អ៊ីរ៉ង់ចង់ឲ្យអាមេរិកធានាថានឹងមិនដកខ្លួនចេញពីកិច្ចព្រមព្រៀងនុយក្លេអ៊ែរជាថ្មី
ប្រទេសអ៊ីរ៉ង់ នៅថ្ងៃចន្ទ ទី៨ វិច្ឆិកា បានទាមទារឲ្យអាមេរិកធានាអះអាងថានឹងមិនដកខ្លួនជាថ្មីទៀតនោះទេចេញពីកិច្ចព្រមព្រៀងនុយក្លេអ៊ែរឆ្នាំ២០១៥ ប្រសិនបើការពិភាក្សាសង្គ្រោះកិច្ចព្រមព្រៀងនេះទទួលបានជោគជ័យ។ ក្រៅពីនេះ ទីក្រុងតេហេរ៉ង់បានព្រមានដែរថាដើម្បីបង្ហាញពីឆន្ទៈចង់ចរចា អាមេរិកត្រូវតែដកចេញទណ្ឌកម្មទាំងអស់ដែលដាក់លើអ៊ីរ៉ង់។
ចុះផ្សាយនៅថ្ងៃ៖
ស្តាប់ - ០២:២៥
ក្រោយប្រកាសជំហរចង់បន្តកិច្ចចរចានុយក្លេអ៊ែរ ប្រទេសអ៊ីរ៉ង់បានប្រកាសទាមទារឲ្យទីក្រុងវ៉ាស៊ីនតោនធានាបញ្ជាក់ថាគ្មានរដ្ឋាភិបាលអាមេរិកណាផ្សេងទៀតនឹងមិនទទួលស្គាល់កិច្ចព្រមព្រៀងនឹងគ្នាឬក៏ច្បាប់អន្តរជាតិនោះទេ។ ហើយរឿងរ៉ាវកន្លងមកក៏នឹងមិនកើតឡើងជាថ្មីម្តងទៀតដែរ។
ពាក្យសម្តីខាងលើនេះគឺទីក្រុងតេហេរ៉ង់ចង់បង្ហាញពីការមិនទុកចិត្តលើរដ្ឋាភិបាលអាមេរិកដែលកាលពីសម័យដឹកនាំរបស់លោកដូណាល់ ត្រាំ បានដកខ្លួនចេញពីកិច្ចព្រមព្រៀងនុយក្លេអ៊ែរអ៊ីរ៉ង់។
ក្រោយជាប់គាំងតាំងខែមិថុនា ឆ្នាំ២០២១មក ការពិភាក្សាដើម្បីស្រោចស្រង់កិច្ចព្រមព្រៀងនុយក្លេអ៊ែររវាងអ៊ីរ៉ង់ និងប្រទេសមហាអំណាចផ្សេងទៀតគ្រោងនឹងចាប់ផ្តើមឡើងវិញក្នុងទីក្រុងវីយែនប្រទេសអូទ្រីសនាថ្ងៃទី២៩ ខែវិច្ឆិកាខាងមុខ។
អ្នកនាំពាក្យក្រសួងការបរទេសអ៊ីរ៉ង់ លោក សេដ ខាទីហ្សាដេហ្វ (Said Khatibzadeh) បាននិយាយថាអាមេរិកត្រូវតែលុបចោលទណ្ឌកម្មទាំងអស់ដែលដាក់លើទីក្រុងតេហេរ៉ង់ ក្រោយពេលដើរចេញពីកិច្ចព្រមព្រៀងកាលពីឆ្នាំ ២០១៨។ ហើយវ៉ាស៊ីនតោនក៏ត្រូវទទួលស្គាល់ផងដែរនូវកំហុសរបស់ខ្លួនក្នុងការដើរចេញពីកិច្ចព្រមព្រៀង។
អ្នកនាំពាក្យក្រសួងការបរទេសអ៊ីរ៉ង់រូបនេះបានសង្កត់ធ្ងន់ទៀតថាដំណើរការនៃកិច្ចចរចាទៅមុខឬថយក្រោយគឺអាស្រ័យទៅនឹងការដកទណ្ឌកម្មរបស់អាមេរិក។
គួររំឭកថា សហរដ្ឋអាមេរិកក្រោមការដឹកនាំរបស់លោកដូណាល់ ត្រាំ បានសម្រេចដកខ្លួនជាឯកតោភាគីចេញពីកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥ និងបន្ទាប់មកទៀតបានដាក់ទណ្ឌកម្មយ៉ាងធ្ងន់ធ្ងរលើអ៊ីរ៉ង់រួមទាំងការហាមឃាត់ជាឯកតោភាគីលើការនាំចេញប្រេងរបស់អ៊ីរ៉ង់ផង។ ជាការឆ្លើយតប នៅឆ្នាំ២០១៩ អ៊ីរ៉ង់បានចាប់ផ្តើមលែងគោរពតាមលក្ខន្តិកៈតឹងរ៉ឹងដែលមានចែងនៅក្នុងកិច្ចព្រមព្រៀង និងបែរងាកទៅបង្កើនការចម្រើនសារធាតុអ៊ុយរ៉ានីញ៉ូម។
លោកប្រធានាធិបតីអាមេរិកចូ បៃដិន ដែលបានចូលកាន់តំណែងនៅសេតវិមានក្នុងខែមករា ឆ្នាំ២០២១ សង្ឃឹមថានឹងអាចត្រលប់ទៅកាន់កិច្ចព្រមព្រៀងឆ្នាំ២០១៥ វិញ។ ក៏ប៉ុន្តែភាគីអ៊ីរ៉ង់បានព្រលយជាមុនច្រើនដងរួចហើយថាវ៉ាស៊ីនតោនត្រូវតែដកទណ្ឌកម្មទាំងអស់ដែលដាក់លើតេហេរ៉ង់ បើពិតជាចង់ពិភាក្សាស្តារកិច្ចព្រមព្រៀងនឹងគ្នាមែននោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ