អាមេរិកចោទប្រកាន់អ៊ីរ៉ង់ថាជាអ្នកធ្វើឲ្យការចរចានុយក្លេអ៊ែរ រាំងស្ទះ
អាមេរិកបានចោទប្រកាន់អ៊ីរ៉ង់ថា បានព្យាយាមរារាំងមិនឲ្យការចរចាស្តីពីសំណុំរឿងនុយក្លេអ៊ែរបោះជំហានទៅមុខ។ តាមអ្នកទទួលខុសត្រូវអាមេរិកម្នាក់ ដែលបាននិយាយប្រាប់ទីភ្នាក់ងារព័ត៌មានបារាំង AFP អ៊ីរ៉ង់គ្មានចេតនាចង់ចរចាពិតប្រាកដដើម្បីស្រោចស្រង់កិច្ចព្រមព្រៀងនុយក្លេអ៊ែរ ប៉ុន្តែ ជាមួយគ្នានោះ អ៊ីរ៉ង់ នៅតែសកម្ម បន្តអភិវឌ្ឍកម្មវិធីនុយក្លេអ៊ែរយោធារបស់ខ្លួន ដែលនេះជារឿងដែលអាមេរិក មិនអាចទទួលយកបាននោះទេ។ ដោយមិនបាននិយាយបិទផ្លូវចរចាទាំងស្រុង មន្រ្តីអាមេរិកបានពន្លយពីជម្រើសផ្សេងទៀតរបស់អាមេរិកដើម្បីដាក់សម្ពាធឲ្យអ៊ីរ៉ង់ ត្រលប់ទៅគោរពកិច្ចព្រមព្រៀងនុយក្លេអ៊ែរ ឆ្នាំ ២០១៥។
ចុះផ្សាយនៅថ្ងៃ៖
ស្តាប់ - ០២:២៤
ការចរចាក្នុងគោលដៅ ស្រោចស្រង់កិច្ចព្រមព្រៀងនុយក្លេអ៊ែរអ៊ីរ៉ង់បានចាប់ផ្តើមកាលពីថ្ងៃចន្ទ នៅទីក្រុងវីយ៉ែន ប្រទេសអូទ្រីសបានបិទបញ្ចប់ កាលពីថ្ងៃសុក្រ ដោយគ្មានលទ្ធផលអ្វីទាំងអស់។ អ្នកទទួលខុសត្រូវអាមេរិកម្នាក់ ដែលតាមដានការចរចានៅទីក្រុងវីយ៉ែន បានសំដែង ការខកចិត្ត និងបានបន្ទោសអ៊ីរ៉ង់ថា កំពុងយកជើងរាទឹក បន្ទុចបង្អាក់មិនឲ្យការចរចាដើម្បីសង្រ្គោះ កិច្ចព្រមព្រៀងនុយក្លេអ៊ែរអ៊ីរ៉ង់ អាចបោះជំហានទៅមុខ។ សម្រាប់មន្រ្តីអាមេរិកខាងលើ អាមេរិកមិនអាចទទួលយកបានទេ ឥរិយាបទរបស់អ៊ីរ៉ង់ ដែលប៉ុនប៉ងពន្យារពេលចរចាផ្នែកការទូត ប៉ុន្តែទន្ទឹមគ្នានោះ អ៊ីរ៉ង់កំពុងបង្កើនសកម្មភាព អភិវឌ្ឍកម្មវិធីនុយក្លេអ៊ែរ។
នៅក្រោយ អាមេរិកប្រកាសដកខ្លួនដោយឯកតោភាគី នៅឆ្នាំ ២០១៨ អ៊ីរ៉ង់ ត្រូវបានប្រទេសហត្ថលេខីនៅអឺរ៉ុបចោទប្រកាន់ថា បានរំលោភ កិច្ចព្រមព្រៀង នុយក្លេអ៊ែរ អ៊ីរ៉ង់។ អ៊ីរ៉ង់បានត្រលប់ទៅអភិវឌ្ឍបង្កើនម៉ាស៊ីនប្រតិករ និងចម្រើនសារធាតុអ៊ុយរ៉ាញ៉ូម ក្នុងបរិមាណច្រើន ដែលផ្ទុយពីការចែងក្នុងកិច្ចព្រមព្រៀង។
ការចរចាហាក់មិនបោះជំហានទៅមុខ។ ជាងពេលណាៗទាំងអស់ អាមេរិកហាក់អស់មានភាពអត់ធ្មត់ ដើម្បីបន្តការចរចា ដើម្បីស្រោចស្រង់កិច្ចព្រមព្រៀង នុយក្លេអ៊ែរអ៊ីរ៉ង់។ នៅខែតុលាកន្លងទៅ រដ្ឋបាលអាមេរិកធ្លាប់បានព្រមានប្រើជម្រើសថ្មីក្រៅពីការចរចាផ្លូវទូត ដើម្បីដាក់សម្ពាធលើអ៊ីរ៉ង់។ អាមេរិកបានពន្លយពីជម្រើស ផ្លូវដើរមួយទៀត ដែលអាចជាការប្រើកម្លាំងយោធា។
ប្រឈមនឹងការគំរាមប្រើកម្លាំងយោធា អ៊ីរ៉ង់ បានពង្រឹងប្រព័ន្ធការពារដែនអាកាសរបស់ខ្លួន។ នៅថ្ងៃអាទិត្យ កងទ័ពអ៊ីរ៉ង់បានបាញ់សាកល្បងមីស៊ីលដែនអាកាស នៅក្បែររោងចក្រចម្រើនសារធាតុអ៊ុយរ៉ាញ៉ូមមួយ នៅទីក្រុងBadroud។ សម្រាប់អ្នកនាំពាក្យរបស់កងទ័ពអ៊ីរ៉ង់ ការបាញ់មីស៊ីល ធ្វើឡើងដើម្បី ធ្វើតេស្តសាកល្បងភាពរឹងមាំ ប្រព័ន្ធការពារដែនអាកាស ដែលគ្របដណ្តប់តំបន់ដែលមានរោងចក្រ នុយក្លេអ៊ែរ។
អ៊ីស្រាអែលផ្ទាល់ដែលជាសត្រូវសួរពូជរបស់អ៊ីរ៉ង់ និងធ្លាប់បានរិះគន់កិច្ចព្រមព្រៀងនុយក្លេអ៊ែរអ៊ីរ៉ង់ ឆ្នាំ ២០១៥ ធ្លាប់បាននិយាយជាច្រើនដងថា នឹងប្រើគ្រប់មធ្យោបាយ រារាំងមិនឲ្យអ៊ីរ៉ង់អភិវឌ្ឍកម្មវិធីនុយក្លេអ៊ែរ ដែលអ៊ីស្រាអែលចោទប្រកាន់ថា ធ្វើឡើងក្នុងគោលដៅ ផលិតគ្រាប់បែកនុយក្លេអ៊ែរ ដែលគ្រោះថ្នាក់គំរាមកំហែងខ្លាំង សម្រាប់អ៊ីស្រាអែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ