អាមេរិក-ក្វាតេម៉ាឡា៖អ្នកការពារសិទ្ធិមនុស្សសាទរដំណើរទស្សនកិច្ចរបស់អនុប្រធានាធិបតីអាមេរិក
អនុប្រធានាធិបតីអាមេរិកលោកស្រីកាម៉ាឡា ហារីសកំពុងបំពេញទស្សនកិច្ចនៅអាមេរិកឡាទីន។ នេះជាដំណើរទស្សនកិច្ចអន្តរជាតិលើកទី១ តាំងពីលោកស្រីឡើងកាន់តំណែងក្នុងខែមករាដើមឆ្នាំ ២០២១ នេះ។ បន្ទាប់ពីប្រទេសក្វាតេម៉ាឡា លោកស្រីហារីសកំពុងបំពេញទស្សនកិច្ចនៅក្នុងប្រទេសម៉ិចស៊ិកដែលលោកស្រីបានទៅដល់នាយប់ថ្ងៃចន្ទ ទី៧ មិថុនា។ បញ្ហាអន្តោប្រវសេន៍ខុសច្បាប់ជាប្រធានបទចម្បងនៃទស្សនកិច្ចរបស់លោកស្រីនៅក្នុងប្រទេសក្វាតេម៉ាឡាក៏ដូចជាម៉ិចស៊ិក។ តែនៅក្នុងជំនួបជាមួយប្រធានាធិបតីក្វាតេម៉ាឡាលោកអាឡេហាន់ដ្រូ យ៉ាម៉ាតេ លោកស្រីហារីសមិនញញើតនិយាយពីបញ្ហាពុករលួយទេ។ លោកហ្សកដាន រ៉ូដា អ្នកការពារសិទ្ធិមនុស្សនៅក្វាតេម៉ាឡាបានសាទរដំណើរទស្សនកិច្ចរបស់លោកស្រីហារីស ពិសេសកោតសរសើរលោកស្រីហារីសដែលហ៊ានលើកបញ្ហាពុករលួយទៅនិយាយជាមួយលោកអាឡេហាន់ដ្រូ យ៉ាម៉ាតេ។
ចុះផ្សាយនៅថ្ងៃ៖
ស្តាប់ - ០១:៣១
« សម្រាប់ខ្ញុំ អ្វីដែលសំខាន់ជាងគេនៃជំនួបរវាងប្រធានាធិបតីក្វាតេម៉ាឡា និងអនុប្រធានាធិបតីអាមេរិកគឺថា លោកស្រីកាម៉ាឡា ហារីសបាននិយាយពីបញ្ហាពុករលួយដោយច្បាស់ៗ និងដោយផ្ទាល់។ នេះស បង្ហាញឲ្យឃើញថា ប្រទេសរបស់យើងត្រូវការឲ្យមានការជួយសហការអន្តរជាតិ ព្រោះប្រព័ន្ធតុលាការរបស់យើងមិនឯករាជ្យទេ។ ដូច្នេះ ឧក្រិដ្ឋកម្មដែលបានរៀបចំឡើង និងអំពើពុករលួយធ្វើឱ្យខូចខាតច្រើនណាស់ដល់រឿងសិទ្ធិមនុស្ស។
មានអំពើពុករលួយកាន់តែច្រើនស្មើនឹងមានការគោរពសិទ្ធិមនុស្សកាន់តែតិច។ មានអំពើពុករលួយកាន់តែច្រើនស្មើនឹងមានជនអន្តោប្រវេសន៍កាន់តែច្រើន។ តែខ្ញុំជឿថា បើគ្មានការប្តេជ្ញាចិត្តម៉ឺងម៉ាត់នៅក្នុងយុទ្ធនាការប្រឆាំងនឹងអំពើពុករលួយទេ កិច្ចខិតខំប្រឹងប្រែងរបស់អាមេរិកក៏នឹងគ្មានហុចលទ្ធផលជាក់ស្តែងអ្វីដែរ។ សហរដ្ឋអាមេរិកបានបង្ហាញពីការរួមសហការណ៍ តែកិច្ចសហប្រតិបត្តិការមួយនេះមិនបានធ្វើឲ្យមានការផ្លាស់ប្តូរលើលក្ខខណ្ឌនៃជីវិតរបស់ប្រជាជនក្វាតេម៉ាឡាទេ។
គឺដោយហេតុផលនេះហើយបានជាការលើកឡើងរបស់អនុប្រធានាធិបតីអាមេរិកលោកស្រីកាម៉ាឡា ហារីស គឺជាមូលដ្ឋានគ្រឹះ។ យើងកំពុងរង់ចាំឲ្យស្ថាប័នតុលាការក្វាតេម៉ាឡាទទួលស្គាល់ពីចំណុចខ្សោយរបស់ក្វាតេម៉ាឡា ហើយនៅក្នុងបញ្ហានេះ យើងត្រូវការឲ្យមានការសហការអន្តរជាតិ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ