អាមេរិក៖រដ្ឋមន្រ្តីការពារជាតិទៅកាន់តំបន់សមុទ្រខ្មៅ មុននឹងទៅចូលរួមប្រជុំជាមួយអង្គការអូតង់
រដ្ឋមន្រ្តីការពារជាតិអាមេរិកលោកឡយដ៍ អូស្ទីនបានចេញដំណើរទៅកាន់តំបន់សមុទ្រខ្មៅនៅថ្ងៃអាទិត្យ ទិ១៧ តុលា។ កម្មវត្ថុនៃទស្សនកិច្ចនេះ គឺដើម្បីបង្ហាញការគាំទ្ររបស់អាមេរិក និងការពង្រឹងទំនាក់ទំនងជាមួយក្រុមប្រទេសនៅក្នុងតំបន់ដែលកំពុងស្ថិតក្រោមគំនាបរបស់ប្រទេសរុស្ស៊ី។ បន្ទាប់មក លោកឡយដ៍ អូស្ទីននឹងបន្តដំណើរទៅកាន់ទីក្រុងព្រុចសែល ប្រទេសបែលហ្ស៊ិកដើម្បីចូលរួមនៅក្នុងកិច្ចប្រជុំថ្នាក់រដ្ឋមន្រ្តីការពារជាតិរបស់អង្គការអូតង់។
ចុះផ្សាយនៅថ្ងៃ៖
ស្តាប់ - ០២:១៦
នៅក្នុងដំណើរទៅកាន់តំបន់សមុទ្រខ្មៅ ប្រមុខមន្ទីរបញ្ចកោនអាមេរិកលោកឡយដ៍ អូស្ទីនទៅទស្សនកិច្ចនៅក្នុងប្រទេសចំនួន ៣ គឺហ្សកហ្ស៊ី រូម៉ានី និងប្រទេសអ៊ុយក្រែន។ « យើងធានា និងពង្រឹងអធិបតេយ្យភាពរបស់ក្រុមប្រទេសដែលស្ថិតនៅជួរមុខនៃការឈ្លានពានរបស់ប្រទេសរុស្ស៊ី » នេះជាការថ្លែងដោយមិនញញើតនៅចំពោះមុខក្រុមអ្នកកាសែតរបស់អ្នកទទួលខុសត្រូវជាន់ខ្ពស់ម្នាក់នៃក្រសួងការពារជាតិអាមេរិក។ ក្រៅពីធានា និងពង្រឹងអធិបតេយ្យភាពរបស់ក្រុមប្រទេសនៅក្នុងតំបន់ លោកឡយដ៍ អូស្ទីនក៏នឹងថ្លែងសារអរគុណ និងដឹងគុណដល់ក្រុមប្រទេសដៃគូចំពោះការចូលរួមរបស់ពួកគេជាមួយអាមេរិកនៅក្នុងសង្រ្គាមអាហ្វហ្កានីស្ថានរយៈពេល ២០ឆ្នាំ។ សង្រ្គាមដែលអាមេរិកទើបបានសម្រេចដកទ័ពទាំងអស់យ៉ាងទាន់ហន់នៅជាង ២ខែមុននេះ។
ជម្រើសទៅកាន់តំបន់សមុទ្រខ្មៅរបស់ប្រមុខការពារជាតិអាមេរិកពេលនេះធ្វើឡើង ខណៈដែលប្រទេសរុស្ស៊ីបាន និងកំពុងពង្រីកឥទ្ធិពលរបស់ខ្លួន ពិសេសបានរារាំងមិនឲ្យសម្ព័ន្ធអាមេរិក អឺរ៉ុប ឬអង្គការអូតង់អាចពង្រីកសមាជិកបន្ថែមរបស់ខ្លួន ពិសេសការព្យាយាមចង់ចូលរបស់ប្រទេសអ៊ុយក្រែន។ គួរបញ្ជាក់ថា ក្នុងចំណោមប្រទេសទាំង ៣ គឺហ្សកហ្ស៊ី រូម៉ានី និងអ៊ុយក្រែនដែលលោកឡយដ៍ អូស្ទីនទៅទស្សនកិច្ច មានតែរូម៉ានីមួយជាសមាជិកពេញសិទ្ធិរបស់អូតង់។ ចំណែកហ្សកហ្ស៊ី និងអ៊ុយក្រែនបន្តនៅត្រឹមជាប្រទេសដៃគូរបស់អូតង់។ ហ្សកហ្ស៊ី និងអ៊ុយក្រែនសង្ឃឹមដូចគ្នាថា ទស្សនកិច្ចរបស់ប្រមុខការពារជាតិអាមេរិកនឹងជួយពន្លឿនសំណើសុំចូលជាសមាជិកអូតង់របស់ពួកគេ។
បន្ទាប់ពីហ្សកហ្ស៊ី រូម៉ានី និងប្រទេសអ៊ុយក្រែន លោកឡយដ៍ អូស្ទីននឹងបន្តដំណើរទៅចូលរួមនៅក្នុងកិច្ចប្រជុំថ្នាក់រដ្ឋមន្រ្តីការពារជាតិរបស់អង្គការអូតង់ក្នុងទីក្រុងព្រុចសែល ប្រទេសបែលហ្ស៊ិកនៅថ្ងៃទី២១ និង ២២ តុលា។ តែអ្វីជាការកត់សម្គាល់ ទំនាក់ទំនងរវាងអាមេរិក និងអឺរ៉ុប និយាយជារួម និងរវាងអាមេរិក និងអូតង់ និយាយដោយឡែកហាក់កំពុងស្គាល់ភាពតានតឹងជាថ្មី បន្ទាប់ពីប្រធានាធិបតីអាមេរិកលោកចូ បៃដិនបានបង្កើតសម្ព័ន្ធភាពត្រីភាគីជាមួយអូស្រា្តលី និងអង់គ្លេសសម្រាប់តំបន់ឥណ្ឌូប៉ាស៊ីហ្វិក។ សម្ព័ន្ធភាពត្រីភាគីមួយនេះបានធ្វើឲ្យអូស្រា្តលីលុបកុងត្រាទិញនាវាមុជទឹកបារាំង និងងាកទៅទិញនាវាមុជទឹកអាមេរិកវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ