម្រាប់ក្រុមហ៊ុនដទៃទៀត ដូចជា JPMorgan Chase មីក្រូសូហ្វ ហ្វេសប៊ុក ព្រឹត្តិការណ៍លើកនេះ បានធ្វើឲ្យក្រុមហ៊ុនសម្រេចដល់ថ្នាក់ផ្អាកព្យួរ វិភាគទាន សម្រាប់គណបក្សនយោបាយទាំងស្រុង មិនថា គណបក្សសាធារណរដ្ឋ ឬបក្សប្រជាធិបតេយ្យ។ មីក្រូសូហ្វ និងហ្វេសប៊ុកបានផ្អាកសកម្មភាពរបស់គណៈកម្មការ សកម្មភាពនយោបាយរបស់ក្រុមហ៊ុន ដែលមានតួនាទី ប្រមូលថវិកាពីបុគ្គលិក សម្រាប់យកទៅជួយគណបក្ស ឬអ្នកនយោបាយ ណា ដែលក្រុមហ៊ុនគាំទ្រ។ នៅពេល ហ្វេសប៊ុក ផ្អាក ៣ខែ ធនាគារ JPMorgan Chase ឯណោះវិញ ផ្អាកវិភាគទានរបស់ខ្លួន ទៅ គណបក្សនយោបាយ សម្រាប់ រយៈពេល យ៉ាងតិច ៦ខែ។
ការកាត់ផ្តាច់ ផ្អាកជំនួយថវិការបស់ក្រុមហ៊ុនឯកជន សម្រាប់អ្នកតំណាងរាស្រ្តដែលបោះឆ្នោត ប្រឆាំង នឹងការបញ្ជាក់របស់លោកចូ បៃដិន នៅសភាអ្នកតំណាងរាស្រ្ត កាលពីថ្ងៃទី ៦មករា ជាសារ ច្បាស់មួយដែលបញ្ជាក់ថា ការមិនគោរព លទ្ធិប្រជាធិបតេយ្យ និងការផ្សព្វផ្សាយព័ត៌មានក្លែងក្លាយ ជារឿងមួយ ដែលគេមិនអាចអត់ឱន យោគយល់ឲ្យបានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ