សន្ធិសញ្ញាហាមឃាត់អាវុធនុយក្លេអ៊ែរបានចូលជាធរមាន តែគ្មានវត្តមានក្រុមប្រទេសមហាអំណាចនុយក្លេអ៊ែរ
សន្ធិសញ្ញាស្តីពីការហាមឃាត់អាវុធនុយក្លេអ៊ែរបានចូលជាធរមាននៅថ្ងៃសុក្រ ទី២២ មករានេះ។ តែអ្វីជាការកត់សម្គាល់ គ្មានប្រទេសមហាអំណាចនុយក្លេអ៊ែរណាមួយក្នុងចំណោមមហាអំណាចនុយក្លេអ៊ែរទាំង ៩ប្រទេសបានចូលរួមនៅក្នុងសន្ធិសញ្ញានោះទេ។ យ៉ាងណាក៏ដោយ អគ្គលេខាធិការអង្គការសហប្រជាជាតិលោកអង់តូនីញ៉ូ ហ្គូទែរស៍ និងប្រមុខសង្ឃកាតូលិកសម្តេចប៉ាបហ្រ្វង់ស័របានសាទរចំពោះការចូលជាធរមាននូវសន្ធិសញ្ញាអន្តរជាតិមួយនេះ។
ចុះផ្សាយនៅថ្ងៃ៖
ស្តាប់ - ០២:៣០
សន្ធិសញ្ញាស្តីពីការហាមឃាត់អាវុធនុយក្លេអ៊ែរត្រូវបានអនុម័តដោយជាង ១២០ប្រទេសកាលពីឆ្នាំ ២០១៧។ តែដើម្បីអាចឲ្យសន្ធិសញ្ញាមួយនេះចូលជាធរមានបាន លុះត្រាណាតែមាន ៥០ប្រទេសយ៉ាងតិចឲ្យសច្ចាប័ន។ ប្រទេសទី៥០ បានឲ្យសច្ចាប័នក្នុងថ្ងៃទី២៤ តុលា ឆ្នាំ ២០២០ តែគេត្រូវរង់ចាំរយៈពេល ៩០ថ្ងៃ ពោលក្នុងថ្ងៃទី២២ មករា ឆ្នាំ ២០២១ នេះទើបអង្គការសហប្រជាជាតិប្រកាសចូលធរមានជាផ្លូវការ។ ចាប់ពីថ្ងៃចូលជាធរមាននេះទៅ ប្រទេសដែលបានអនុម័តលើសន្ធិសញ្ញាអន្តរជាតិមួយនេះសន្យាមិនផលិត មិនធ្វើការសាកល្បង មិនបំពាក់ ឬមិនស្តុកទុកអាវុធនុយក្លេអ៊ែរ។ តែអ្វីជាការកត់សម្គាល់ និងគួរឲ្យសោកស្តាយ គ្មានប្រទេសណាមួយក្នុងចំណោម៩ប្រទេសដែលមានអាវុធនុយក្លេអ៊ែរបានចូលរួមនៅក្នុងសន្ធិសញ្ញាស្តីពីការហាមឃាត់អាវុធនុយក្លេអ៊ែរនេះទេ។
៩ប្រទេសនោះមានសហរដ្ឋអាមេរិក រុស្ស៊ី ចិន បារាំង អង់គ្លេស ឥណ្ឌា ប៉ាគីស្ថាន អ៊ីស្រាអែល និងកូរ៉េខាងជើង។ ក្នុងចំណោម ៩ប្រទេសដែលមាន ៥ប្រទេសជាសមាជិកអចិន្ត្រៃយ៍នៃក្រុមប្រឹក្សាសន្តិសុខនេះហាក់គ្មានចេតនាដើម្បីបោះបង់ចោលនូវអាវុធនុយក្លេអ៊ែរឡើយ។ អគ្គលេខាធិការអង្គការសហប្រជាជាតិលោកអង់តូនីញ៉ូ ហ្គូទែរស៍បានបញ្ជាក់ថាគិតតាំងពីជាង ២០ឆ្នាំកន្លងទៅ សន្ធិសញ្ញាស្តីពីការហាមឃាត់អាវុធនុយក្លេអ៊ែរនេះជាសន្ធិសញ្ញាពហុភាគីទី១ ដែលពិភពលោកសម្រេចបាន។ នៅក្នុងន័យនេះ លោកអង់តូនីញ៉ូ ហ្គូទែរស៍បានអំពាវនាវឲ្យប្រទេសទាំងអស់រួមគ្នាដើម្បីបង្កើនសន្តិសុខ និងសុវត្ថិភាពសមូហភាព។ សារអំពាវនាវដូចគ្នានេះក៏មានពីប្រមុខសង្ឃកាតូលិកសម្តេចប៉ាបហ្រ្វង់ស័រដែរ។
សម្តេចប៉ាបហ្រ្វង់ស័របានលើកទឹកចិត្តឱ្យប្រទេស និងមនុស្សលោកទាំងអស់ធ្វើការរួមគ្នាដើម្បីកសាងពិភពលោកមួយគ្មានអាវុធនុយក្លេអ៊ែរ និងរួមសាមគ្គីគ្នាដើម្បីលើកស្ទួយសន្តិភាព និងកិច្ចសហប្រតិបត្តិការពហុភាគីដែលមនុស្សជាតិកំពុងត្រូវការខ្លាំងណាស់នាពេលសព្វថ្ងៃ។ ចំណែកប្រធានគណៈកម្មាធិការកាកបាទក្រហមអន្តរជាតិលោកភីធ័រ ម៉ូរ៉េបានថ្លែងនៅក្នុងសេចក្តីប្រកាសព័ត៌មានមួយយ៉ាងដូច្នេះថា « ថ្ងៃនេះជាថ្ងៃជ័យជម្នះសម្រាប់មនុស្សជាតិទូទៅរបស់យើង។ ចូរយើងទាំងអស់គ្នាទទួលយកឱកាសនេះ និងចូលរួមជំរុញសន្ធិសញ្ញានេះឱ្យដល់គោលដៅរបស់វា គឺពិភពលោកគ្មានអាវុធនុយក្លេអ៊ែរ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ