អាមេរិកផ្តើមបន្ធូរទណ្ឌកម្មវេណេស៊ុយអេឡា ដែលចុះកិច្ចព្រមព្រៀងជាមួយបក្សប្រឆាំង
គ្រាន់តែរដ្ឋាភិបាលកាន់អំណាចនិងបក្សប្រឆាំងវេណេស៊ុយអេឡាបានចុះកិច្ចព្រមព្រៀងជាប្រវត្តិសាស្ត្រនឹងគ្នា នៅល្ងាចថ្ងៃទី ២៦វិច្ឆិកា សហរដ្ឋអាមេរិកបានប្រកាសលើកទណ្ឌកម្មប្រឆាំងនឹងវិស័យប្រេងវេណេស៊ុយអេឡាជាបណ្តើរៗភ្លាមៗ ដែរ។ វ៉ាស៊ីនតោនថែមទាំងបានអនុញ្ញាតឱ្យក្រុមហ៊ុនប្រេងឥន្ធនៈអាមេរិក Chevron ត្រលប់ទៅធ្វើសកម្មភាពបូមប្រេង នៅវេណេស៊ុយអេឡា សម្រាប់នាំចូលទៅអាមេរិកទៀតផង។
ចុះផ្សាយនៅថ្ងៃ៖
ស្តាប់ - ០១:៤៦
នៅក្នុងសេចក្តីថ្លែងការណ៍ ក្រុមហ៊ុនប្រេងឥន្ធនៈ Chevron អាចត្រលប់ទៅផ្តើមសកម្មភាព បូមប្រេងដោយសហការជាមួយក្រុមហ៊ុនប្រេងរដ្ឋវេណេស៊ុយអេឡា តែក្នុងករណីដែលក្រុមហ៊ុនវេណេស៊ុយអេឡាមិនប៉ះប្រាក់ចំណូលរបស់ក្រុមហ៊ុនChevronតែប៉ុណ្ណោះ។
ការសម្រេចបន្ធូរបន្ថយទណ្ឌកម្មលើវិស័យប្រេងនេះ បានប្រកាសឡើងក្រោយពីរដ្ឋាភិបាលវេណេស៊ុយអេឡា និងបក្សប្រឆាំងបានរកឃើញកិច្ចព្រមព្រៀងនៅក្នុងប្រទេសម៉ិចស៊ិក បង្កើតមូលនិធិការពារសង្គម និងក្នុងខណៈដែលអាមេរិកកំពុងស្វែងរកប្រភពថាមពលមកជំនួស ប្រភពថាមពលរុស្ស៊ីដែលជាប់ទណ្ឌកម្មពីបទចូលធ្វើសង្គ្រាមទន្ទ្រានអ៊ុយក្រែន។
ការបង្កើតមូលនិធិការពារសង្គម មានទិសដៅរារាំងពលរដ្ឋវេណេស៊ុយអេឡាកុំឱ្យរត់ចាកចេញពីប្រទេស និងជួយសម្រួលឱ្យពលរដ្ឋអាចទទួលបាននូវស្បៀងអាហារ ថ្នាំសង្កូវសេវាសុខាភិបាល និង គម្រោងហេដ្ឋារចនាសម្ព័ន្ធជួសជុលបណ្តាញអគ្គីសនីក្នុងប្រទេស។ មូលនិធិនេះ ជាលក្ខខណ្ឌមួយក្នុងចំណោមលក្ខខណ្ឌជាច្រើនទៀតរបស់អាមេរិក (រៀបចំបោះឆ្នោតប្រធានាធិបតីនៅឆ្នាំ២០២៤ ស្ថានភាពអ្នកទោសនយោបាយ) ជាថ្នូរនឹងការលើកទណ្ឌកម្មប្រឆាំងវេណេស៊ុយអេឡា។
បើតាមអង្គការសហប្រជាជាតិ កង្វះអាហារ ថ្នាំពេទ្យនិងអតិផរណា បានជំរុញឱ្យពលរដ្ឋវេណេស៊ុយអេឡាជាង៧លាននាក់ រត់ភៀសខ្លួននៅឆ្នាំនេះ សំដៅប្រទេសក្នុងតំបន់អាមេរិកឡាទីនផ្សេងទៀត និងសហរដ្ឋអាមេរិក។ ជាប្រទេសសម្បូរប្រេង តែជាងពាក់កណ្តាលនៃប្រជាជនរស់នៅក្នុងប្រទេសវេណេស៊ុយអេឡា ជួបបញ្ហាអស្ថិរភាពចំណីអាហារមធ្យមនិងធ្ងន់ធ្ងរ កាលពីឆ្នាំទៅ។ នេះបើតាមលទ្ធផលអង្កេតរបស់សកលវិទ្យាល័យវេណេស៊ុយអេឡា។
ក្រោយពីបានរកឃើញកិច្ចព្រមព្រៀង រដ្ឋាភិបាលនិងបក្សប្រឆាំងវេណេស៊ុយអេឡា បានសុំឱ្យអង្គការសហប្រជាជាតិបញ្ចេញហិរញ្ញវត្ថុរាប់ពាន់លានដុល្លារដែលបង្កកក្នុងធនាគារបរទេស សម្រាប់មកចាយវាយប្រយុទ្ធប្រឆាំងនឹងវិបត្តិមនុស្សធម៌នៅក្នុងប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ