អាមេរិកប្រាប់ចិនថា វិធានការរបស់អាមេរិកលើអ្នកដំណើរមកពីចិនធ្វើឡើងដោយផ្អែកលើហេតុផលវិទ្យាសាស្រ្ត
ប្រឈមនឹងសន្ទុះកំណើនករណីឆ្លងកូវីដ១៩នៅចិន មានប្រទេសមួយចំនួន ក្នុងនោះក៏មានអាមេរិកមួយដែរបានចាត់វិធានការទៅលើគ្រប់អ្នកដំណើរមកពីប្រទេសចិន។ ក្នុងចំណោមប្រទេសដែលបានចាត់វិធានការ មានភាគច្រើនបានតម្រូវឲ្យគ្រប់អ្នកដំណើរមកពីចិនមានលទ្ធផលតេស្ត PCR អវិជ្ជមានកូវីដ និងប័ណ្ណចាក់វ៉ាក់សាំង ឬមានត្រឹមលទ្ធផលតេស្ត PCR អវិជ្ជមានកូវីដ។ ជាមួយគ្នានេះ ក៏មានការធ្វើតេស្តបន្ថែមនៅពេលមកដល់អាកាសយានដ្ឋានដែរ។ ចំណែកប្រទេសផ្សេង ដូចយ៉ាងម៉ារ៉ុកបានបិទមិនឲ្យអ្នកដំណើរមកពីចិនចូលតែម្តង ទោះជាជនជាតិចិន ឬជនជាតិផ្សេងក៏ដោយ។ រដ្ឋាភិបាលក្រុងប៉េកាំងបានចាត់ទុកវិធានការរបស់ប្រទេសទាំងនោះជាការរើសអើង និងមិនអាចទទួលយកបានទេ។ តែរដ្ឋបាលអាមេរិកតាមរយៈអ្នកនាំពាក្យក្រសួងការបរទេសលោកនែដ ប្រៃសិ៍បានឆ្លើយតបនឹងចិនវិញថា វិធានការដែលតម្រូវឲ្យអ្នកដំណើរមកពីចិនមានលទ្ធផលតេស្តអវិជ្ជមានកូវីដចាប់ពីថ្ងៃទី៥ មករាធ្វើឡើងដោយផ្អែកលើហេតុផលវិទ្យាសាស្រ្ត និងថា ចិនបានបដិសេធមិនទទួលយកជំនួយវ៉ាក់សាំងរបស់អាមេរិកទេ។
ចុះផ្សាយនៅថ្ងៃ៖
ស្តាប់ - ០១:១៩
« វិធានការរបស់អាមេរិកធ្វើឡើងដោយផ្អែកលើមូលដ្ឋានវិទ្យាសាស្រ្តតែមួយគត់។ ដោយសារតែកំណើននៃការចម្លងកូវីដ១៩ នៅសាធារណៈរដ្ឋប្រជាមានិតចិន និងកង្វះតម្លាភាពទាក់ទងនឹងទិន្នន័យស្តីពីប្រភេទមេរោគកូវីដដែលកំពុងឆ្លងរាលដាលនៅក្នុងប្រទេសចិន យើងចាត់វិធានការដោយចេតនាដើម្បីពន្យឺតការឆ្លងរីករាលដាលកូវីដ១៩។ ហើយវាក៏ជាការរក្សាភាពប្រុងប្រយ័ត្នប្រឈមទប់នឹងគ្រប់ករណីឆ្លងដោយមេរោគកូវីដ១៩ បំប្លែងខ្លួនថ្មីៗទៀតដែរ។
បណ្តាប្រទេសផ្សេងកំពុងមានក្តីបារម្ភដូចគ្នានេះ ហើយពួកគេបានចាត់វិធានការស្រដៀងគ្នាក្នុងពេលដែលចិនកំពុងស្គាល់សន្ទុះកំណើនឆ្លងកូវីដ១៩ យ៉ាងខ្លាំង។ យើងបានស្នើជំនួយជាវ៉ាក់សាំង និងជំនួយផ្សេងទៀតក្នុងរឿងកូវីដទៅកាន់រដ្ឋាភិបាលចិន។ តែចិនបានឆ្លើយជាសាធារណៈថា ចិនពេញចិត្តនឹងសំណើជំនួយនេះ តែចិនមិនត្រូវការការគាំទ្រទេ។ យ៉ាងណាក៏ដោយ សំណើជំនួយរបស់យើងកំពុងស្ថិតនៅលើតុជានិច្ច »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ