លោកត្រាំក្លាយជាប្រធានាធិបតីទី១ក្នុងប្រវត្តិសាស្ត្រអាមេរិកដែលត្រូវសភាចោទប្រកាន់ដកតំណែងដល់ទៅពីរដង
លោកដូណាល់ ត្រាំ បានក្លាយជាប្រធានាធិបតីដំបូងគេបង្អស់ក្នុងប្រវត្តិសាស្ត្រអាមេរិកដែលត្រូវរដ្ឋសភាចោទប្រកាន់ទម្លាក់ពីតំណែងចំនួនពីរដង បន្ទាប់ពីរងការចោទប្រកាន់ជាថ្មីម្តងទៀតក្រោមបទ “ញុះញង់ឲ្យមានការបះបោរ” កាលពីថ្ងៃពុធ ទី១៣ មករាម្សិលមិញ។ រដ្ឋសភាបានបោះឆ្នោតអនុម័តបទចោទប្រកាន់លើលោកត្រាំហើយ ចុះតើនឹងមានអ្វីកើតឡើងនៅដំណាក់កាលបន្ទាប់ទៀត?
ចុះផ្សាយនៅថ្ងៃ៖
ស្តាប់ - ០២:៣៥
រដ្ឋសភាអាមេរិកដែលជាទីគណបក្សប្រជាធិបតេយ្យមានសំឡេងភាគច្រើន បានសម្រេចអនុម័តដោយជោគជ័យលើបទចោទប្រកាន់ដើម្បីឈានទៅដកតំណែងលោកដូណាល់ ត្រាំ។ សមាជិកសភាតំណាងរាស្ត្រអាមេរិកបានចោទប្រកាន់លោកត្រាំថាបានជំរុញឲ្យមានអំពើហិង្សាតាមរយៈពាក្យសម្តីអះអាងមិនពិតរបស់លោកអំពីការលួចបន្លំសន្លឹកឆ្នោត។
ក្នុងអំឡុងពេលថ្លែងសន្ទរកថាមួយ លោកត្រាំបានជំរុញឲ្យអ្នកគាំទ្ររបស់លោកធ្វើបាតុកម្មប្រឆាំងនឹងការប្រកាសលទ្ធផលបោះឆ្នោតផ្លូវការនៅឯវិមានរដ្ឋសភាកាលពីថ្ងៃទី៦ មករា។ ក្រោយការលើកឡើងបែបនេះរបស់លោកប្រធានាធិបតីជិតផុតអាណត្តិ អ្នកគាំទ្រលោកបានចេញចុះផ្លូវធ្វើបាតុកម្មប្រឆាំងតវ៉ានឹងលទ្ធផលបោះឆ្នោត និងបន្ទាប់មកទៀតក៏ឈានដល់មានហេតុការណ៍ចូលលុកលុយដោយហិង្សាដល់ក្នុងវិមានកាពីតូលរហូតបណ្តាលឲ្យមនុស្ស៥ ម្នាក់ស្លាប់។
ការប្រជុំរបស់រដ្ឋសភាដើម្បីបោះឆ្នោតអនុម័តលើបទចោទប្រកាន់លើលោកត្រាំកាលពីថ្ងៃពុធម្សិលមិញ ប្រព្រឹត្តទៅដោយមានការយាមកាមតឹងរ៉ឹងពីសំណាក់កងឆ្មាំការពារវិមានកាពីតូល។ សមាជិកសភាតំណាងរាស្ត្រអាមេរិក បានបោះឆ្នោតចោទប្រកាន់លោកត្រាំ ដោយសំឡេង ២៣២ ទល់នឹង ១៩៧ ដែលក្នុងនោះក៏មានផងដែរ សមាជិកបក្សសាធារណរដ្ឋរហូតដល់ទៅ ១០រូប បានចូលរួមបោះឆ្នោតជាមួយបក្សប្រជាធិបតេយ្យ។
ក្រោយរដ្ឋសភាអនុម័តបទចោទប្រកាន់លើលោកត្រាំ តើនឹងមានអ្វីកើតឡើងនៅដំណាក់កាលបន្ទាប់? លោកដូណាល់ ត្រាំ នឹងត្រូវប្រឈមមុខទៅនឹងការជំនុំជម្រះទាក់ទងសំណុំរឿងនេះនៅព្រឹទ្ធសភា។ យោងតាមរដ្ឋធម្មនុញ្ញអាមេរិក សវនាការជំនុំជម្រះដើម្បីកំណត់ពីទោសកំហុសរបស់ប្រធានាធិបតីត្រូវការពេលយូរ។ ដូច្នោះហើយ ព្រឹទ្ធសភាមិនអាចសម្រេចលើបទចោទប្រកាន់នេះ មុនពេលលោកត្រាំចុះចេញពីតំណែងក្នុងរយៈពល ៦ ថ្ងៃទៀតនោះទេ។
គួរគូសបញ្ជាក់ជូនថា យោងតាមចំនួនអាសនៈនៅព្រឹទ្ធសភា គណបក្សប្រជាធិបតេយ្យត្រូវការសំឡេងគាំទ្រពីសមាជិកព្រឹទ្ធសភាគណបក្សសាធារណរដ្ឋយ៉ាងតិច ១៧រូប ទើបទទួលបានសំឡេង ២ភាគ៣ អាចដកតំណែងលោកដូណាល់ ត្រាំបាន។
បើតាមកាសែតញូវយ៉កថែមស៍បានរាយការណ៍កាលពីថ្ងៃអង្គារ មានសមាជិកព្រឹទ្ធសភាបក្សសាធារណរដ្ឋចំនួន ២០រូបបានសម្តែងការគាំទ្រចំពោះចំណាត់ការទម្លាក់លោកត្រាំចេញពីតំណែងប្រធានាធិបតីនេះ។
ក្នុងករណីលោកត្រាំ ត្រូវព្រឹទ្ធសភាបោះឆ្នោតសម្រេចដកតំណែងមែននោះ សមាជិកសភាអាចធ្វើការបោះឆ្នោតមួយផ្សេងទៀតដើម្បីរារាំងលោកត្រាំ មិនឲ្យអាចឈរឈ្មោះសម្រាប់ការបោះឆ្នោតប្រធានាធិបតីជាថ្មីម្តងទៀតនៅឆ្នាំ ២០២៤ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ