COP15៖ ជនជាតិដើមភាគតិច ចង់ឃើញតួនាទីខ្លួនក្នុងការអភិរក្សប្រព័ន្ធជីវៈចម្រុះ ត្រូវគេទទួលស្គាល់និងលើកទឹកចិត្ត
សន្និសីទអន្តរជាតិស្តីពីប្រព័ន្ធជីវចម្រុះ កំពុងតែដំណើរការទៅយ៉ាងសកម្ម នៅទីក្រុងម៉ុងត៍រ៉េអាល់ ប្រទេសកាណាដា។ តំណាងប្រទេសជាង១៩០ កំពុងតែចរចាគ្នា ដើម្បីស្វែងរកការស្រុះស្រួលយោបល់ លើកម្មវត្ថុជាង២០ចំណុច។ ជាកម្មវត្ថុដែលសំដៅទប់ស្កាត់ការសិករិចរិល ការហិនហោចនៃប្រព័ន្ធជីវៈចម្រុះដ៏ចាំបាច់សម្រាប់ជីវិត ពីនេះដល់ឆ្នាំ២០៣០។ ទន្ទឹមគ្នានេះ ក្រុមសហគមន៍ជនជាតិដើមភាគតិច បានចូលរួមយ៉ាងខ្លាំង ក្នុងការផ្តល់ជាបទពិសោធន៍ បង្ហាញផ្លូវត្រូវដើរ ដើម្បីឈានទៅអភិរក្សប្រព័ន្ធជីវៈចម្រុះ។ តំណាងសហគមន៍ជនជាតិដើមភាគតិច មកពីប្រទេសជាច្រើន ត្រូវបានគេអញ្ជើញឲ្យចូលរួម នៅក្នុងវេទិកាជជែកពិភាក្សា ដោះដូរយោបល់ក្នុងក្របខណ្ឌសន្និសីទអន្តរជាតិ COP15។
ចុះផ្សាយនៅថ្ងៃ៖
លោកស្រី Joli Cariño តំណាងជនជាតិដើម ibaloï នៅហ្វីលីពីន និងជាតំណាងវេទិកាអន្តរជាតិនៃក្រុមជនជាតិដើម សម្រាប់សន្និសីទCOP15 បានលើកឡើងថា កន្លងមកការអភិរក្សសត្វព្រៃនិងរុក្ខជាតិ គឺគេយកគម្រូតាមប្រទេសលោកខាងលិច តាមរយៈការបង្កើតតំបន់អភិរក្សការពារដ៏តឹងតែង ហើយដោយបណ្តេញមនុស្សឲ្យចាកចេញពីតំបន់ទាំងនេះ។ ករណីបែបនេះ មានច្រើនណាស់ ជាពិសេសនៅអាហ្វ្រិក។ គេបង្កើតតំបន់អភិរក្សធម្មជាតិ ហើយបានដេញប្រជាជនជាតិដើមភាគតិច ដែលធ្លាប់តែរស់នៅរាប់ដំណ ឲ្យចាកចេញ ហើយដុតផ្ទះសម្បែងរបស់ពួកគេចោលជាដើម។ ទង្វើបែបនេះ វាគឺជាកំហុសភ័ន្តច្រឡំមួយដ៏ធ្ងន់ ហើយដែលត្រូវតែកែតម្រូវ។
លោក ហឿន សុភាព តំណាងសហគមន៍ព្រៃឡង់នៅកម្ពុជា ដែលមានវត្តមាននៅក្នុងសន្និសីទអន្តរជាតិ COP15 ដែរនោះ លោកបានលើកឡើងថា សហគមន៍ជនជាតិដើម រស់នៅពឹងផ្អែកលើផលបានមកពីព្រៃឈើ តែដោយគោរពនិងរក្សាព្រៃឈើ ព្រោះវាជាទីកន្លែងសក្ការៈតាមអបិយជំនឿ។ សហគមន៍ជនជាតិដើម គួរណាតែត្រូវបានគេលើកទឹកចិត្ត គេអរគុណដែលបានជួយអភិរក្សព្រៃឈើ។ តែផ្ទុយទៅវិញ គេបានបង្កើតតំបន់អភិរក្សធម្មជាតិ ដាក់កងសន្តិសុខយាមល្បាតជុំវិញ ហើយបណ្តេញប្រជាជនចេញ។ ជាងនេះទៀត គេបានបើកដៃ ស៊ីសំណូកពុករលួយ កាប់បំផ្លាញព្រៃឈើ និងបរបាញ់សត្វព្រៃ យ៉ាងអាណាធិបតេយ្យទៅវិញ។
សូមរំលឹកថា អ្នកជំនាញប្រព័ន្ធជីវៈចម្រុះនៃអង្គការសហប្រជាជាតិ បានទទួលស្គាល់នៅក្នុងរបាយការណ៍ប្រចាំឆ្នាំ២០២២ ដោយបានលើកឡើងថា សហគមន៍ជនជាតិដើមភាគតិច គឺមានប្រពៃណី ទំនៀមទំលាប់រស់នៅបែបដូនតា ដោយគោរពធម្មជាតិ និងជួយជំរុញឲ្យពូជសត្វនិងរុក្ខជាតិទាំងអស់ អាចរស់ធំធាត់ក្នុងបរិស្ថានដែលមានតុល្យភាព។
យ៉ាងណាមិញ លោក Joseph Itongwa អ្នកសម្របសម្រួលបណ្តាញគ្រប់គ្រងព្រៃធម្មជាតិនៅតំបន់អាហ្វ្រិកកណ្តាល បានថ្លែងថាលោកចង់ឃើញ រដ្ឋាភិបាលប្រទេសទាំងអស់ ទទួលស្គាល់ ហើយរៀបចំឲ្យមានគោលនយោបាយរដ្ឋជាក់ស្តែង ដើម្បីជួយសហគមន៍ជនជាតិដើម នៅក្នុងការអភិរក្សប្រព័ន្ធជីវៈចម្រុះ។
សម្រង់ប្រសាសន៍លោក Joseph Itongwa អ្នកសម្របសម្រួលបណ្តាញគ្រប់គ្រងព្រៃធម្មជាតិនៅតំបន់អាហ្វ្រិកកណ្តាល
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ