លោកដូណាល់ ត្រាំ ត្រលប់មករិះគន់នយោបាយអន្តោប្រវេសន៍របស់លោកប្រធានាធិបតី ចូ បៃដិន
ចាញ់ឆ្នោត អស់តំណែងប្រធានាធិបតីអាមេរិក នៅឆ្នាំ ២០២០ លោកដូណាល់ ត្រាំ មិនទាន់ទៅណាឆ្ងាយពីឆាកនយោបាយអាមេរិកនោះទេ។ នៅថ្ងៃសៅរ៍ទី ២៦មិថុនា អតីតប្រធានាធិបតីអាមេរិក បានចេញធ្វើយុទ្ធនាការបោះឆ្នោត ដើម្បីជួយមនុស្សជំនិតរបស់លោកម្នាក់ ដែលឈរឈ្មោះ ជាបេក្ខជនគណបក្សសាធារណរដ្ឋ សម្រាប់ ការបោះឆ្នោតពាក់កណ្តាលអាណត្តិ។ នៅចំពោះមុខអ្នកគាំទ្ររបស់លោក នៅរដ្ឋ អូហៃយូ លោកដូណាល់ ត្រាំ បានរិះគន់នយោបាយអន្តោប្រវេសន៍របស់លោកចូ បៃដិន និងបានអំពាវនាវឲ្យគេបោះឆ្នោត ឲ្យគណបក្សសាធារណរដ្ឋ។
ចុះផ្សាយនៅថ្ងៃ៖
ស្តាប់ - ០២:៤២
៥ខែ ក្រោយចាកចេញពីសេតវិមាន អតីតប្រធានាធិបតីអាមេរិក លោកដូណាល់ ត្រាំបានត្រលប់មកជួបអ្នកគាំទ្ររបស់លោកសាជាថ្មី។ នៅថ្ងៃសៅរ៍ម្សិលមិញ លោកដូណាល់ ត្រាំ បានផ្តើមបើកយុទ្ធនាការ ឃោសនា សម្រាប់ការបោះឆ្នោតសភាអាមេរិក ពាក់កណ្តាលអាណត្តិ ដែលត្រូវប្រព្រឹត្តទៅ នៅឆ្នាំក្រោយ។
នៅរដ្ឋអូហៃយូ លោកដូណាល់ ត្រាំ បានចេញមុខគាំទ្របេក្ខជនបក្សសាធារណរដ្ឋម្នាក់ ដែលធ្លាប់ធ្វើជាជំនួយការនៅសេតវិមាន និងដែលជាគូប្រជែងនឹងលោក Anthony Gonzalez បេក្ខជនម្នាក់ទៀត មកពីបក្សសាធារណរដ្ឋដូចគ្នា។ លោកដូណាល់ ត្រាំ ស្អប់ មិនគាំទ្រ លោក Gonzalez ដែលជាអ្នកតំណាងរាស្រ្តនៅរដ្ឋអូហៃយូ ព្រោះ លោក ស្ថិតនៅក្នុងចំណោមសមាជិកបក្សសាធារណរដ្ឋ ១០រូប ដែលធ្លាប់ចេញមុខបោះឆ្នោតគាំទ្រឲ្យគេដកលោកដូណាល់ ត្រាំ ចេញពីតំណែង នៅចុងឆ្នាំ ២០២០
ធ្លាប់រួចផុតពីការបោះឆ្នោត ដកតំណែង ប្រធានាធិបតីដល់ទៅ២លើក នៅព្រឹទ្ធសភា លោកដូណាល់ ត្រាំ នៅមានឥទ្ធិពលទៅលើសមាជិកបក្សសាធារណរដ្ឋ។ ទោះបី លោកដូណាល់ ត្រាំ មិនបានបញ្ជាក់ច្បាស់ពីផែនការចង់វិលត្រលប់មកឈរឈ្មោះ សាជាថ្មី សម្រាប់ការបោះឆ្នោតប្រធានាធិបតី នៅឆ្នាំ ២០២៤ ប៉ុន្តែ យុទ្ធនាការឃោសនារបស់លោកដើម្បីជួយ គណបក្សសាធារណរដ្ឋឲ្យឈ្នះឆ្នោត ដើម្បីចូលគ្រប់គ្រងសំឡេងភាគច្រើននៅសភាទាំងពីរជាន់ថ្នាក់ គឺជាឱកាសមួយសម្រាប់ឲ្យលោកដូណាល់ ត្រាំ សន្សំពិន្ទុ ប្រមូលសំឡេងឆ្នោត សម្រាប់ការបោះឆ្នោតប្រធានាធិបតីនៅ ៣ឆ្នាំខាងមុខ។
បាត់មុខ ជាង ៥ខែ នៅក្រោយ ចាញ់ឆ្នោត បាត់តំណែងប្រធានាធិបតី អាមេរិក លោកដូណាល់ ត្រាំ បានត្រលប់មកជួបអ្នកគាំទ្រ របស់លោកជាមួយ សំដី ឥរិយាបថ ដូចដើម គ្មានផ្លាស់ប្តូរ។
ថ្លែងទៅកាន់អ្នកគាំទ្ររាប់ពាន់នាក់ នៅរដ្ឋអូហៃយូ លោកដូណាល់ ត្រាំ នៅតែនិយាយចោទប្រកាន់ បក្សប្រជាធិបតេយ្យថាជាអ្នកលួចសន្លឹកឆ្នោត នៅឆ្នាំ ២០២០។ អតីតប្រធានាធិបតី សក់លឿងខ្ចីរូបនេះ នៅបានរិះគន់មិនសំចៃមាត់ នយោបាយអន្តោប្រវេសន៍របស់រដ្ឋបាលលោកចូ បៃដិន ដែលបានបណ្តោយឲ្យជនអន្តោប្រវេសន៍ខុសច្បាប់ ចូលកាន់តែច្រើន ក្នុងទឹកដីអាមេរិក។ សម្រាប់លោកដូណាល់ ត្រាំ ដើម្បីទប់ស្កាត់លំហូរជនអន្តោរប្រវេសន៍ ក្នុងអាណត្តិលោកចូ បៃដិន គេត្រូវតែបោះឆ្នោត ជួយឲ្យគណបក្សសាធារណរដ្ឋ ឈ្នះឆ្នោត ចូលគ្រប់គ្រង សភាអាមេរិក ទាំងពីរជាន់ថ្នាក់ នៅឆ្នាំក្រោយនេះ។
សព្វថ្ងៃនេះ គណបក្សប្រជាធិបតេយ្យកំពុងគ្រប់គ្រង សភាអ្នកតំណាងរាស្រ្ត និងព្រឹទ្ធសភា ជាមួយសំឡេងនាំមុខ ស្តួចស្តើងបំផុត។ គេវាយតម្លៃថា នៅក្រោមអាណត្តិដឹកនាំរបស់ប្រធានាធិបតី មកពីបក្សប្រជាធិបតេយ្យ គណបក្សសាធារណរដ្ឋនឹងអាចមានឱកាស ច្រើន ដើម្បីឈ្នះឆ្នោត ចូលទៅគ្រប់គ្រងសភា ទាំងពីរជាន់ថ្នាក់ឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ