ឃាតកម្មកាស៊ូហ្ស៊ី ៖ អាមេរិកចោទរាជបុត្រស្នងរាជជាសាធារណៈតែមិនដាក់ទណ្ឌកម្ម
រាជបុត្រស្នងរាជរបស់អារ៉ាប៊ីសាអូឌីត ជាអ្នកផ្តល់ភ្លើងខៀវដល់ប្រតិបត្តិការធ្វើឃាតកម្មសម្លាប់អ្នកកាសែត ចាម៉ាល់ កាស៊ូហ្ស៊ី កាលពីឆ្នាំ២០១៨។ នេះបើភ្នាក់ងារចារកិច្ចអាមេរិកដែលទើបចេញរបាយការណ៍ផ្សព្វផ្សាយជាសាធារណៈនៅថ្ងៃសុក្រទី ២៦កុម្ភៈ២០២១។ តាមរយៈការចោទប្រកាន់នេះ សហរដ្ឋអាមេរិកបានសម្រេចដាក់ទណ្ឌកម្មមនុស្សជំនិតនឹងរាជបុត្រ បិនសាល់ម៉ាន់ ជាច្រើនរូប តែមិនដាក់ទណ្ឌកម្មលើរូបមេដឹកនាំដ៏មានអំណាចនេះទេ ព្រោះដើម្បីរក្សាទំនាក់ទំនងជាមួយអារ៉ាប៊ីសាអូឌីតដែលជាសម្ព័ន្ធមិត្តដ៏ចំបងរបស់អាមេរិក។
ចុះផ្សាយនៅថ្ងៃ៖
ស្តាប់ - ០១:៥៦
ដូចការស្មានទុក របាយការណ៍កម្រាស់៤ទំព័រ ដែលអតីតប្រធានាធិបតីអាមេរិកបានបិទខ្ទប់ជាការសម្ងាត់រដ្ឋ និងទើបត្រូវបានទម្លាយតាមសំណើរបស់ប្រធានាធិបតីថ្មីលោកចូបៃដិន បាន បញ្ជាក់ ជាសាធារណៈថា រាជបុត្រស្នងរាជ បិនសាល់ម៉ាន ជាអ្នកនៅពីក្រោយឃាតកម្មលើរូបអ្នកកាសែត ចាម៉ាល់ កាស៊ូហ្ស៊ី នៅក្នុងស្ថានទូតអារ៉ាប៊ីសាអូឌីត នាទីក្រុងអ៊ីស្តង់ប៊ូល ប្រទេសតួកគី កាលពីឆ្នាំ២០១៨។
ព្រះរាជបុត្រស្នងរាជ ដែលជាអ្នកគ្រប់គ្រងស្ថាប័នចារកិច្ច និងសន្តិសុខជាតិទាំងស្រុង ពិតជាមិនអាចបណ្តោយឱ្យមានប្រតិបត្តិការអ្វីដែលពុំឆ្លងកាត់សេចក្តីសម្រេចរបស់លោកឡើយ។ នេះជាការគូសបញ្ជាក់បន្ថែមនៅក្នុងរបាយការណ៍ ដោយមានរាយឈ្មោះអ្នកចូលរួមធ្វើប្រតិបត្តិការដល់ទៅប្រមាណ២០នាក់ មានជាអាទិ៍ អតីតមេចារកិច្ចលំដាប់ទីពីររបស់អារ៉ាប៊ីសាអូឌីត Ahmed al-Assiri និងអតីតទីប្រឹក្សារបស់រាជបុត្រ Saoud al-Qahtani ដែលត្រូវបានតុលាការលាងទោសឱ្យរួចទៅហើយ។
របាយការណ៍ចេញភ្លាម រដ្ឋាភិបាលអាមេរិកក៏បានចាត់វិធានការដាក់ទណ្ឌកម្មហិរញ្ញវត្ថុប្រឆាំងនឹងឧត្តមសេនីយ៍ អាស៊ីរី និងកងកម្លាំងអន្តរាគមន៍រហ័ស ដែលជាកងជើងឆើតការពាររាជបុត្រស្នងរាជនិងដែលគ្រប់គ្រងដោយរាជបុត្រអាល់កាតានី។ ជាសរុប មានជនអារ៉ាប៊ីសាអូឌីត ចំនួន ៧៦រូបទៀតដែលត្រូវបានហាមឃាត់មិនឱ្យចូលជាន់ដីសហរដ្ឋអាមេរិក ក្នុងក្របខ័ណ្ឌនៃទណ្ឌកម្មក្នុងសំណុំរឿងកាស៊ូហ្ស៊ីនេះ។
ប៉ុន្តែរាជបុត្រស្នងរាជ បិន សាលម៉ាន គ្មានឈ្មោះក្នុងបញ្ជីទណ្ឌកម្មអាមេរិកទេ បើទោះបីជាប់ចោទដោយផ្ទាល់ក្នុងសំណុំរឿងឃាតកម្មលើអ្នកកាសែតនេះក៏ដោយ។ ឆ្លើយតបនឹងសំឡេងប្រឆាំងទាមទារឱ្យដាក់ទណ្ឌកម្មរាជបុត្រស្នងរាជ លោកប្រមុខការទូតអាមេរិកបានពន្យល់ថា ទំនាក់ទំនងមិត្តភាពអាមេរិក-អារ៉ាប៊ីសាអូឌីតសំខាន់ណាស់។ អាមេរិកគ្រាន់តែចង់សម្រិតសម្រាំងទំនាក់ទំនងថ្មីជាមួយអារ៉ាប៊ីសាអូឌីត និងមិនចង់ឱ្យមានភាពល្អក់កករប៉ះពាល់ដល់ទំនាក់ទំនងប្រទេសទាំងពីរទេ។
ចំណែកអារ៉ាប៊ីសាអូឌីតវិញ បានច្រានចោលភ្លាម របាយការណ៍របស់ភ្នាក់ងារចារកិច្ចអាមេរិក ដោយចាត់ទុកថាជាសេចក្តីសន្និដ្ឋានខុស និងបានបង្ហាញជំហរបន្តរក្សាភាពជាដៃគូរឹងមាំ និងខ្លាំងក្លាជាមួយអាមេរិកដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ