ប្រមុខ AIEA ផ្តើមទស្សនកិច្ចនៅអ៊ីរ៉ង់ ខណៈដែលអ៊ីរ៉ង់កំពុងបង្កើនសមត្ថភាពនុយក្លេអ៊ែរ
នៅថ្ងៃអង្គារ ទី២៣ វិច្ឆិកា ប្រមុខទីភ្នាក់ងារថាមពលបរិមាណូអន្តរជាតិ (AIEA) លោករ៉ាហ្វាអ៊ែល ក្រូស៊ីបានផ្តើមកិច្ចប្រជុំជាមួយរដ្ឋាភិបាលអ៊ីរ៉ង់។ ជំនួបនេះបានធ្វើឡើង មុនការផ្តើមកិច្ចចរចាជាថ្មីរវាងសហគមន៍អន្តរជាតិ និងអ៊ីរ៉ង់នៅថ្ងៃទី២៩ វិច្ឆិកាខាងមុខស្តីពីកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥។ តែអ្វីដែលជាក្តីបារម្ភខ្លាំងរបស់ប្រទេសជាច្រើនពេលនេះ គឺកំណើនខ្លាំងនៃសមត្ថភាពនុយក្លេអ៊ែររបស់អ៊ីរ៉ង់។ គឺត្រង់ចំណុចនេះហើយដែលប្រមុខ AIEA ត្រូវលើកយកទៅជជែកជាមួយអ៊ីរ៉ង់។
ចុះផ្សាយនៅថ្ងៃ៖
ស្តាប់ - ០២:២១
គឺជាមួយនឹងតួលេខមិនល្អទាល់តែសោះដែលប្រមុខទីភ្នាក់ងារថាមពលបរិមាណូអន្តរជាតិ (AIEA) លោករ៉ាហ្វាអ៊ែល ក្រូស៊ីកំពុងមានវត្តមានលើទឹកដីអ៊ីរ៉ង់។ តួលេខមិនល្អដែលគេចង់និយាយនេះ គឺការដែលអ៊ីរ៉ង់បានស្តុកសារធាតុអ៊ុយរ៉ាញ៉ូមក្នុងបរិមាណ ១២ដងច្រើនជាងការអនុញ្ញាត និងការដែលអ៊ីរ៉ង់បានធ្វើការចម្រើនធាតុអ៊ុយរ៉ាញ៉ូមក្នុងអត្រាដល់ទៅ ៦០%។ ការចម្រើនធាតុអ៊ុយរ៉ាញ៉ូមក្នុងអត្រា ៦០% នេះមិនមែនសម្រាប់ប្រើនៅក្នុងវិស័យស៊ីវិលទេ។ ដូច្នេះសម្រាប់ប្រទេសលោកខាងលិចមួយចំនួន ពិសេសអាមេរិក អ៊ីរ៉ង់កំពុងធ្វើដំណើរខុសគោលដៅដែលគេត្រូវកែតម្រង់ជាបន្ទាន់។
នេះហើយជាកម្មវត្ថុនៃទស្សនកិច្ចរបស់លោករ៉ាហ្វាអ៊ែល ក្រូស៊ីនៅអ៊ីរ៉ង់ពេលនេះ។ នៅក្នុងទីក្រុងតេហេរ៉ង់ លោកក្រូស៊ីជួបសន្ទនាជាមួយប្រមុខការទូត និងប្រមុខអង្គការថាមពលបរមាណូអ៊ីរ៉ង់។ អ៊ីរ៉ង់តាមរយៈអ្នកនាំពាក្យក្រសួងការបរទេសបានថ្លែងដោយសង្ឃឹមថា ទស្សនកិច្ចរបស់លោកក្រូស៊ីមានលក្ខណៈស្ថាបនាដូចទស្សនកិច្ចលើកមុនកាលពីថ្ងៃទី១៩ កញ្ញាអ៊ីចឹងដែរ។ អ្នកនាំពាក្យក្រសួងការបរទេសអ៊ីរ៉ង់រូបនេះដដែលបានបន្ថែមថា អ៊ីរ៉ង់តែងណែនាំ AIEA ឲ្យស្ថិតលើផ្លូវនៃកិច្ចសហប្រតិបត្តិការ និងមិនត្រូវបណ្តោយឲ្យប្រទេសខ្លះប្រើឈ្មោះ AIEA ក្នុងគោលដៅនយោបាយរបស់ខ្លួនឡើយ។
វត្តមានរបស់ប្រមុខ AIEA លោកក្រូស៊ីនៅអ៊ីរ៉ង់ពេលនេះបានធ្វើឡើង ប៉ុន្មានថ្ងៃមុនការផ្តើមកិច្ចចរចាជាថ្មីរវាងសហគមន៍អន្តរជាតិ និងអ៊ីរ៉ង់ក្នុងប្រទេសអូទ្រីសដែលបានផ្អាកអស់រយៈពេល ៥ខែ។ គឺជាកិច្ចចរចាដែលភាគីហត្ថលេខីបន្តព្យាយាមស្រោចស្រង់កិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥។ គួរបញ្ជាក់ថា ខុសពីប្រទេសហត្ថលេខីផ្សេង មានអាល្លឺម៉ង់ ចិន បារាំង អង់គ្លេស និងរុស្ស៊ី កិច្ចព្រមព្រៀងឆ្នាំ ២០១៥ មួយនេះត្រូវបានអតីតប្រធានាធិបតីអាមេរិកលោកត្រាំដកអាមេរិកចេញក្នុងឆ្នាំ ២០១៨ និងបានដាក់ទណ្ឌកម្មជាថ្មីលើអ៊ីរ៉ង់។
តាំងពីពេលនោះមក អ៊ីរ៉ង់ក៏បានចាប់ផ្តើមមិនគោរពពេញលេញលើកិច្ចព្រមព្រៀង ពិសេសបានស្តុកលើសចំនួន និងបានធ្វើការចម្រើនធាតុអ៊ុយរ៉ាញ៉ូមក្នុងអត្រាខ្ពស់ខ្លាំងដែលមានចែងនៅក្នុងកិច្ចព្រមព្រៀង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ