ប្រតិភូអាមេរិកទៅចិនដើម្បីកម្តៅទំនាក់ទំនងនិងដើម្បីនិយាយពីតៃវ៉ាន់
សមាជិកប្រតិភូអាមេរិកជាន់ខ្ពស់ បានជួបពិភាក្សាជាមួយសមភាគីចិនថ្នាក់មូលដ្ឋាន នៅក្នុងប្រទេសចិន ដើម្បីរកមធ្យោបាយស្តារទំនាក់ទំនងចិន-អាមេរិកឱ្យបានប្រសើរឡើងផង និងអំពីកោះតៃវ៉ាន់ ដែលជាប្រធានបទដ៏រសើបបំផុតផង។ នេះបើតាមការជូនដំណឹងរបស់ប៉េកាំង ក្នុងថ្ងៃចន្ទទី១២ធ្នូ២០២២។
ចុះផ្សាយនៅថ្ងៃ៖
ស្តាប់ - ០២:០១
តាំងពីប្រធានាធិបតីអាមេរិកចូបៃដិន និងប្រធានាធិបតីចិន ស៊ី ជីនពីង បានព្រមព្រៀងស្តារទំនាក់ទំនងរវាងវ៉ាស៊ីនតោននិងប៉េកាំងឡើងវិញមក ថ្ងៃនេះជាលើកទីមួយហើយដែលគេឃើញមានដំណើរទស្សនកិច្ចផ្លូវការរបស់ប្រតិភូជាន់ខ្ពស់អាមេរិកនៅក្នុងទឹកដីចិន។
ប្រតិភូអាមេរិកដែលតំណាងដោយលោក Daniel Kritenbrink អនុរដ្ឋមន្ត្រីក្រសួងការបរទេសទទួលបន្ទុកអាស៊ីខាងកើតនិងអាស៊ីប៉ាស៊ីហ្វិក និងលោកស្រីនាយកទីប្រឹក្សាសន្តិសុខជាតិដើម្បីចិននិងតៃវ៉ាន់ប្រចាំសេតវិមាន Laura Rosenberger បានជួបពិភាក្សាជាមួយលោក ស៊ា ហ្វេង Xie Feng អនុរដ្ឋមន្ត្រីក្រសួងការបរទេសចិន នៅជាយក្រុងប៉េកាំង រយៈពេលពីរថ្ងៃ គឺនៅថ្ងៃអាទិត្យទី ១១ និងថ្ងៃចន្ទទី ១២ ធ្នូនេះ។ នេះបើតាមប្រភពការទូតចិន។
ភាគីទាំងពីរបានជជែកគ្នាយ៉ាងស៊ីជម្រៅ ដោយស្មោះត្រង់ និងប្រកបដោយលក្ខណៈស្ថាបនា ជុំវិញការដាក់ឱ្យដំណើរការនូវអ្វីដែលប្រធានាធិបតីទាំងពីរប្រទេសបានត្រូវរ៉ូវគ្នានៅក្រុងបាលី ដូចជាបានលើកឡើងអំពីការពង្រឹងការផ្តោះប្តូរគ្រប់ជាន់ថ្នាក់។ សំណុំរឿងតៃវ៉ាន់ ដែលជាប្រធានបទដ៏រសើបបំផុត និងដែលចិនចាត់ទុកដែនដីមួយដុំរបស់ខ្លួន ហើយអាមេរិកបន្តការគាំទ្រផ្នែកអាវុធយ៉ាងខ្លាំង ក៏ត្រូវបានលើកមកពិភាក្សាគ្នាដែរ។
កម្មវត្ថុនៃជំនួបពិភាក្សាលើកនេះ ក៏ជាការត្រៀមរៀបចំដំណើរទស្សនកិច្ចផ្លូវការ របស់លោកប្រមុខការទូតអាមេរិក អង់តូនី ប្លីងកិន នៅចិន នាដើមឆ្នាំ២០២៣នេះដែរ។
សូមបញ្ជាក់ថា ទំនាក់ទំនងចិនអាមេរិក បានធ្លាក់ដុនដាបខ្លាំង នារយៈពេលប៉ុន្មានឆ្នាំចុងក្រោយមកនេះ ដោយហេតុតែបញ្ហាជាច្រើន ដូចជាបញ្ហាពាណិជ្ជកម្ម បញ្ហាជនជាតិភាគតិចកាន់សាសនាអ៊ីស្លាមនៅចិន អ៊ុយហ្គួ ឬបញ្ហាប្រកួតប្រជែងបច្ចេកវិទ្យាជាដើម។ល។ ប៉ុន្តែ កាលពីខែវិច្ឆិកា នាឱកាសជំនួបកំពូលហ្សេ២០ នៅទីក្រុងបាលី ប្រទេសឥណ្ឌូណេស៊ី ប្រមុខដឹកនាំប្រទេសទាំងពីរ បានជួបនិយាយគ្នារយៈពេលបីម៉ោង លើគ្រប់ប្រធានបទរសើបៗ តាំងពីរឿងតៃវ៉ាន់ ដល់ការនាំចូលបច្ចេកវិទ្យាអាមេរិកទៅចិន ឬឥទ្ធិពលចិននៅលើពិភពលោក ដោយសម្រេចស្តារទំនាក់ទំនងឱ្យប្រសើរឡើងវិញ ព្រោះសម្រាប់លោកស៊ីជីនពីង អាមេរិក-ចិន ត្រូវចែករំលែកគ្នាឱ្យបានច្រើន ឯលោកចូបៃដិន យល់ថាមិនចាំបាច់អ្វីត្រូវមានសង្គ្រាមត្រជាក់ថ្មីទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ