COP15៖សហភាពអឺរ៉ុបចង់ឲ្យមានប្រភពហិរញ្ញវត្ថុច្រើនដើម្បីជួយក្រុមប្រទេសកំពុងអភិវឌ្ឃសម្រាប់ការពារប្រព័ន្ធជីវចម្រុះ
សន្និសីទអន្តរជាតិស្ដីពីជីវចម្រុះ COP១៥ ដែលបានបើកធ្វើនៅក្នុងទីក្រុងម៉ុងរ៉េអាល់ ប្រទេសកាណាដាកាលពីថ្ងៃ ទី៧ ធ្នូគ្រោងបិទបញ្ចប់នៅថ្ងៃទី១៩ ធ្នូ។ សន្និសីទដែលចូលរួមដោយ ១៩០ប្រទេស និងអង្គការជាច្រើនមានគោលដៅស្វែងរកកិច្ចព្រមព្រៀងអន្តរជាតិមួយដើម្បីការពារប្រព័ន្ធអេកូឡូស៊ី និងជីវចម្រុះ។ សហភាពអឺរ៉ុប និងប្រទេសអភិវឌ្ឃជាច្រើនបានបញ្ជាក់ជាថ្មីពីឆន្ទៈនៃការបង្កើនទឹកលុយសម្រាប់ជួយក្រុមប្រទេសដែលងាយរងគ្រោះបំផុតដើម្បីការពារប្រព័ន្ធអេកូឡូស៊ី និងប្តូរទៅរកថាមពលបៃតង។ តែចំនួនទឹកលុយដែលថែមពិតប្រាកដមានតិចតួច។ គឺមានតែប្រទេសអេស្ប៉ាញដែលបានបង្កើនទ្វេដង ហើយប្រទេសហូឡង់បានបង្កើនចំនួន ៥០%។ ទោះជាយ៉ាងនេះក្តី ស្នងការអឺរ៉ុបទទួលបន្ទុកបរិស្ថានដែលបានផ្តល់បទសម្ភាសន៍ឲ្យវិទ្យុបារាំងអន្តរជាតិបានធានាថា នេះជាសក្ខីភាពនៃឆន្ទៈដ៏ល្អចំពោះបណ្តាប្រទេសប៉ែកខាងត្បូងដែលកំពុងទាមទារលុយចំនួន ១០០ ០០០លានដុល្លារក្នុងមួយឆ្នាំរហូតដល់ឆ្នាំ ២០៣០ និងចង់បានមូលនិធិពិសេសមួយសម្រាប់ជីវចម្រុះ។
ចុះផ្សាយនៅថ្ងៃ៖
ស្តាប់ - ០១:២១
« យើងកំពុងបញ្ជូនសញ្ញាវិជ្ជមានទៅឲ្យក្រុមប្រទេសប៉ែកខាងត្បូងដើម្បីប្រាប់ពួកគេថា យើងពិតជាបានដឹង និងឮពីតម្រូវការរបស់ពួកគេ។ យើងកំពុងស្វែងរកដំណោះស្រាយ។ តែដំណោះស្រាយនេះក៏ត្រូវតែមានការពិត អាចធ្វើទៅបាន និងក៏ត្រូវគិតគូរផងដែរពីភាពជាក់ស្តែងនៃថវិកាដែលយើងអាចដោះស្រាយបាន។
បើយើងនិយាយតែពីជំនួយអភិវឌ្ឃ ទឹកប្រាក់ចំនួន ១០០ ០០០លានដុល្លារគឺមិនអាចទៅរួចទេ។ ផ្ទុយទៅវិញ បើយើងនិយាយពីប្រភពហិរញ្ញវត្ថុចម្រុះដោយមានការចូលរួមពីភាគីផ្សេងទៀត ដូចជាធនាគារជំនួយអភិវឌ្ឃន៍ និងវិស័យឯកជននោះ យើងនឹងអាចប្រមូលបាននូវទឹកប្រាក់ចំនួន ១០០ ០០០លានដុល្លារដែលក្រុមប្រទេសប៉ែកខាងត្បូងចង់បាន។
ដោយឡែក រឿងបង្កើតឲ្យមានមូលនិធិថ្មីមិនអាចដោះស្រាយបញ្ហាបានទេ។ អ្វីដែលត្រូវធ្វើនៅចំពោះមុខ គឺធ្វើឱ្យប្រសើរឡើងនូវលទ្ធភាពនៃការទទួលបានហិរញ្ញវត្ថុ។ គេត្រូវធ្វើការកែប្រែថ្មីដើម្បីធ្វើយ៉ាងឲ្យបណ្តាប្រទេសអាហ្វ្រិក និងអាមេរិកឡាទីន ជាពិសេសអាចទទួលបាននូវមូលនិធិកាន់តែលឿន។ គេត្រូវផ្តោតការយកចិត្តទុកដាក់លើគ្រប់យន្តការដែលយើងមានស្រាប់ និងធ្វើឲ្យប្រសើរនូវយន្តការទាំងនេះ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ